Siońnia «pikiety salidarnaści» prachodziać nie tolki ŭ stalicy, ale i ŭ inšych haradach Biełarusi: Baranavičach, Lidzie, Oršy, Viciebsku, Homieli, Babrujsku, Stoŭbcach, Žodzinie, Salihorsku… Akcyi ŭ rehijonach atrymalisia nie mienš emacyjnymi, čym u stalicy.
Babrujsk
U Babrujsku ŭzdoŭž vulicy Minskaj ludzi vystrailisia ŭ łancuh mietraŭ na 500.
U Babrujsku taksama pačalisia zatrymańni. U aŭtazaku znachodziacca žurnalisty Siaržuk i Alesia Łacinskija.
«Pikiet u Babrujsku siońnia raściahnuŭsia na 600 mietraŭ, ludzi pačali padychodzić pieravažna paśla 6 hadziny viečara. Bolš za 1000 čałaviek pryniali ŭdzieł u akcyi», — paviedamlajecca ŭ telehram-kanale «Babrujs Online».
Nie mienš za šeść čałaviek dastaŭlena ŭ miascovy RAUS.
Viciebsk
U Viciebsku kala «Mark-Sici» źbirajucca ludzi i stanoviacca ŭ žyvy łancuh.
U Viciebsku kolkaść ludziej pavialičvajecca. Naziralnica kampanii «Pravaabaroncy za svabodnyja vybary» Iryna Traćciakova adznačaje, što nie mienš za 500 čałaviek znachodziacca na pikiecie.
Kala 20 hadziny viečara ŭ centr Viciebska padahnali piać aŭtobusaŭ, zabłakavali tratuar. Darohu pierakryli, ludzi stali razychodzicca.
Zatrymanyja Alena i Julija Januškoŭskija, ich pavieźli ŭ RAUS Čyhunačnaha rajona.
Da płoščy Pieramohi pryjechaŭ aŭtazak, zabrali niekalki čałaviek, jakija stajali ŭ samym kancy płoščy.
Homiel
Vidavodčy paviedamlajuć, što ŭ centry horada pastavili pikiety prychilniki dziejučaha prezidenta. Siudy ž pryvieźli ludziej na aŭtobusach, kab jany pastajali i pakinuli podpisy za Łukašenka.
U Homieli zatrymali žančynu. Vierahodna heta Alena Davydava. «Kandydatku pratestu» Alenu Davydavu adpuścili praź niekalki chvilin paśla zatrymańnia.
Kala 500 čałaviek vyjšli na pikiet, AMAP sprabuje ich razahnać.
Tych, chto nie razyšoŭsia, pakujuć u aŭtobus.
Amapaŭcy kudyści pavałakli čałavieka ŭ nieprytomnym stanie.
U zatrymanaha ŭ aŭtazaku — prystup epilepsii. Chutkuju nie vyklikajuć, prosiać supakoicca čałavieka z kanvulsijami na padłozie.
Brest
Kala 100 čałaviek stajać na vulicy Savieckaj ad kinateatra «Biełaruś» da pomnika 1000-hodździa na Hohala.
Brest u 20:50: ludzi stajać pad daždžom na praśpiekcie Mašerava ad vulicy Chałturyna da vulicy 17 vieraśnia.
AMAP vyjšaŭ i ŭ Breście: ludziej vyciaśniajuć z tratuaraŭ, bieraściejcy kryčać «Hańba!».
Śvietłahorsk
Kala 20 čałaviek vyšli ŭ «žyvy łancuh» u Śvietłahorsku. Mašyny, što prajazdžajuć mima — sihnalać u znak padtrymki.
Hrodna
U Hrodnie sabralisia kala 350 čałaviek. Ludzi apładzirujuć, mašyny, jakija prajazdžajuć mima, sihnalać.
U Hrodnie ludzi stajać ad Savieckaj płoščy, praź Nioman da fiłarmonii.
AMAP i supracoŭniki milicyi kažuć prysutnym razyścisia.
Kala 21 hadziny viečara pačalisia zatrymańni. Viadoma pra adnaho zatrymanaha.
U Hrodnie na vulicy Harnavych DAI vypisvaje pratakoły kiroŭcam mašyn, jakija sihnalili. Ludzi chodziać za AMAPam, pierajšli sa staroha mosta na Savieckuju płošču.
U pikavyja momanty ŭ łancuhu salidarnaści, pa padlikach telehram-kanała «Vybary bačyš?», było kala 500-600 čałaviek. Ciarier na płoščy zastałosia kala 100.
Mahiloŭ
Kala 120 čałaviek vyšli ŭ centr Mahilova.
Kala 20 hadziny viečara pačalisia zatrymańni: u milicejski bus adviali Alaksandra Śpirydonava.
Milicyja kaža prysutnym razyścisia, ale ludzi nie nadta padparadkoŭvajucca.
Žurnalista Alaksandra Sabaleŭskaha zatrymali ŭ žyvym efiry dla Mahiloŭskaha YouTube-kanała 6TV. Taksama zatrymanaja karespandent TUT.BY Anžalika Vasiljeŭskaja. Ich dastavili ŭ RAUS Leninskaha rajona Mahilova.
U 21:30 z RAUS adpuścili Anžaliku Vasileŭskuju.
