Trahičnuju historyju raskazaŭ «Našaj Nivie» hamialčuk Alaksandr. Mužčyna za niekalki dzion zhubiŭ ažno čaćviarych svajakoŭ.
Ad karanavirusa pamierła cełaja siamja: pažyłyja baćki i ich dačka. A paśla pamior ich svajak z Rasii: ad navinaŭ z Homiela nie vytryvała serca.
«Spačatku zachvareła maja stryječnaja siastra Maryna Šyrynkina. Joj było 58 hadoŭ, — uzhadvaje Alaksandr. — Maryna była mastackim kiraŭnikom studenckaha kłuba Homielskaha dziaržaŭnaha ŭniviersiteta imia Francyska Skaryny. Kali jana zachvareła, to 8 dzion pralažała doma, jaje nie špitalizavali. Čamu — dakładna nie viedaju.
Maryna Šyrynkina
Ale paśla stan pahoršyŭsia, Marynu ŭsio ž pakłali ŭ balnicu. Dyjahnastavali pnieŭmaniju. Pakłali ŭ intensiŭnuju terapiju».
U Maryny dvoje starych baćkoŭ: Mai Abramaŭnie 79 hadoŭ, Barysu Hieorhijeviču 84 hady. Žančyna nie žyła z baćkami, ale aktyŭna im dapamahała, bo ŭ baćki daŭno byŭ Alchiejmier, a ŭ maci amputavanaja naha. Svajaki miarkujuć, što staryja padchapili «karonu» ad dački.
«U starych, zdavałasia, było adnosna mocnaje zdaroŭje, bo aboje byłyja spartoŭcy. Maja Abramaŭna pracavała 20 hadoŭ nastaŭnicaj fizkultury, paśla trenieram pa himnastycy. Jaje muž taksama raniej byŭ trenieram, — kaža Alaksandr. — Ale ž praź niekalki dzion paśla špitalizacyi Maryny ŭ balnicu zabrali i abaich jaje baćkoŭ».
Marynie Šyrynkinaj lepš nie stanaviłasia. Žančynu pieraviali ŭ reanimacyju, padklučyli da ŠVŁ.
«Testy na «karonu» Marynie i jaje baćkam rabili, virus byŭ va ŭsich traich. U Maryny byŭ dyjabiet, ale ŭ paśviedčańni ab śmierci niejak chitra sfarmulavali, što jana pamierła ad pnieŭmanii, jakuju ŭskładniŭ karanavirus.
Jaje matuli, Mai Abramaŭnie, my pra śmierć dački nie kazali: daktary zabaranili, bo staraja na toj momant sama była ŭ reanimacyi. Ale jana sama adčuvała štości. Jašče kali jaje advozili ŭ balnicu, kazała: «Bajusia, što Maryna pamre, a ja ž navat nie zmahu jaje pachavać».
Sumny prahnoz spraŭdziŭsia. U noč na 24 červienia Maryna sapraŭdy pamierła. Svajaki pachavali jaje sami.
«Praz try dni, 27 červienia, pamierła i Maja Abramaŭna.
Maja Abramaŭna Šyrynkina
U balnicy paviedamili, što ŭ žančyny było paškodžana 80% lohkich. Maŭlaŭ, z takim dyjahnazam navat nie ŭsie maładyja vyžyvajuć. Taksama daktary papiaredzili: u Barysa Hieorhijeviča šancaŭ vyžyć amal niama».
«Rodny brat Barysa, Michaił Hieorhijevič, žyŭ u Rasii, u Kursku. Michaił byŭ hadoŭ na 10 małodšy. Jany abodva hrodzienskija habrei, ale paśla los ich tak raskidaŭ. I my paviedamili Michaiłu, što pamierła Maryna i Maja Abramaŭna, što Barys u balnicy ŭ ciažkim stanie i amal biez šancaŭ… Na nastupny dzień pierazvaniŭ syn Michaiła, skazaŭ, što baćka nie vytryvaŭ navinaŭ, u jaho infarkt. A praz paru hadzin pierazvaniŭ znoŭ — Michaił Hieorhijevič pamior».
Barys Šyrynkin pratrymaŭsia daŭžej. Jon pamior 6 lipienia.
«Za niekalki dzion z Šyrynkinych faktyčna zastałosia dva čałavieki: syn Michaiła, jaki žyvie ŭ Kursku, i jašče adzin daloki svajak u ZŠA», — kaža Alaksandr.
