Kandydat na pasadu prezidenta Śviatłana Cichanoŭskaja razam z členami svajho štaba praciahvaje svajo turne pa haradach zachodniaj Biełarusi. Siońnia jana ŭžo naviedała Smarhoń i Maładziečna. Apošnim horadam siońnia stała 100-tysiačnaja Lida. Na mitynh tut sabrałasia bolš za 2500 čałaviek.
Mierapryjemstva raspačałosia a 19:00 na płoščy kala Handlovaha centra «Patsdam», vulica Lotnaja. Pad sustreču ŭłady vydzielili nie samaje zručnaje miesca dla masavych mierapryjemstvaŭ.
Idzie doždž. Na sustrečy šmat simvoliki, u pieršuju čarhu nacyjanalnaj.
«Vierym, možam, pieramožam!» — skandujuć ludzi.
Karespandent NN paviedamlaje, što akramia biełaruskich ściahoŭ jość jašče niekalki polskich. Lida — adzin z centraŭ pražyvańnia polskaj mienšaści.
Udzielniki mitynhu ciopła, z krykami «Małajčyna!» sustreli zvolnienaha lidskaha fielčara.
Cichanoŭskaja źjaviłasia na placoŭcy ŭ 19:50 pad pieśniu «Mury». Pamyłkova kryknuła: «Nu pryvitańnie, Słuck!» Ludzi adreahavali na hety kanfuz z razumieńniem i śmiecham.
Cichanoŭskaja pačała svaju pramovu sa słoŭ salidarnaści z palitviaźniami.
Potym jana tradycyjna źviarnułasia da piensijanieraŭ: «Piensiju vam płacić nie prezident. Piensiju płaciać vašy dzieci i ŭnuki, piensiju vy zarabili svajoj pracaj».
Adna z žančyn paprasiła paabiacać, što viarnuć nacyjanalnuju simvoliku.
«Paabiacajcie, paabiacajcie», — skazała jana padčas vystupleńnia Maryi Kaleśnikavaj.
Kaleśnikava paabiacała, što budzie viernutaja Kanstytucyja 1994 hoda i buduć praviedzieny novyja sumlennyja vybary.
Na mitynhu vidać taksama ściah desantnikaŭ i ściah ES. Niechta padniaŭ navat ściah Rasii.
Vystupy Maryny Kaleśnikavaj i Vieraniki Capkała praktyčna nie adroźnivalisia ad papiarednich ich vystupaŭ u inšych haradach.
Bližej da 21:00 pad pieśniu «Mury» Cichanoŭskaja razam sa svaim štabam pačała raźvitvacca z haradžanami.
Cichanoŭskaja skazała, što Lida stała dla jaje asablivym horadam, pakolki zvolnieny lidski fielčar, jakomu ŭsioj krainaj sabrali hrošy, staŭ simvałam salidarnaści biełarusaŭ.
A 21-j hadzinie ludzi pačali razychodzicca, mitynh zaviaršyŭsia.
A voś niekalki kadraŭ z Maładziečna i Smarhoni: