U Siarhieja Cichanoŭskaha ŭ domie prachodzić pieratrus, paviedamlaje Twitter «Kraina dla žyćcia».
Paviedamlajecca, što na pieratrus pryjechała 8 mašyn, 2 ź ich było biez numaroŭ. Paviedamlajecca pra toje, što ŭ homielskaj studyi błohiera taksama prajšoŭ pieratrus.
Jak udakładniła Tut.by žonka błohiera Śviatłana, pieratrus prachodzić na siamiejnaj dačy, kudy Siarhiej Cichanoŭski časta pryjazdžaŭ adpačyć. Siońnia ranicaj mamie błohiera, jakaja ciapier znachodzicca sa Śviatłanaj ŭ Minsku, patelefanavali śledčyja i paprasili pryjechać na daču, jakaja znachodzicca za try dziasiatki kiłamietraŭ ad Homiela.
— Mama patłumačyła, što jana ŭ Minsku. Jany skazali, što, kali nie pryjedzie, vydaduć pastanovu na ŭzłom dźviarej. Ja im skazała, kab pryjechali pa jaje, navošta ž dźviery łamać. Za mamaj pryjechała dziaŭčyna-śledčaja i kiroŭca, zabrali jaje na daču. Tam ciapier i adbyvajecca pieratrus. U mamy serca chvoraje, našy siabry pryjechali jaje tudy padtrymać. Siarhiej na dačy pravodziŭ šmat času: adpačyvaŭ, na pryrodu jeździŭ, — raspaviadaje Śviatłana.
Fota Nadziei Bužan.
Padčas minułych vybarčych kampanij pieratrusaŭ u pretendentaŭ na pasadu prezidenta nie byvała. U hetym sensie sioletniaja kampanija biesprecedentnaja.
Śviatłana Cichanoŭskaja, nastaŭnica, jakaja ciapier siadzić doma z małymi dziećmi, padała dakumienty na rehistracyju, kab stać kandydatkaj u prezidenty, paśla taho, jak jaje muža aryštavali na 15 sutak pierad abviaščeńniem prezidenckich vybaraŭ, kab nie dać jamu mahčymaści bałatavacca.
Siarhiej Cichanoŭski — adzin z samych papularnych u krainie videabłohieraŭ. Jon zaklikaje da vuličnych akcyj pratestu suprać režymu Alaksandra Łukašenki.
29 maja Siarhieja Cichanoŭskaha zatrymali ŭ Hrodnie. Ale pravakacyja, jakaja papiaredničała zatrymańniu, trapiła na videa, i za noč karystalniki internetu identyfikavali žančynu, jakaja adyhrała ŭ joj centralnuju rolu.
Čytajcie taksama: «Pryjemnaja dziaŭčyna pyšnych form». Identyfikavali pravakatarku z sustrečy ź Cichanoŭskim
Niahledziačy na jaho zatrymańnie, u subotu i niadzielu ludzi masava stajali ŭ čerhach, kab padpisacca za Śviatłanu Cichanoŭskuju. Heta zdaryłasia ŭ Minsku, Breście, Homieli, Hrodnie, Viciebsku, Mahilovie, Žodzinie, Lidzie, Maładziečnie, Stoŭbcach, Hłybokim, inšych haradach.
Ludzi ŭ čerhach byli nastrojenyja radykalna. «Kolki možna? Kolki ŭžo možna? Voś čamu ja tut!» — adkazała karespandentu «Našaj Nivy» žančyna ŭ čarzie da punkta zboru podpisaŭ za Śviatłanu Cichanoŭskuju ŭ Minsku. Jana skazała, što źbirajecca «pastavić podpis i za Babaryku, i za Capkału. Chto zaŭhodna, tolki nie jon [Alaksandr Łukašenka]».
Zatrymańnie Siarhieja Cichanoŭskaha dało taksama impuls abjadnańniu alternatyŭnych kandydataŭ.
Valeryj Capkała z žonkaj publična addali svaje podpisy Śviatłanie Cichanoŭskaj.
Papularny lidar chryścijanskich demakrataŭ Pavieł Sieviaryniec zaklikaŭ ludziej pa ŭsioj krainie ŭ niadzielu a 12-j hadzinie źbiracca na pikietach pa zbory podpisaŭ za Śviatłanu Cichanoŭskuju.
A bankir i miecenat Viktar Babaryka, jaki, pavodle źviestak internet-apytańniaŭ, vyrvaŭsia ŭ lidary prezidenckaj kampanii, nazvaŭ zatrymańnie Cichanoŭskaha «niezakonnym» i paabiacaŭ jurydyčnuju i finansavuju padtrymku ŭsim, kaho začepiać represii ci na kaho buduć cisnuć.
