21 hod.
Historyja pačałasia ŭ 1999 hodzie. Kali ja, student 4 kursa mieduniviera, pryjšoŭ u adździeł kadraŭ 7 haradskoj kliničnaj balnicy ŭładkoŭvacca na pasadu miedsiastry ŭ volny ad vučoby čas (na načnyja dziažurstvy). Chaciełasia być bližej da kliničnaj miedycyny, adčuć jaje atmaśfieru ŭsim arhanizmam. Mnie adrazu skazali: «Schadzi ŭ reanimacyju novanarodžanych — tam zaŭždy treba ludzi». Ja mała viedaŭ pra novanarodžanych, vučyŭsia na lačebnym fakultecie (tady nie było piedyjatryčnaha) i rychtavaŭsia być niejrachirurham. Tady ja jašče nie zdahadvaŭsia, što pryjšoŭ u miesca, dzie znajdu siabie.
Siastrynskaja praca ŭ reanimacyi składanaja. Zaŭždy vialikaja nahruzka, vydatnaja treniroŭka ŭvahi, chutkaści reakcyi i multyzadačnaści. Mnohija doŭha nie vytrymlivajuć, tamu mnie skazali, što zaŭždy patrebnyja rabotniki.
Pastupova ja zrazumieŭ, u jakoje niezvyčajnaje miesca patrapiŭ — miesca, dzie ludzi ŭ litaralnym sensie addajuć svaje siły i enierhiju dla žyćcia inšych — mienšych i słabiejšych. I palubiŭ hetuju pracu i ludziej.
U 2001 ja atrymaŭ dypłom i staŭ lekaram ŭ reanimacyi novanarodžanych. Nieŭzabavie špital pieratvaryŭsia ŭ respublikanski navukova-praktyčny centr «Maci i dzicia». Ja vielmi ŭdziačny svaim nastaŭnikam: najpierš zahadčycy adździaleńnia Aksanie Jakaŭleŭnie Śvirskaj. Heta maja mama ŭ prafiesii. Jana dapamahła mnie i mnohim vyraści z učarašnich studentaŭ u śpiecyjalistaŭ. A taksama ŭdziačny inšym starejšym kaleham — ich šmat, ja bajusia kaho-niebudź nie nazvać.
Pastupova ja zrazumieŭ, što trapiŭ u samuju dynamičnuju halinu piedyjatryi. Sapraŭdnaje ščaście — nazirać i ŭdzielničać u jaje prahresie ŭ Śviecie i Biełarusi. Być častkaj kamandy, jakaja ŭparta pracuje nad tym, kab bolš dziaciej vyžyvali i raśli zdarovymi. Bačyć pośpiechi i niaŭdačy hetaj kamandy, hanarycca dasiahnieńniami i pracavać nad pamyłkami, kab rabić lepšymi vyniki našaj dziejnaści.
Nievierahodnaje adčuvańnie — z radaściu iści na pracu i radasna viartacca dadomu.
Ja skončyŭ aśpiranturu dla taho, kab adkazać na pytańnie, jak my lepš možam papiaredzić ciažkija krovaźlićci hałaŭnoha mozha ŭ hłybokaniedanošanych dziaciej — patałohii, jakaja za chviliny mianiaje žyćcio samoha dziciaci, dajučy jamu invalidnaść, i mianiaje žyćcio jahonaj siamji. Taksama imknuŭsia pastajanna vučycca ŭ svaich kaleh suśvietnaha ŭzroŭniu, kab być nie horš za ich, bo našyja dzieci hetaha vartyja, a my na heta zdolnyja.
Bolš za ŭsio ad majho žyćciovaha vybaru dastałasia majoj siamji — zarobki lekara-reanimatołaha zaŭždy byli ścipłymi. U žyćci ja mieŭ niekalki raźviłak, kab vybrać bolš prybytkovy zaniatak, nie źviazany ź miedycynaj. Ale ja ŭparta viartaŭsia nazad - u reanimacyju novanarodžanych RNPC «Maci i dzicia». Bo tam moj byŭ dom, majo paklikańnie.
Siońnia ja daviedaŭsia, što praź miesiac mianie tam nie budzie.
Načalnik adździeła kadraŭ pryjšła sama a 7-aj ranicy da mianie na dziažurstva, kab samastojna ŭručyć mnie «uviedomlenije». Jaje pieradusim cikaviŭ moj podpis (uručyć musiać za miesiac da kanca kantrakta). Atrymała podpis i źbiehła biez tłumačeńniaŭ i razmoŭ. Potym z pošty ja zabraŭ zakazny list, dzie taksama było «uviedomlenije». Na tuju ž temu, ale ź inšym podpisam (adno padpisaŭ dyrektar, a druhoje jaho namieśnik). Ja pa zmoŭčańni liču ludziej dobrymi i starajusia ich razumieć. Ale čamu nie patłumačyć pryčyny razryvu pracoŭnych adnosin śpiecyjalistu, jaki 21 hod žyćcia addaŭ špitalu, jakim vy kirujecie, ja nie mahu zrazumieć. Vierahodna tamu, što nie chaču kab pryncyp «vy žie sami vsio ponimajetie», viartaŭsia ŭ našaje žyćcio. Bo za im hnijeńnie, razbureńnie i śmierć.
Zaraz adkryty dla prapanoŭ pracy. Chaču tolki spakojna sustreć Kalady z rodnymi. Upieršyniu za šmat hod bieź niedasypu paśla dziažurstvaŭ.
Šmat čaho ŭmieju. Dobra raźbirajusia ŭ miedycynie, umieju zrazumieła tłumačyć roznyja jaje aśpiekty. Pišu dobryja prafiesijnyja teksty. Vałodaju anhielskaj, polskaj i krychu niamieckaj. Nie źbirajusia spyniacca ŭ pracy na karyść śviatła, dabra, praŭdy i spraviadlivaści. Tamu što heta moj abaviazak. Jak doktara i čałavieka. Vialiki dziakuj za salidarnaść i padtrymku!
