Arciom Sarokin nie spadziajecca na vyzvaleńnie z-pad varty, čakaje sudu ŭ nastupnym hodzie, piša Radyjo Svaboda.
Lekar-anestezijolah lakarni chutkaj medyčnaj dapamohi Arciom Sarokin, jakoha mižnarodnaja pravaabarončaja arhanizacyja Amnesty International pryznała viaźniem sumleńnia, znachodzicca ŭ mienskim SIZA № 1 na vulicy Vaładarskaha.
- Hieneralnaja prakuratura raspačała kryminalnuju spravu pavodle č. 3 art. 178 KK — raskryćcio lekarskaj tajamnicy, jakoje paciahnuła ciažkija nastupstvy. Hety ž artykuł inkryminujuć žurnalistcy tut. by Kaciarynie Barysievič, jana taksama pryznanaja viaźniem sumleńnia.
- Lekar i žurnalistka byli zatrymanyja pa spravie publikacyi medyčnych dakumentaŭ, jakija tyčacca śmierci Ramana Bandarenki.
- Arcioma Sarokina ŭžo dvojčy pakazali na dziaržaŭnych telekanałach: jon pryznaje vinu i apaviadaje pra toje, što adbyłosia, adpaviedna pres-relizu prakuratury.
«Hetaje pryznańnie było zroblena dziela nas», — miarkuje žonka Arcioma Natalla. Jana skazała Svabodzie, što ad momantu zatrymańnia nia bačyła muža. Praz peŭny čas paśla zatrymańnia joj prapanoŭvali spatkańnie ŭ abmien na padpisku ab nierazhałošvańni.
«Ale ja ad takoha admoviłasia. Mianie pastajanna prasili nie razmaŭlać z žurnalistami. Mnie pastajanna abiacali, što voś-voś jaho adpuściać, niešta pamianiajecca. Užo było šmat razoŭ, kali ja jaho čakała dadomu: abiacańni adpuścić byli, ale ničoha nie adbyłosia, — kaža Natalla. — Ja zdahadvajusia, što abiacańni byli i jamu, bo piša mnie, što raniej spadziavaŭsia, a ciapier razumieje, što prosta čakaje sudu. A sud budzie ŭžo ŭ nastupnym hodzie».
«Ja nie razumieju, čamu jon tam, u SIZA, ja nie liču jaho niejkim bandytam»
Mieru strymańnia Arciomu nie mianiajuć, chacia Natalla padavała ab hetym chadajnictva.
«Ja prasiła źmianić na lubuju inšuju, ale kab jon znachodziŭsia doma i dapamahaŭ mnie vychoŭvać dziaciej. Ale ničoha nie pamianiałasia. Taksama pisali chadajnictva jaho kalehi-daktary, — kaža Natalla. — Ja nie razumieju, čamu jon tam, u SIZA, ja nie liču jaho niejkim bandytam. Ja nie liču, što jon pavinien prachodzić pa hetym artykule, nia baču nijakich dokazaŭ. Ale kali čałaviek usio pryznaŭ, to jaho treba było vypuścić dadomu».
Natalla sama pracuje lekarkaj u lakarni ŭ Rudziensku. Jak jana stavicca da spravy Arcioma z hledzišča lekara?
«Jak było nasamreč, ja nia viedaju. Ale jak doktar skažu, što kali heta i prymać jak razhałošvańnie lekarskaj tajamnicy, to heta jak minimum častka 1, a nie častka 3. Nia baču dokazaŭ tamu, što heta paciahnuła niejkija niepryjemnyja rečy dla hramadztva, jak pišuć ŚMI. Ja nie razmaŭlała z mamaj Ramana Bandarenki, ale viadoma, što jana nia maje nijakich pretenzijaŭ da Arcioma».
Natalla kaža, što paśla zatrymańnia muža jaje žyćcio pamianiałasia: ledź paśpiavaje na pracu, bo treba jašče zavieści starejšych synoŭ u škołu, dzie jany vučacca ŭ roznyja źmieny, a małodšuju dačku ŭ dziciačy sadok, potym na hurtki, «kab u ich byŭ taki ž režym, jak i raniej».
«Bolš ničoha nie paśpiavaju, navat nia ŭsiu infarmacyju čytaju ź internetu, artykuły pra Arcioma. Pracuju nia ŭ miescy žycharstva, i dzieci vučacca ŭ škole ŭ horadzie, a my žyviom u vioscy. Jedu na elektryčcy, usich zabiraju».
Natalla dva miesiacy jak vyjšła na pracu paśla dekretnaha adpačynku. Kaža, što pracoŭnaje miesca nie abstalavanaje, pisała listy pra heta ŭ administracyju, ale reakcyi pakul nijakaj.
«Ja pracuju biez akušerki, tamu jašče emacyjna składanyja i pachody na pracu».
«Syny pišuć listy, dapamahajuć źbirać pieradaču»
Natalla kaža, što dzieci sumujuć pa baćku, pišuć listy Dziedu Marozu, kab tata viarnuŭsia.
«Chłopčyki ŭsio viedajuć, małodšaj skazali, što tata ŭ kamandziroŭcy. Jany pišuć listy, dapamahajuć źbirać pieradaču, raspakoŭvać cukierki ad «fancikaŭ». Adzin chłopčyk byŭ padčas vobšuku i raskazaŭ potym druhomu, kali toj viarnuŭsia sa škoły. I ja pryniała rašeńnie nia ŭvodzić dziaciej u zman, bo i tak usio zrazumieła, ja płaču, razmaŭlaju pa telefonie. Jany pa-svojmu heta pieražyvajuć. Ja, kalehi, siabry sprabujem adciahnuć ich cackami, zabaŭkami, ja starajusia, kab jany chadzili na hurtki. Ale vielmi składana ciapier».
Paśla videa, jakija vyjšli pa BT, suviaź z Arciomam naładziłasia, pačali dachodzić listy z-za krataŭ. Na ŭmovy ŭtrymańnia jon nia skardzicca, znachodzicca ŭ kamery, dzie razam ź im siamiora čałaviek. Adzinaja prablema, kaža Natalla, što mužu nie dazvalajuć pieradavać knihi, dapamožnik pa anestezijalohii jon nie atrymaŭ.
Advakat byŭ u Arcioma na hetym tydni.
«Advakat pytaje, što jamu pieradać. A ja prašu spytać, dzie ŭ nas jalinka lažyć, bo dzieci prosiać jalinku; dzie śviatło ŭklučajecca na haryščy; jak apłočvać kamunałku — bo heta ŭsio jon rabiŭ».
Natalla ŭdziačnaja za dapamohu kaleham, adnakurśnikam, siabram i navat nieznajomym ludziam.
