Dziaržaŭnyja ŚMI abvieścili ab chutkim apublikavańni niejkaha rasśledavańnia, pryśviečanaha «dziejnaści terarystyčnaj hrupy». U teleanonsach śćviardžajecca, što na hetaj hrupie adkaznaść za padpały ŭ Hrodnienskaj vobłaści.
Miarkujučy pa ŭsim, sprava rasśledujecca pa artykule 289 — «Akt teraryzmu». Dakładny śpis padazravanych pakul nieviadomy.
Ale «Našaj Nivie» ŭžo viadoma asoba prynamsi adnaho imaviernaha padazravanaha — heta žychar Hrodna Alaksandr Kazimiravič Kraśnicki.
Jaho zatrymali ci to treciaha, ci to čaćviortaha listapada za padpał dźviarej «punkta achovy pravaparadku» ŭ Hrodnie. Ale tady Śledčy kamitet kvalifikavaŭ jaho dziejańni nie jak teraryzm, a jak «złosnaje chulihanstva» — č. 3 art. 339 Kryminalnaha Kodeksa. Imavierna, spravu pierakvalifikavali.
Što viadoma pra Kraśnickaha?
Mužčynu 41 hod, jon hrodzieniec. Z žonkaj u razvodzie, maje 14-hadovaha syna.
Pra jaho nam raskazała jaho maci, Ramualda Alaksandraŭna.
Sa słovaŭ mamy, historyja pačałasia jašče ŭ 2018-m hodzie. Tady Kraśnicki nibyta staŭ achviaraj napadzieńnia, ale «mieŭ pry sabie nož i adbivaŭsia». Milicejski narad razahnaŭ bojku i zatrymaŭ niekalkich udzielnikaŭ.
Ale, maŭlaŭ, pavodle śviedčańniaŭ patrulnych zaviali kryminalnuju spravu. Kraśnickaha pryznali vinavatym i dali jamu chatniuju chimiju.
Pa jaje ŭmovach zabaroniena pić ałkahol.
«Ale niejak sieli za stoł, jon vypiŭ, i heta było zafiksavana. Kali tam nabirajecca kolkaść peŭnaja parušeńniaŭ, to mohuć pasadzić. Syn bajaŭsia, što pasadziać, źjechaŭ u Rasiju, a milicyi adpraviŭ źviestki, dzie znachodzicca», — apisvaje pryhody syna Ramualda Alaksandraŭna.
Zusim niadaŭna, kaža jana, Kraśnicki viarnuŭsia z Rasii ŭ Biełaruś: «Pryjechaŭ u Hrodna, vypiŭ, byŭ zły na supracoŭnikaŭ, što jaho asudzili, pajšoŭ i padpaliŭ aporny punkt», — kaža žančyna. Matyŭ, ź jaje słovaŭ, złość i kryŭda.
Pra ŭdzieł syna ŭ palityčnych akcyjach joj ničoha nieviadoma. Jana kaža, što jaho ŭ žniŭni, na momant prezidenckich vybaraŭ, nie było ŭ krainie.
Žančyna taksama skazała, što raniej syn «braŭ na siabie kradziež mašyny, kab usich nie pasadzili».
Jana adznačyła, što niejkija «znajomyja» padhavaryli nie brać advakata.
Pry hetym, pa pieršaj častcy artykuła Kryminalnaha Kodeksa «Akt teraryzmu» praduhledžvajecca pakarańnie — da 15 hadoŭ pazbaŭleńnia voli, pa treciaj častcy — ažno da rasstrełu.
