Pozna ŭviečary 19 červienia Viktar Chvaščeŭski viartaŭsia z pracy dadomu. Na praśpiekcie Dziaržynskaha, dzie ŭ hety viečar vystraiłasia čarha salidarnaści, jon zaŭvažyŭ znajomuju, jakuju nie bačyŭ 20 hadoŭ. Vyjšaŭ z mašyny, razhavarylisia, nieŭzabavie na tratuar vybieh AMAP: siabroŭku adšturchnuli, doktara schapili i kinuli ŭ aŭtazak. Tudy ž praź imhnieńnie adpravili dziaŭčynu, jakaja stajała pobač i sprabavała źniać na mabilny zatrymańnie. Rodnyja troje sutak sprabavali vyśvietlić, dzie Viktar. Siońnia jaho pavinny sudzić, ale, dzie mienavita, nichto tak i nie moža skazać, piša Tut.by.
Viktar Chvaščeŭski. Fota: doktora.by
Viktar Chvaščeŭski — chirurh-ankołah vyšejšaj katehoryi, staž pracy — 21 hod. Apošnim časam pracavaŭ u pryvatnym miedcentry «Siomaje nieba», da hetaha — u 10-j lakarni, raniej — zahadčyk adździaleńnia ŭ turemnym špitali na Kalvaryjskaj u Minsku. U piatnicu, 19 červienia, jon, jak zvyčajna, adpracavaŭ svaju 12-hadzinnuju źmienu i viartaŭsia dadomu.
— Na praśpiekcie Dziaržynskaha jon ubačyŭ staruju znajomuju, jakuju daŭno nie bačyŭ, — kaža siabroŭka mužčyny Alona. — Vyjšaŭ, kab pavitacca, pahavaryć. Jany stajali na tratuary, razhladali fatahrafii. Niečakana jaho schapili, paciahnuli ŭ aŭtazak, znajomuju adšturchnuli, u jaje siniaki zastalisia. Pobač stajała dziaŭčyna, jakaja sprabavała źniać zatrymańnie na mabilny telefon, jaje taksama zatrymali.
Viktar paśpieŭ paviedamić, što jaho viazuć ŭ Frunzienskaje RUUS, choć zatrymańnie prachodziła na terytoryi Maskoŭskaha rajona, u rajonie 22 hadziny.
— Usiu noč my abzvońvali RUUS, izalatar časovaha ŭtrymańnia i centr izalacyi pravaparušalnikaŭ, ale ŭsiudy kazali, što Chvaščeŭskaha ŭ ich niama, — tłumačyć Alona. — U abied nastupnaha dnia, kali ja pryjechała na Akreścina, mnie ŭsio-taki paćvierdzili, što jon u ich. Pieradaču pryniać admovilisia. Siońnia ŭ Frunzienskim RUUS usio ž taki pryznali, što pratakoł ab administracyjnym pravaparušeńni na jaho składali tam. Ale, dzie jaho buduć sudzić, my nie viedajem — u sudzie Maskoŭskaha rajona, Frunzienskaha ci inšaha, nam nichto ničoha nie kaža, dziažurny ŭ Frunzienskim RUUS skazaŭ, što heta budzie zakryty sud.
Siońnia ŭ sudach dziažurać siabry i rodnyja Viktara. U litaralnym sensie nie adychodziać ad infarmacyjnych stendaŭ, kab nie prapuścić u raskładzie jaho spravu.
— Nikoli ŭ žyćci jaho nie zatrymlivali, — kaža Alona. — Viadoma, kalehi i siabry aburanyja, mnohija pišuć słovy padtrymki. Viktar nie tolki vydatny doktar, jon aktyŭny čałaviek — zajmaŭsia alpinizmam, jachtynham, tamu jaho ciapier padtrymlivajuć i siabry pa sporcie.
Pa pytańni zatrymańnia Viktara Chvaščeŭskaha TUT.BY źviartaŭsia ŭ minskuju milicyju, MUS, va ŭsie rajonnyja sudy i Minski haradski sud. Zhodna ź infarmacyjaj na 12.00, žurnalistam taksama nie paviedamlajuć, dzie buduć razhladać spravu suprać doktara. Ale sud pavinien adbycca siońnia, pakolki minaje 72 hadziny z momantu zatrymańnia, paśla čaho sud pavinien pryniać rašeńnie — adpuścić na svabodu albo pryznačyć administracyjny aryšt.
