Minčuk Jarasłaŭ Banščykaŭ byŭ siarod tych, kaho zatrymali 19 červienia ŭ centry horada. Jon raskazaŭ «Našaj Nivie», što adbyvałasia ŭ ścienach RUUS, jak amapaŭcy abyšlisia ź bieł-čyrvona-biełym ściaham i vypadkova zakinuli ŭ bus «svajho».
Ilustracyjny zdymak. Fota Nadziei Bužan
U piatnicu ŭviečary chłopiec byŭ na praśpiekcie Niezaležnaści kala «Makdonaldsa». Kali cichar z kamieraj staŭ zdymać minakoŭ, Jarasłaŭ pačaŭ zdymać na telefon jaho. Praź niekalki siekund na chłopca naskočyli zzadu dva milicyjaniery ŭ cyvilnym.
«Udvuch zatrymać nie zmahli, i z busa vylacieŭ AMAP. Upiacioch zanieśli, — apisvaje chłopiec. — Ja byŭ u busie razam z hramadziankaj Čechii. Jaje zatrymali za toje, što jana praciahnuła supracoŭniku orhanaŭ bukiecik vałošak. Jašče adnu dziaŭčynu zabrali, kali jany z chłopcam hulali z sabakam».
Tam ža na praśpiekcie milicyja pamyłkova zatrymała cichara.
«Jon nie supraciŭlaŭsia naohuł, ale AMAP dastatkova žorstka zapchaŭ jaho. Jak tolki jon apynuŭsia ŭ busie, pačaŭ kazać: «Ja svoj, ja svoj, pacany». Paśla pakazaŭ dakumienty i pačaŭ bałbatać z amapaŭcami. Jany skazali, što nie mohuć jaho vypuścić pry ludziach, i jon vyjšaŭ tolki ŭ RUUS. Pry hetym jon spakojna karystaŭsia telefonam, stelefanoŭvaŭsia z kimści.
Nakolki ja zrazumieŭ, jon pravakatar — toj, chto zavodzić inšych plaskać u dałoni i skandziravać, kab była nahoda zatrymać ludziej pobač ź im», — dzielicca Jarasłaŭ.
Jaho advieźli ŭ Centralnaje RUUS. Pa padlikach chłopca, tam było jašče kala 50 čałaviek. Jon pravioŭ tam siem hadzin i vyjšaŭ tolki a čaćviortaj ranicy ŭ subotu.
«Stajali tvaram da ścienki, ruki zzadu, za śpinami. Za paradkam sačyli supracoŭnikaŭ 15. Papić dazvolili schadzić tolki adnoj dziaŭčynie i chłopcu z astmaj, ale pad kanvojem. Vyklikali pa adnym na vobšuk i składańnie pratakołu».
Jarasłaŭ raskazvaje, što ŭ adnaho z zatrymanych zabrali bieł-čyrvona-bieły ściah. Amapaviec kinuŭ ściah na padłohu, razharnuŭ nahami, staŭ fatahrafavać i taptać jaho.
U abvinavačvańni chłopcu zapisali pra ŭdzieł u pikietavańni na karyść vyzvaleńnia Babaryki i praviadzieńnia sumlennych vybaraŭ, plaskańnie ŭ dałoni i kryčałki. Pra sud abiacali apaviaścić na praciahu tydnia.