Tobias Baumgaertner
Zdymak dvaich aŭdaviełych pinhvinaŭ, jakija niby suciašajuć adzin adnaho, staŭ pieramožcam premii Ocean Photograph Awards časopisa Oceanographic, piša Bi-bi-si.
Fota było zroblena ŭ aŭstralijskim Mielburnie niamieckim fatohrafam Tobijasam Baŭmhiertnieram.
Jak jamu raspaviali, ptuški sapraŭdy niezadoŭha da hetaha stracili spadarožnikaŭ žyćcia.
Na pirsie Sent-Kiłda ŭ Mielburnie hniazdujucca prykładna 1400 małych pinhvinaŭ. Nazyvajucca jany tak nie vypadkova — heta sapraŭdy samy maleńki vid pinhvinaŭ, ich siaredni rost — kala 33 sm.
«Adzin z vałancioraŭ padyšoŭ da mianie i raspavioŭ, što bieły — heta ŭžo pažyłaja samka, jakaja straciła spadarožnika, i toje ž byccam by zdaryłasia z bolš maładym samcom, — napisaŭ u svaim «Instahramie» fatohraf. — Z tych časoŭ jany rehularna sustrakajucca, suciašajuć adno adnaho i razam hadzinami nazirajuć za ahniami horada».
Try nočy fatohraf naziraŭ za ptuškami. «Nijakaje padśviatleńnie vykarystoŭvać nie dazvalałasia, dy i niemahčyma było, a pinhviny maleńkija, pastajanna ruchajucca, truć adno adnamu śpinu kryłami i čyściać piory, tamu złavić momant dla zdymka było ciažka. Ale ŭ rešcie rešt mnie ŭsio ž taki pašancavała», — raspavioŭ Baŭmhiertnier.