Milicyja pryjšła ź pieratrusam da aktyvistki Julii Barsukovaj 8 žniŭnia 2020 u Viciebsku
Minsk
Kala 7 hadzin ranicy ŭ dom da aktyvistki «Jeŭrapiejskaj Biełarusi» Volhi Nikałajčyk łomiacca supracoŭniki milicyi. Pra heta paviedamlaje Nasta Palijenka ŭ svaim Fejsbuku. Vierahodna, Volhu Nikałajčyk chočuć zakryć dla adbyćcia administracyjnaha aryštu, što joj byŭ pryznačany raniej sudom. Milicyjaniery prychodzili da žančyny i ŭčora - 7 žniŭnia.
Kiraŭnik Partyi BNF Ryhor Kastusioŭ paviedamiŭ, što jašče ŭčora kala 19 hadzin byŭ zatrymany siabra sojmu BNF Juraś Mielaškievič i jašče dva čałavieki (proźviščy ŭdakładniajucca). Juraś paśpieŭ patelefanavać svajmu baćku i skazać pra ich zatrymańnie, paśla čaho telefon u jaho adabrali milicyjaniery. Da suda, jaki mierkavana adbudziecca ŭ paniadziełak, Juraś Mielaškievič budzie ŭtrymlivacca ŭ Centry izalacyi pravaparušalnikaŭ.
Volhu Surkovu zatrymali ŭviečary 7 žniŭnia ŭ Minsku za raspaŭsiud ulotak. Jana była dastaŭlenaja ŭ Frunzienski RUUS.
Nočču z 7 na 8 žniŭnia ź Biełarusi vysłali žurnalistaŭ «Nastojaŝieho vriemieni» Irynu Ramalijskuju, Ivana Hrabianiuka i Juryja Baraniuka. Ich abvinavacili ŭ parušeńni zakanadaŭstva ab ŚMI — pracu ŭ Biełarusi biez akredytacyi. Ujezd u Biełaruś ciapier zabaronieny im na 10 hod.
Kala doma za rasklejku abviestak byŭ zatrymany Jaŭhien Jermačonak u Zavodskim rajonie stalicy. Taksama za raspaŭsiud ulotak była zatrymanaja Volha Jelisiejeva ŭ Frunzienskim rajonie.
U subotu 8 žniŭnia pa miescy žycharstva aktyvista anarchisckaha ruchu Mikoły Dziadka prybyŭ AMAP. Słužboŭcy ŭvarvalisia ŭ žytło i učynili pieratrus, paviedamlaje «Novy čas». Jak stała viadoma «Viaśnie», na vobšuk pryjšło šeść čałaviek u maskach. Mikoły ŭ toj čas u kvatery nie było. Pa vynikach vobšuku zabrali dva kamputary i telefon. Vobšuk pravodziŭsia ŭ miežach kryminalnaj spravy. Padrabiaznaści spravy ŭdakładniajucca.
U CIP na Akreścina siońnia ranicaj byŭ dastaŭleny Jaŭhien Katulski. Jon paśpieŭ paviedamić žoncy adnaho z aryštantaŭ, jakaja pryniesła pieradaču mužu, što na jaho składzienyja pratakoły pa art. 9.3 («Abraza») i 23.4 KaAP («Niepadparadkavańnie słužbovaj asobie»).
U CIP znachodzicca i Ivan Sałahub, jaki ŭčora jechaŭ na mašynie, sihnaliŭ i trymaŭ ruku ŭ aknie ź biełaj stužkaj. Mašynu mužčyny kanfiskavali.
Taksama «Viaśnie» viadoma, što kala 12 hadzin nočy byŭ zatrymany Arciom Fiedarenka. Jon taksama sihnaliŭ, kali jechaŭ na mašynie ŭ centry horada. Mužčynu dastavili ŭ Leninski RUUS. Dzie zaraz znachodzicca Arciom Fiedarenka dakładna nieviadoma.
U 17.20 zatrymanaja kiraŭnica štaba Śviatłany Cichanoŭskaj Maryja Maroz. Jaje advieźli ŭ CIP
Jak paviedamlajuć aktyvisty «Maładoha Frontu», ź viečara 7 žniŭnia na suviaź nie vychodzić sakratar arhanizacyi Maksim Urbanovič. Vierahodna jon byŭ zatrymany. Kiraŭnik «Maładoha Frontu» Dzianis Urbanovič znachodzicca ŭ «błakadzie»: druhija sutki kala miesca jaho znachodžańnia dziažurać mikraaŭtobusy z AMAPam i supracoŭnikami ŭ cyvilnym.
