Z takim prahnozam vystupiła Suśvietnaja mietearałahičnaja arhanizacyja (SMA) pry AAN, piša tass.ru.
Minuły maj staŭ samym ciopłym u historyi nazirańniaŭ za nadvorjem i klimatam, a pieryjad sa studzienia pa maj zaniaŭ druhi radok u śpisie samych ciopłych, sastupiŭšy tolki pieršym piaci miesiacam 2016 hoda, adznačyła SMA. Arhanizacyja, praŭda, patłumačyła, što 2016 hod byŭ adznačany najaŭnaściu mocnaha pryrodnaha fienomienu «El-Nińjo», viadomaha svaim sahravalnym efiektam, a sioleta hetaha faktaru niama.
«Zhodna ź jeŭrapiejskimi i amierykanskimi bazami źviestak, maj byŭ samym ciopłym u historyi nazirańniaŭ. 2020 hod, chutčej za ŭsio, — ź vierahodnaściu 99,9% — uvojdzie ŭ lik piaci samych ciopłych hadoŭ z zarehistravanych», — kanstatavała SMA.
Hetaja vysnova zasnavana na «biahučych anamalijach i hłabalnych źviestkach ab tempieratury, jakija paćvierdzili doŭhaterminovuju tendencyju da paciapleńnia z-za parnikovych hazaŭ u atmaśfiery, što ŭtrymlivajuć ciapło». Minuły maj byŭ 425-m zapar miesiacam, kali tempieratura była vyšejšaja za siarednija značeńni XX stahodździa.
U Paŭdniovaj Amierycy, Jeŭropie i Azii pieršyja piać miesiacaŭ 2020 hoda byli samymi ciopłymi ŭ historyi nazirańniaŭ. Na značnaj terytoryi ŭ paŭnočnaj častcy Azii tempieratura była na 3,5 hradusa Celsija vyšejšaj za siarednija značeńni. Rekordna vysokija tempieratury zarehistravanyja ŭ studzieni — mai ŭ Atłantyčnym akijanie, paŭdniovaj častcy Cichaha i Indyjskaha akijanaŭ.
U Sibiry ŭ mai tempieratura miescami na 10 hradusaŭ pieravyšała normu. Niezvyčajnaje zimovaje i viasnovaje ciapło supravadžałasia vielmi rańnim uskryćciom lodu na sibirskich rekach.
Razam z tym, śpiecyjalisty Słužby ES pa źmianieńni klimatu «Kapiernik» źviarnuli ŭvahu na toj fakt, što, «choć płanieta ŭ cełym nahrajecca, hety praces adbyvajecca nieraŭnamierna». U pryvatnaści, u Zachodniaj Sibiry tempieratura raście chutčej za siarednija tempy paciapleńnia. Pa prahnozach, hetym letam varta čakać bolš vysokich, čym zvyčajna, tempieratur «praktyčna pa ŭsim arabskim rehijonie», u pryvatnaści ŭ Saudaŭskaj Aravii, Kuviejcie, Jehipcie, Livii, Tunisie i Ałžyry.
SMA nahadała, što pieryjad 2015-2019 hadoŭ byŭ samym ciopłym piacihodździem u historyi mieteanazirańniaŭ, a 2010-2019 hady — samym ciopłym dziesiacihodździem. Pry hetym ad 1980-ch usie dziesiacihodździ byli bolš ciopłymi, čym luboje ź dziesiacihodździaŭ ad 1850 hoda.
