Śledčy ekśpierymient, praviedzieny ŭ ramkach rasśledavańnia ŭ Rasii kryminalnaj spravy ab zabojstvie siamji apošniaha impieratara Mikałaja II, nie paćvierdziŭ, što cieły zabitych byli źniščanyja z dapamohaj siernaj kisłaty, paviedamiła staršy śledčy pa asabliva važnych spravach pry staršyni SK Rasii Maryna Maładcova, piša iz.ru.
U časie rasśledavańnia spravy byŭ praviedzieny šerah śledčych ekśpierymientaŭ. Tak, śledčyja ŭ pamiaškańni, padobnym pa pamierach da pakoja ŭ sklepie Ipaćjeŭskaha doma, prajhrali abstanoŭku i abstaviny rasstrełu carskaj siamji i ich blizkaha atačeńnia. Heta dazvoliła abvierhnuć dovady šerahu daśledčykaŭ ab tym, što ŭ takim maleńkim pakoi nie źmiaścilisia b 11 zabitych, a taksama ŭdzielniki rasstrełu.
«Inšy śledčy ekśpierymient źniapraŭdziŭ viersiju pra toje, što cieły zabitych źniščyli z vykarystańniem siernaj kisłaty i ahniu», — skazała Maładcova. Vyśvietlena, što siernaja kisłata zapavolvaje praces spaleńnia ciełaŭ.
Śledčaja paviedamiła, što z momantu adnaŭleńnia spravy ŭ 2015 hodzie było pryznačana 37 sudovych ekśpiertyz, u tym liku sudova-miedycynskija (antrapałahičnyja), malekularna-hienietyčnyja, trasałahičnyja i počyrkaznaŭčyja.
Na padstavie ekśpiertyz śledstva pryjšło da vysnovy, što pareštki, znojdzienyja ŭ 1979 hodzie, naležać Mikałaju II, jaho siamji i bližniamu atačeńniu. «Tym nie mienš my praciahvajem źbirać materyjały i pravodzić usie nieabchodnyja sudovyja ekśpiertyzy, kab vyklučyć najmienšyja sumnievy. Pa zakančeńni ŭsich ekśpiertyz ich vyniki buduć aceńvacca ŭ sukupnaści», - dadała jana.
Paćvierdzić, što znojdzienyja pad Jekaciarynburham pareštki naležać u tym liku Mikałaju II dazvolić 3D-madel kapieluša, jaki byŭ na im u 1891 hodzie ŭ Japonii. Tam na budučaha impieratara byŭ ździejśnieny zamach: palicejski ŭdaryŭ jaho pa hałavie šablaj. Paškodžańni na kapielušy, jaki zachoŭvajecca ŭ Ermitažy, supastaviać sa śladami rany na znojdzienym čerapie.
Mikałaj II razam sa svajoj siamjoj i nabližanymi byŭ rasstralany balšavikami ŭ Jekaciarynburhu ŭ 1918 hodzie. U 2000 hodzie Ruskaja pravasłaŭnaja carkva pryličyła carskuju siamju da liku śviatych.