Maryna Adamovič, žonka palityka i palitviaźnia Mikoły Statkieviča, napisała ŭ siabie na staroncy ŭ Fejsbuku, što siońnia da jaje pryjazdžali milicyjaniery, jakija papiaredzili jaje pra niedapuščalnaść arhanizacyi i ŭdziełu ŭ masavych biesparadkach.
Na 98-ym učastku Frunzienskaha rajona ŭ Minsku zatrymany vybarščyk Andrej Kažemaks. Jon fatahrafavaŭ pratakoł jaŭki vybarščykaŭ za 8 žniŭnia.
Ihar Muraška byŭ zatrymany za raspaŭsiud ahitacyjnych materyjałaŭ alternatyŭnych kandydataŭ u prezidenty.
Baranavičy
U Baranavičach jašče 7 žniŭnia byŭ zatrymany błohier youtube-kanała «Kropka niezvarotu» Jury Čudzinovič.
U ahrasiadzibie davieranaj asoby Śviatłany Cichanoŭskaj Tamary Patockaj adbyvajecca pieratrus. Dzie sama žančyna - nieviadoma. Jaje dačka paviedamiła, što «maci nidzie niama».
Homiel
Ranicaj 8 žniŭnia ŭ Homieli zatrymany Valery Śmiajan.
Žonka Alaksieja Žułajeva paviedamlaje, što nie moža źviazacca ź im. Jana miarkuje, što muža zatrymali.
Kala 9.30 hadzin supracoŭniki milicyi dla raźbiralnictva pa fakcie źjaŭleńnia na asfalcie malunkaŭ z nadpisam «Stop tarakan» pavieźli z chaty Jaŭhiena Ščura. Pra heta chłopiec paśpieŭ paviedamić pravaabaroncu Leanidu Sudalenku.
Źnik Uładzimir Małajeŭ. Jon pajšoŭ na pracu i pierastaŭ vychodzić na suviaź. Da hetaha jon chadziŭ na ahitacyjnyja mitynhi kandydatki Śviatłany Cichanoŭskaj.
Zatrymali Taćcianu Kanieŭskuju, aktyvistku inicyjatyvy «Maci 328», jaje dastavili ŭ IČU. Chutčej za ŭsio, u paniadziełak adbudziecca sud.
U h.p. Akciabrski Homielskaj vobłaści byŭ zatrymany Maksim Małakovič i jašče adzin chłopiec, jakija stajali ŭ pikiecie ŭ padtrymku asudžanaha na 15 sutak aryštu błohiera «Rudabielskaj pakazuchi» Andreja Pavuka.
Ašmiany
Uviečary 7 žniŭnia na ŭjeździe ŭ Ašmiany supracoŭnikami DAI byŭ zatrymany Dzianis Rymašeŭski. Jak paviedamiŭ jaho baćka, Dzianis viartaŭsia dadomu ź Minska na aŭtamabili, na jakim razvozić pradukty charčavańnia. U miascovym RAUS baćku zatrymanaha paviedamili, što na jaho syna składzieny pratakoł ab administracyjnym pravaparušeńni. Da suda jon budzie ŭtrymlivacca za kratami.
Śvietłahorsk
PC «Viasna» stała viadoma, što pad padjezdam u Vadzima Pavietki dziažurać supracoŭniki milicyi.
Kareličy
Kaciaryna Kasabuckaja paviedamiła «Viaśnie», što siońnia ranicaj u jaje doma byŭ praviedzieny vobšuk. Ciapier jaje samu milicyjaniery chočuć zabrać jak śviedku pa niejkaj kryminalnaj spravie. Raniej byŭ zatrymany jaje muž Alaksandr Kamisaraŭ, jakoha adpravili pad aryšt na 12 sutak.
Jašče z ranicy ŭ vioscy pad Kareličami byŭ zatrymany Viktar Jaŭsiej. Jon raniej vystupaŭ na pikiecie za Śviatłanu Cichanoŭskuju. Dahetul rodnyja nie mohuć vyśvietlić, dzie jon znachodzicca.
Viciebsk
Jak paviedamlaje Iryna Traćciakova, na aktyvistku i administratarku telehram-kanała «Kraina dla žyćcia» ź Viciebska Juliju Barsukovu ŭzbudžanaja kryminalnaja sprava pa č. 1 art. 342 Kryminalnaha kodeksa. Zaraz doma ŭ aktyvistki adbyvajecca pieratrus. U Julii Barsukovaj zabrali dva sistemnyja błoki, čatyry telefony i roznyja dakumienty. Jana ŭ statusie padazravanaj była dastaŭlenaja na dopyt u Kastryčnicki RAUS horada Viciebska.
