Paśla troch miesiacaŭ źniavoleńnia ŭviečary 1 śniežnia z-pad varty vyzvalili palitviaźnia Aleha Mazhova, fihuranta spravy pa artykule 293 Kryminalnaha kodeksa («Masavyja biesparadki»), paviedamlajuć pravaabaroncy.
Adnak Mazhoŭ zastajecca padazravanym pa kryminalnaj spravie. Jamu abranaja miera strymańnia ŭ vyhladzie padpiski ab niavyjeździe.
Alehu — 25 hadoŭ, da zatrymańnia pracavaŭ u Minsku fitnies-trenieram, zajmaŭsia boksam. Da aryštu Aleh uładkavaŭsia na druhuju pracu hruzčykam, kab zrabić doma ramont i padrychtavacca da naradžeńnia dziciaci.
Jak raspaviadała žonka, raniej Aleh nie zajmaŭsia hramadskim aktyvizmam, a 9 žniŭnia jon vyjšaŭ na vulicy Minska ŭ znak niazhody z vynikami vybarami, a praz try tydni paśla hetaha jaho zatrymali supracoŭniki milicyi.
«Zatrymali Aleha 1-ha vieraśnia naŭprost na pracy. Doma ja była adna, spała. Mianie abudzili i padmanam prymusili adčynić dźviery. Kali adkryła, to adšturchnuli ad dźviarej i pačali pieravaročvać kvateru. Zabrali ŭsiu techniku: noŭtbuk i płanšet. Ich da hetaha času nie viarnuli», — raskazvała jana.
17 vieraśnia biełaruskaja pravaabarončaja supolnaść pryznała Aleha Mazhova palityčnym viaźniem.
