Trahiedyja zdaryłasia 13 lipienia kala miastečka Zajcava ŭ Danieckaj vobłaści Ukrainy. U toj samy dzień u miastečku zahinuŭ ukrainski vajskoviec, jaki padarvaŭsia na minie.
Dla evakuacyi zabitaha ŭkrainski bok paprasiŭ u «DNR» režym cišyni i atrymaŭ zhodu. Evakuacyjnaja hrupa była ŭ apaznavalnych biełych kaskach, adnak kali jany nablizilisia da cieła bajca, pačaŭsia abstreł. Adzin z vajskoŭcaŭ atrymaŭ ranieńnie, i tut da jaho pabieh miedyk. U hety čas bajeviki stali vykarystoŭvać hranatamioty i kulamioty. U vyniku abstrełu miedyk zahinuŭ.
Mikoła Iljin. Fota facebook.com.
Imia zahinułaha — Mikoła Iljin. Jon biełarus, rodam z Mahilova. Byŭ siabram «Zubra».
«Mikoła byŭ aktyŭnym čałaviek, prahnuŭ źmien u Biełarusi. Razam ź im my byli na Płoščy-2006, jaho tady źbili. Mieŭ u nas mianušku «Front». Jon siabravaŭ užo z taksama niabožčycaj Chryścinaj Šacikavaj, jany lubili jarkija akcyi, naprykład, prymacavać raściažku na samym vysokim budynku Mahilova. Heta byŭ vielmi ščyry chłopiec, u mianie sapraŭdny šok», — raskazvaje pravaabaronca Andrej Pałuda, jaki ŭ toj čas uznačalvaŭ mahiloŭski «Zubr».
Iljin sapraŭdy štodnia stajaŭ na Płoščy 2006 hoda. Jaho sprabavali zatrymać, kali Mikoła razam ź siabrami imknuŭsia pryvieźci na Kastryčnickuju bijatualet. Chłopca ŭdaryli pa hałavie, jon straciŭ prytomnaść.
Možna skazać, što prosta z balnicy Mikoła Iljin spačatku źjechaŭ va Ukrainu, a adtul jamu dapamahli pierajechać u Estoniju, dzie chłopiec atrymaŭ stypiendyju Fonda adkrytaj Estonii.
U Talinie Iljin pracavaŭ ekskursavodam. Vyvučyŭ anhlijskuju, estonskuju, polskuju movy. Davodziłasia jamu papracavać i taksistam, i hruzčykam, jeździŭ na zarobki ŭ Finlandyju. Mikoła nie viartaŭsia ŭ Biełaruś praz mahčymy pieraśled za kolišniuju palityčnuju dziejnaść.
U 2018 hodzie Mikoła Iljin zapisaŭsia ŭ marskija piechacincy. Pazaminułaj zimoj jon prajšoŭ čatyrochmiesiačnaje navučańnie ŭ Centry taktyčnaj miedycyny. Siabry zhadvajuć, što jon tak maryŭ trapić na toje navučańnie, što navat pastaviŭ ultymatum kiraŭnictvu: albo jaho adpraŭlajuć na vučobu, albo jon idzie sa słužby.
U vojsku jon mieŭ pazyŭny «Estoniec». Tym nie mienš Iljin nikoli nie addalaŭsia ad biełaruskaj rečaisnaści. Heta možna pabačyć pa jahonych avatarkach u sacyjalnych sietkach.
Prezident Ukrainy Uładzimir Zialenski adreahavaŭ na śmierć Iljina: «Tut nie moža być dvajnoj traktoŭki. Jość kankretnaje naŭmysnaje złačynstva — zabojstva. Usio heta lišni raz dakazvaje, što vajna praciahvajecca».
