Situacyja z karanavirusam u Biełarusi bolš surjoznaja, čym pry pieršaj chvali, pakul nazirajecca štodzionny pryrost kolkaści tych, chto zachvareŭ, ale ekśpierty spadziajucca, što jon spynicca da Novaha hoda, a mahčyma, pa niekatorych rehijonach i raniej, zajaviŭ u intervju «Biełaruś 1» hałoŭny sanitarny doktar Alaksandr Tarasienka, piša Tut.by.
U pryvatnaści, u Minskaj vobłaści ŭžo jość rehijony, dzie rostu kolkaści chvorych niama, adznačyŭ Tarasienka.
— Spadziajemsia, u cełym pa respublicy ŭ śniežni ci navat studzieni vyjdziem na płato, — skazaŭ jon, dadaŭšy, što epidsiezon zachvorvańnia na hryp u nas čakajecca ŭ studzieni-lutym. Tak što surjoznaje źnižeńnie zachvorvańnia čakajecca tolki da viasny.
— I navat bližej da leta, — udakładniŭ jon. — Situacyja surjoznaja, ale kantralavanaja.
Hałoŭny sanitarny doktar taksama prakamientavaŭ rašeńnie ab uviadzieńni ŭ mnohich rehijonach krainy i ŭ Minsku abaviazkovaha masačnaha režymu. Jon rastłumačyŭ, što pakul adkaznaści za parušeńnie režymu nie praduhledžana.
— Idzie aktyŭnaje infarmavańnie žycharoŭ, kab u ich uklučaŭsia instynkt samazachavańnia, — raspavioŭ Tarasienka, udakładniŭšy, što pakul pojduć pa šlachu cisku na samaśviadomaść ludziej.
Jon taksama raspavioŭ ab chodzie daśledavańniaŭ rasijskaj vakcyny ad COVID-19 «Spadarožnik V».
— Daśledavańni pa vakcynie jašče iduć, kali budzie zavieršany vyprabavańni, tady možna budzie z upeŭnienaściu skazać, ci paśpiachovyja jany. Pakul nijakich prablem siarod tych, kamu jana ŭviedziena, nie adznačałasia, jany adčuvajuć siabie narmalna, — udakładniŭ Tarasienka.
U Biełarusi raźličvajuć, što ŭ 2021 hodzie vakcynu atrymajuć u pieršuju čarhu miedrabotniki, piedahohi i siłaviki.
Raźličvajuć nie mienš čym na 1,8-2 młn doz.
