13 lipienia ŭ balnicy pamierła 81-hadovaja Ina Barysava, jakaja da 2019 hoda kiravała choram ruskaj pieśni imia Nikicinaj. Heta kalektyŭ, jaki z kanca 1990-ch abjadnoŭvaje rasijskich suajčyńnikaŭ u Biełarusi.
Raniej ad «karony» pamierli muž i syn Iny Barysavaj.
Ina Barysava sprava
«U ich na «karonu» zachvareła ŭsia siamja. Jany jeździli na lecišča ŭsie razam: muž, jana, troje synoŭ. I ŭsie zarazilisia niejak. Adkul — nieviadoma, — kaža Marjana Zihanšyna, jakoj u 2019 hodzie pieradała spravy choru Ina Barysava. — Starejšy syn Juryj pieranios chvarobu u adnosna lohkaj formie, a Ina Ściapanaŭna, jaje muž i ich dvoje synoŭ-bliźniataŭ z vysokaj tempieraturaj trapili ŭ balnicu».
Kala dvuch tydniaŭ tamu pamior muž 83-hadovy Michaił Barysaŭ. Jon raniej pieranios infarkt i nie zmoh vykaraskacca jašče i paśla «karony». Praź niekalki dzion pamior adzin z synoŭ, Andrej. Jamu było 56 hadoŭ.
Ina Barysava zmahałasia za žyćcio daŭžej, ale vyratavać jaje daktary nie zmahli. Apošnim časam žančyna lažała pad aparatam ŠVŁ. 13 lipienia Barysava pamierła. Praz dva tydni joj by spoŭniłasia 82 hady.
Pachavajuć Inu Barysavu ŭ zakrytaj trunie. Raźvitańnie i pachavańnie projduć 15 lipienia.
Ina Barysava z 1978 hoda pracavała ŭ Centry nacyjanalnych kultur i kiravała choram imia Nikicinaj. Chor śpiavaŭ ruskija pieśni, vystupaŭ na mierapryjemstvach kštałtu Dnia Rasii i Dnia intehracyi narodaŭ Biełarusi i Rasii. U repiertuary byli i niekalki biełaruskich piesień — naprykład, vykonvali «Mahutny Boža» i vyjhrali ź im mižnarodnyja konkursy.
