Kiraŭniki dziaržaŭ i ŭradaŭ Jeŭrasajuza pryniali rašeńnie pašyryć sankcyi suprać Turcyi z-za jaje dziejańniaŭ u Mižziemnym mory. Pra heta havorycca ŭ zajavie ŭdzielnikaŭ samitu ES, jaki prachodzić u Brusieli, piša TASS.
«ES zastajecca prychilnym abaronie intaresaŭ sajuza i krain-členaŭ, a taksama padtrymańniu rehijanalnaj stabilnaści. U suviazi z hetym samit daručaje Radzie ES pryniać dadatkovy čorny śpis na padstavie rašeńnia ad 11 listapada 2019 hoda, što tyčycca abmiežavalnych mier z-za niezakonnaj dziejnaści Turcyi ŭ Mižziemnym mory», — adznačajecca ŭ im.
Akramia taho, lidary daručyli kiraŭniku dypłamatyi ES Žazepu Barelu pradstavić da samitu ŭ sakaviku 2021 hoda inšyja varyjanty pašyreńnia sankcyj u dačynieńni da Ankary.
U dakumiencie padkreślivajecca, što «Turcyja, na žal, praciahvaje svaje adnabakovyja i pravakacyjnyja dziejańni, a taksama ŭzmacniła rytoryku suprać ES, krain-členaŭ ES i jeŭrapiejskich lidaraŭ». Pry hetym ES paćviardžaje «stratehičny intares u raźvićci ŭzajemavyhadnych adnosin z Turcyjaj» i adznačaje, što «prapanova ab pazityŭnym paradku» dla Ankary ŭsio jašče ŭ sile. «Taki paradak moh by achapić takija śfiery, jak ekanomika i handal, kantakty pamiž hramadstvami, dyjałoh na vysokim uzroŭni i supracoŭnictva pa mihracyjnym pytańni. Jeŭrasajuz padkreślivaje važnaść zachavańnia kanałaŭ kamunikacyi pamiž ES i Turcyjaj», - havorycca ŭ im.
Akramia taho, ES abiacaje praciahvać akazvać finansavuju padtrymku Turcyi dla siryjskich biežancaŭ, a taksama supracoŭničać u baraćbie ź sietkami nielehalnych pieravozčykaŭ mihrantaŭ.
Narešcie, u zajavie samitu havorycca, što Jeŭrasajuz maje namier kaardynavać svaje dziejańni i pastanovy ab Turcyi z uładami ZŠA.
