Ukraina viernie pad svoj kantrol usie niepadkantrolnyja ciapier terytoryi i ludziej, jakija tam žyvuć, — hetak ža, jak u svoj čas viarnuła z pałonu ŭkrainskich marakoŭ i ich karabli. Pra heta zajaviŭ prezydent Ukrainy Ŭładzimier Zialenski, vystupajučy 5 lipienia ŭ Adesie na ŭračystaściach z nahody dnia vajskova-marskoha flotu Ŭkrainy, piša «Radyjo Svaboda».
Zialenski nahadaŭ, što 5 lipienia — šostaja hadavina pierachodu haradoŭ Słaviansk i Kramatorsk u Danieckaj vobłaści pad kantrol ukrainskich siłaŭ. U noč na 5 lipienia 2014 sa Słaviansku syšli padraździaleńni separatystaŭ, jakich padtrymlivała Rasieja i jakimi kamandavaŭ hramadzianin RF, były pałkoŭnik FSB Ihar Strałkoŭ (Hirkin).
Havoračy pra karabli, Zialenski mieŭ na ŭvazie try karabli VMF Ukrainy, zatrymanyja rasiejskimi pamiežnikami ŭ listapadzie 2018 hodu kala aneksavanaha Krymu, i ich ekipaž. Maraki viarnulisia na radzimu letaś paśla abmienu pamiž Ukrainaj i Rasiejaj, paźniej Rasieja viarnuła karabli.
«My vierniem usich našych ludziej, vierniem usie našy terytoryi. Vierniem vieru ŭ praŭdu i spraviadlivaść. My vierniem mirnuju, niepadzielnuju, mahutnuju i niepieramožnuju Ŭkrainu», — skazaŭ Zialenski.
Premjer-ministar Ukrainy Dzianis Šmyhal i ministar unutranych spraŭ Arsen Avakaŭ u hetuju hadavinu naviedali Słaviansk z ambasadarami niekatorych jeŭrapiejskich krainaŭ.
