«Biełaruś pieražyvaje vostry palityčny kryzis. Jaho pryčyna — falsifikacyja vybaraŭ, — piša Śviatłana Cichanoŭskaja ŭ svaim zvarocie. — Kali b hałasy vybarščykaŭ byli padličanyja sumlenna, nie było b nijakaj niezadavolenaści ludziej. Biełarusaŭ aburyła toje, što paśla niesumlennych vybaraŭ pieramožcam byŭ abvieščany były prezident Alaksandr Łukašenka, jakomu narod admoviŭ u daviery i padtrymcy. Łukašenka ŭžo nie zmoža kiravać krainaj, bo ludzi patrabujuć, kab jon syšoŭ. Jaho bolš nie pavažajuć, ź jaho śmiajucca, a jon čaplajecca za ŭładu.
Kaardynacyjnaja rada vystupaje za ŭrehulavańnie palityčnaha kryzisu ŭ Biełarusi šlacham pieramoŭ i praviadzieńnie novych sumlennych vybaraŭ. Ale zamiest pošuku dyjałohu administracyja adychodziačaha prezidenta zajmajecca drobiaznymi abvinavačvańniami i pieraśledami. Heta śviedčyć ab adsutnaści ŭ čynoŭnikaŭ i sudździaŭ dziaržaŭnaha myśleńnia. Treba dumać u pieršuju čarhu ab intaresach krainy, a nie ab intaresach taho, chto pavinien syści na patrabavańnie naroda. Nijakija represii nie buduć pryniatyja našym hramadstvam. Nijakija sproby ŭtrymańnia ŭłady nie dapamohuć paźbiehnuć adkaznaści za represii.
Kaardynacyjnaja rada pradstaŭlaje intaresy bolšaści biełarusaŭ. I naša imknieńnie da pieramien macniejšaje za vaš strach. Ja zaklikaju pravaachoŭnikaŭ nieadkładna spynić cisk na siabroŭ Kaardynacyjnaj rady i vyzvalić Volhu Kavalkovu i Siarhieja Dyleŭskaha. Nie sprabujcie zapałochać nas i sami nie bojciesia iści na adkryty dyjałoh z narodam, da jakoha zaklikaje Kaardynacyjnaja rada!» — zaklikała Cichanoŭskaja.
