Kadravy pieratrus, zładžany na minułym tydni, byŭ dastatkova raptoŭny i vielmi mocny, tamu ŚMI źviarnuli ŭvahu tolki na samych značnych pryznačencaŭ. Naprykład, takich, jak novy premjer-ministr Raman Hałoŭčanka.
Tym nie mienš, va ŭradzie źjaviłasia šmat novych abliččaŭ, u tym liku na takich vysokich pasadach, jak vice-premjer. Mienavita hetaje kresła zaniaŭ 44-hadovy Alaksandr Subocin, jaki źmianiŭ Uładzimira Dvornika. Ciapier Subocin budzie adkazvać za sielskahaspadarčy błok urada.
«NN» raskazvaje, što atrymałasia daviedacca pra hetaha čynoŭnika.
Alaksandr Subocin. Fota rg.ru
Alaksandr Subocin naradziŭsia ŭ 1976 hodzie ŭ pasiołku Ruba la Viciebska. Na toj čas heta była samastojnaja terytaryjalnaja adzinka. Niekalki hadoŭ tamu hety nasieleny punkt dałučyli da Viciebska.
Ruba znachodzicca na poŭnačy ad abłasnoha centra, pa abodva baki Zachodniaj Dźviny. Zusim pobač — Zdraŭniova z muziejem-siadzibaj Ilji Repina.
Da 1930-ch hadoŭ Ruba była zusim maleńkim nasielenym punktam. Pierałomnym momantam u historyi miastečka stała zasnavańnie zavoda, vakoł jakoha i staŭ razrastacca pasiołak. U 1978 hodzie pradpryjemstva atrymała nazvu «Dałamit».
Mienavita na «Dałamicie» pracavali baćki Alaksandra Subocina. Mama Hanna była na kiraŭničaj pasadzie, a baćka Michaił pracavaŭ ekskavatarščykam. Baćki atrymali dvuchpakajovuju kvateru na vulicy Maładziožnaj u domie dla rabočych «Dałamita».
Źviazanaja z «Dałamitam» i jašče adna siamiejnaja historyja. U pačatku 1990-ch dyrektaram hetaha pradpryjemstva byŭ Uładzimir Hryhorjeŭ (u saviecki čas — kiraŭnik Viciebskaha abkama KPSS). U 1996 hodzie Hryhorjeva pieraviali ŭ Maskvu: spačatku ŭ aparat sajuznaj dziaržavy, a potym pasłom Biełarusi ŭ Rasii.
Dyk voś, z saboj ź Viciebska ŭ Maskvu Hryhorjeŭ zabraŭ stryječnaha brata Alaksandra Subocina, jaki staŭ asabistym kiroŭcam pasła.
Baćki Alaksandra Subocina pa-raniejšamu žyvuć u Rubie, choć šmat času pravodziać na leciščy. Katedž jany pabudavali ŭ vioscy Łuščycha, što vyšej pa Dźvinie. Alaksandr — adzinaje dzicia ŭ siamji.
Alaksandr Subocin skončyŭ škołu ŭ Rubie (ciapier heta SŠ №15 Viciebska). Usie kažuć, što byŭ vydatnikam. Vučycca pastupiŭ u Vieterynarnuju akademiju. Pry vieterynarnaj akademii mužčyna skončyŭ mahistraturu, aśpiranturu i daktaranturu. Śfieraj navukovaj dziejnaści Subocina stała parazitałohija. Dysiertacyju abaraniŭ pa temie: «Parazitnyja sistemy dzikich kapytnych i drapiežnych i asnovy prafiłaktyki parazitaŭ na terytoryi Biełarusi».
Paśpiachovy małady vučony zastaŭsia pracavać u alma-mater. Spačatku byŭ prosta asistentam na kafiedry zaałohii, a potym — pieršym prarektaram. Maje stupień doktara bijałahičnych navuk. Atrymaŭ stypiendyju Łukašenki jak talenavity małady navukoŭca.
U akademii Alaksandr sustreŭ žonku. Iryna taksama pracuje vykładčykam u vieterynarnaj akademii. Jana na 4 hady maładziejšaja za muža. Ciapier źjaŭlajecca dacentam kafiedry epizaatałohii (heta raspaŭsiud infiekcyjnych zachvorvańniaŭ siarod adnaho ci niekalkich vidaŭ žyviołaŭ na vialikaj terytoryi — «NN») i infiekcyjnych zachvorvańniaŭ žyviołaŭ.
Iryna Subocina. Fota facebook.com
Šmat navukovych prac Iryna Subocina napisała sumiesna z mužam. Naprykład, «Anatoma-marfałahičnyja źmieny ŭ arhaniźmie chatniaj koški pry roznych invazijach», «Lačeńnie cialataŭ pry nieaaskarydozie».
U pary dźvie dački, jany jašče školnicy. Iryna aktyŭna viadzie staronku ŭ instahramie, kudy vystaŭlaje fotazdymki z vandrovak, pryrodu i haradskija zamaloŭki. Zdymkaŭ ź siamjoj tam niama zusim.
U 2017 hodzie ŭ Subocina skončyłasia navukovaja staronka bijahrafii i pačałasia čynoŭnickaja. Spačatku jaho pryznačyli pamočnikam prezidenta pa Viciebskaj vobłaści. Potym pieraviali na pasadu ministra pa pramysłovaści i ahrapramysłovym kompleksie Jeŭrazijskaj ekanamičnaj kamisii.
Litaralna ŭ sakaviku Subocin byŭ pryznačany pamočnikam Łukašenki pa Mahiloŭskaj vobłaści. Tady kiraŭnik krainy tak tłumačyŭ svoj vybar: «Chaciełasia b, kab vy pachadzili bolš pa ziamli i ŭnikli dobrańka ŭ pracesy sielskahaspadarčaj vytvorčaści. Vam u dalejšym heta spatrebicca. Vy čałaviek adukavany, razumny. Mahiloŭskuju vobłaść padnimicie razam z Zajcam [Leanid Zajac, staršynia Mahiloŭskaha abłvykankama — «NN»] i inšymi, adpaviednaje i staŭleńnie budzie».
Praz try miesiacy «chadžeńnia» pa mahiloŭskaj ziamli Subocina pieraviali na pavyšeńnie ŭ Minsk.
Čytajcie jašče: Žanaty druhi raz, syn piša vieršy pa-biełarusku: što viadoma pra siamju novaha premjer-ministra Ramana Hałoŭčanki