Kobryn
Milicyja paluje na administratara kanała «Kobryn dla žyćcia» Ryhora Hnaciuka. Siabra aktyvista paviedamiŭ «Viaśnie», što da jaho prychodzili supracoŭniki milicyi ŭ cyvilnym i sprabavali patrapiŭ u dom u pošukach Ryhora. Taksama Hnaciuka šukali i ŭ svajakoŭ.
Vilejka
Siabra Andreja Kudzika paviedamiŭ, što druhija ci trecija sutki aktyvist znachodzicca ŭ Vilejskim IČU. Raniej sud vynies jamu pakarańnie ŭ vyhladzie administracyjnaha aryštu terminam 15 sutak za ŭdzieł u sustrečy ź Siarhiejem Cichanoŭskim.
Pinsk
U Pinsku byŭ zatrymany Valeryj Ramanovič. Jon źjaŭlajecca davieranaj asobaj Śviatłany Cichanoŭskaj.
Hrodna
U Hrodnie kala mahazina «Dyjanis» supracoŭnikami ŭ cyvilnym byŭ zatrymany Pavieł Piatruša. Mužčynu źvieźli ŭ nieviadomym nakirunku.
Brest
U 12 hadzin žonka Jaŭhiena Tarhonskaha paviedamiła pravaabaroncam, što mužčynu zabrali z chaty. Za što - dakładna nieviadoma. Paźniej žonka zatrymanaha paviedamiła, što Jaŭhien Tarhonski budzie pad vartaj da suda ŭ IČU Leninskaha RAŬS h. Bresta.
Na pamiežnym pierachodzie ŭ Breście ŭ 14:00 zatrymany ekaaktyvist Pavieł Kinčak. Jon pracuje dalnabojščykam. Padstavu zatrymańnia - nie paviedamili.
Pravaabaroncam «Viasny» stała viadoma, što 7 žniŭnia kala 18:00 pa-za miežami Bresta zatrymali Arsienija Siniaka z baćkam Jaŭhienam. 14 lipienia Arsienij byŭ zatrymany padčas akcyi padtrymki niezarehistravanych kandydataŭ i vyjšaŭ ź IČU tolki 1 žniŭnia paśla adbyćcia 18 sutak aryštu. Baćka vyviez syna «padalej ad palityki» i ŭčora taksama papaŭ pad «razdaču». Abodva znachodziacca pad vartaj da suda u IČU Leninskaha RAŬS h. Bresta.
Maładziečna
Aktyvist Alaksiej Vajciachovič byŭ zatrymany siońnia dla adbyćcia pazastałych 3,5 sutak administracyjnaha aryštu. Taksama dla adbyćcia raniej pryznačanaha aryštu zatrymany Jaŭhien Traćciak.
Mahiloŭ
U 19.10 zatrymany Źmicier Sałaŭjoŭ, redaktar sajta 6tv.by i namieśnik staršyni abłasnoj arhanizacyi Partyi BNF. Jaho spynili nibyta praz toje, što mašyna znachodzicca ŭ zhonie. Zaraz Źmicier Sałaŭjoŭ znachodzicca ŭ Leninskim RAUS Mahilova. Mužčynu abvinavacili ŭ niepadparadkavańni milicyi, jon abjaviŭ haładoŭku.
U 20.20 aktyvist štaba Valeryja Capkały Sierhiej Łapucin paviedamiŭ pravaabaroncam, što jaho razam z žonkaj Aksanaj Zakreŭskaj i małaletni dziciom zatrymali i viazuć u RAUS Leninskaha rajona. Padstavaj: na mašynie byŭ raźmieščany bieła-čyrvona-bieły ściažok, tamu ŭźnikła padazreńnie, što mašyna ŭ zhonie. Paźniej žonku i dzicionka Łapucina adpuścili z RAUS, na mužčynu skłali pratakoł za niepadparadkavańnie i adpuścili da suda. Mašynu siamji zatrymali na try tydni dla pravierki.
Barysaŭ
Dźmitryj Šuvałaŭ razam z žonkaj Marynaj pryjšli na futbolny stadyjon pahladzieć matč. Kali jany prachodzili kantrol, na mužčynu ŭkazali, paśla čaho zatrymali.
Navapołack
Kala 20 hadzin viečara Dźmitryja Ryžyčenku zabrali supracoŭniki milicyi prama z pracy na razmovu ŭ Navapołacki HAUS.
U Połacku zatrymany siabra BCHD Hienadź Bierdzijeŭ. Supracoŭniki milicyi zabrali mužčynu z domu i advieźli ŭ RAUS.
