Pa sacyjalnych sietkach raspaŭsiudžvajecca zdymak fejkavaha dakumienta, jaki nibyta atrymaŭ z Centrvybarkama błohier-fiermier Juryj Hancevič.
Hancevič byŭ adzin z 15 zarehistravanych pretendentaŭ na pasadu prezidenta, ale navat nie staŭ źbirać podpisy ŭ svaju padtrymku.
Tym nie mienš adpraviŭ u Centrvybarkam zajavu: prašu zarehistravać mianie kandydatam.
Jakaja arhumientacyja ŭ Hanceviča? Pavodle artykuła 38 Kanstytucyi, hramadzianie majuć prava svabodna abirać i być abranymi ŭ dziaržaŭnyja orhany. A toje, što ŭ artykule 81 Kanstytucyi zhadvajucca niejkija 100 tysiač podpisaŭ, to heta supiarečyć mahčymaści abracca prezidentam. A značycca, maŭlaŭ, nie pieraškadžajcie mnie stać kandydatam.
Błohier dasłoŭna začytvaje svaju zajavu, trymaje dakumient u kadry. A paśla pačynaje začytvać adkaz staršyni Centrvybarkama Lidzii Jarmošynaj. Voś tolki hety adkaz jon pakazvaje litaralna na siekundu, a paśla prybiraje jaho z kamiery.
Hancevič začytvaje słovy Jarmošynaj: «Vašy patrabavańni nie supiarečać patrabavańniam Kanstytucyi. Centrvybarkam abaviazany ŭ svajoj dziejnaści kiravacca normami zakanadaŭstva i maje prava zadavolić vaša patrabavańnie…» — «Dziakuj vam, Lidzija Michajłaŭna Jarmošyna, što vy mnie dali mahčymaść paŭdzielničać u vybarach-2020!» — padsumoŭvaje Hancevič. Jon nazvaŭ svoj rolik «Mianie zarehistravali biez 100 tysiač podpisaŭ».
Adnak u realnaści ŭ tekście (tym samym, pakazanym na siekundu) paznačana, što Centrvybarkam nie maje prava zarehistravać Hanceviča kandydatam, bo jaho patrabavańnie supiarečyć Kanstytucyi.
Navošta błohieru-fiermieru było padmanvać hledačoŭ, niezrazumieła.
