Siońnia, 21 žniŭnia, 302 rabotniki ZAT «Maładziečnamebla» padpisali zvarot da staršyni Maładziečanskaha rajvykankama Juryja Horłava. Siońnia na pradpryjemstvie pracavała 410 čałaviek.
«My, rabotniki ZAT «Maładziečnamebla», vielmi zaniepakojeny palityčnaj situacyjaj u našaj krainie, žadajem chutčejšaha vyrašeńnia kanfliktu, ustanaŭleńnia miru, spraviadlivaści, vykanańnia zakanadaŭstva; dla hetaha patrabujem vykanańnia nastupnaha:
- Pryznać niesapraŭdnymi vyniki vybaraŭ 9 žniŭnia 2020 hoda ŭ suviazi ź vialikaj kolkaściu parušeńniaŭ, dapuščanych na ŭsich etapach vybarčaj kampanii.
- Pravieści demakratyčnyja vybary prezidenta Respubliki Biełaruś, vyklučajučy fakty falsifikacyi, pry ŭdziele naziralnikaŭ ad pracoŭnych kalektyvaŭ i pradstaŭnikoŭ mižnarodnych arhanizacyj.
- Vyzvalić zatrymanych na akcyjach pratestu i palitźniavolenych, źniaŭščy ŭsie abvinavačvańni.
- Spynić pieraśled udzielnikaŭ mirnych akcyj pratestu siłavymi strukturami, nie dapuścić prymianieńnia roznych sankcyj da rabotnikaŭ, jakija vyražajuć svaje palityčnyja pohlady.
- Aśviatlać u ŚMI realnyja padziei ŭ krainie.
- Pryciahnuć da adkaznaści asob, jakija majuć dačynieńnie da zatrymańnia mirnych hramadzian i ździekaŭ z zatrymanych».
Zvarot ad pradpryjemstva prynios supracoŭnik Uładzimir Stanievič:
— Zvarot padpisała vialikaja častka našych supracoŭnikaŭ. Z tych, chto pracavaŭ siońnia, heta 73,7%, — kaža Uładzimir. — Ludzi stajali ŭ čarzie, kab padpisacca. U mianie časam pytajucca, ci nie bajusia ja nastupstvaŭ za toje, što adkryta vykazvaju svaju pazicyju. Tak, u mianie maleńkaja ŭnučka. Mnie chaciełasia ciešycca b ź jaje, hadavać jaje. Ale i hladzieć na toje, što adbyvajecca, ja spakojna nie mahu, — padzialiŭsia Uładzimir.
Pakul Uładzimir Stanievič i člen inicyjatyŭnaj hrupy Alaksandr Badzin stajali na hanku rajvykankama, ź jaho vyjšaŭ staršynia Jury Horłaŭ. Mužčyny źviarnulisia da staršyni, ale adkazu nie atrymali.
U rajvykankamie supracoŭnica pryniała zvarot. Skazała pačakać, pakul dakumient zarehistrujuć.
Jak raskazaŭ žurnalistu Uładzimir Stanievič, rabotniki vykankama patłumačyli, što ŭ afarmleńni dakumienta jość peŭnyja niedakładnaści. Tamu pryniać zvarot mohuć tolki jak ad fizičnaj asoby. Uładzimir paraiŭsia z kiraŭnikom pradpryjemstva i jurystam i padaŭ zvarot ad siabie asabista. U vykankamie paviedamili, što adkaz daduć na praciahu miesiaca.