Babrujsk
Supracoŭnikami milicyi zatrymanaja kaardynatarka nazirańnia ad «Prava vybaru», aktyvistka prafsajuza REP Halina Śmirnova. Spačatku žančyna pierastała vychodzić na suviaź, ciapier vyśvietliłasia, što jana znachodzicca va UUS Babrujskaha harvykankama.
Navahrudak
Kala 20 hadzin zatrymali Rusłana Drobyša i Irynu Drobyš-Łazaravu pa darozie na voziera kala sanatoryja Radon, što niedaloka ad Navahrudka. Jany jechali tudy na asabistym aŭtamabili.
Mazyr
Kala 13.00 ŭ Mazyry zatrymali aŭtara YouTube i telehram-kanałaŭ «Mozyŕ dla žiźni» Alaksandra Cukanava, paviedamlaje «Paleskaja Viasna». Majecca infarmacyja, što ŭčora jamu telefanavali z kryminalnaha vyšuku i zaprašali pryjści ŭ milicyju «pahutaryć». Alaksandr admoviŭsia.
8 žniŭnia ŭ kvateru, dzie znachodziŭsia aktyvist, hrukalisia nieviadomyja. Potym u joj adklučyli elektryčnaść. Prykładna z 18-j hadziny suviaź z Alaksandram źnikła. A 19-j hadzinie stała viadoma, što Alaksandr Cukanaŭ zatrymany i znachodzicca ŭ izalatary časovaha ŭtrymańnia Mazyrskaha RAUS.
Viečaram 7 i 8 žniŭnia ŭ Minsku prajšli akcyi salidarnaści z zatrymanymi. Pa vynikach byli zatrymanyja niekalki dziasiatkaŭ čałaviek, u tym liku ravarysty.
1. Uładzisłaŭ Łakuteš (U CIP na Akreścina da suda ŭ Centralnym RAUS)
2. Kaciaryna Łastoŭskaja
3. Julija Hahulina
4. Raman Žarabcoŭ (Kastryčnicki RUUS)
5. Kanstancin Burdo (u IČU na Akreścina da suda)
6. Siarhiej Hiert (u IČU na Akreścina da suda)
7. Illa Vadałazkin (U CIP na Akreścina da suda ŭ Centralnym RAUS)
8. Alaksandr Alaksandraŭ (znachodzicca ŭ balnicy)
9. Dźmitryj Kavaloŭ
10.Dzianis Dubaŭcaŭ (ciapier jon na Akreścina. Sud u paniadziełak u Kastryčnickim RAUS)
11. Daryna Reŭt (abvinavačvajuć pa artykułach 17.1 i 23.4. Sud u paniadziełak u Kastryčnickim RAUS)
12. Marta-Daryja Klinava (abvinavačvajuć pa artykułach 17.1 i 23.4. Sud u paniadziełak u Kastryčnickim RAUS)
13. Alaksiej Kryłoŭ (abvinavačvajuć pa artykułach 17.1 i 23.4. Sud u paniadziełak u Kastryčnickim RAUS)
14. Alaksandr Słoŭšč (abvinavačvajuć pa artykułach 17.1 i 23.4. Sud u paniadziełak u Kastryčnickim RAUS)
15.Anton Baruška (zatrymany razam ź viełasipiedam)
16. Ivan Vajciulevič - zatrymany kala Cyrka, nibyta jość prablemy z techahladam aŭtamabila, dastaŭleny ŭ RAUS.
17. Hienadź Samajluk
18. Mikita Hračoŭ
19. Mikałaj Sotnikaŭ (niepaŭnaletni)
20 Rusłan Zholič
21. Albiert Kienhierli - zatrymany kala mietro Kastryčnickaja.
22. Artur Rajski - zatrymany kala mietro Kastryčnickaja.
23. Maksim Šukajłaŭ - zatrymany na vuł. Kastryčnickaj. Byŭ na rovary. 6 amapaŭcaŭ źbili pry zatrymańni.
24. Andrej Hrabko
25. Juryj Baradzin
26. Alaksiej Žydki - sihnaliŭ na mašynie, spynili kala cyrku, zatrymali.
27. Mikałaj Čyž - jechaŭ sa ściaham u mašynie, zatrymali. Zaraz u RUUS Centralnaha rajona.
28. Ściapan Ivanoŭ - zatrymany kala płoščy Pieramohi
29 Siarhiej Dubroŭski
30 Alaksandr Hryščankoŭ
31. Rusłan Kadłubovič
32 Illa Špakoŭski
33. Raman Leanovič
