Onliner.by
U Savieckim rajonie Minska i sumiežnych ź im vulic siońnia z ranicy z kranaŭ išła vada kolery iržy, nieprydatnaja dla vykarystańnia. Paviedamlałasia ab prablemach na vulicach Bahdanoviča, Kołasa, Biady, Niakrasava, a taksama Siadych, Kalinoŭskaha dy inš.
Vyśvietliłasia, što prablemy źviazanyja sa zbojem technałahičnaha abstalavańnia na pompavaj stancyi «Zialony łuh». U roznyja kropki nakiravali cysterny. Jany znachodziacca pa nastupnych adrasach:
— Cnianskaja, 17;
— Siadych, 56;
— Jakuba Kołasa, 21;
— Uschodniaja, damy 44-50;
— Kalinoŭskaha, 24;
— skryžavańnie vulic Bahdanoviča i Olešava (pryvatny siektar).
Tut.by
Paciarpieŭ uvieś Saviecki rajon, a taksama niekatoryja vulicy sumiežnych ź im rajonaŭ horada.
U hety momant śpiecyjalisty ŭzmocniena pramyvajuć vodapravodnyja sietki, na asobnych vulicach narmalnaje vodazabieśpiačeńnie ŭžo pavinna być adnoŭlena, ale mahčymy reštkavy efiekt da źlivu ŭsioj niajakasnaj vady.
U «Minskvodakanale» Tut.by paviedamili, što raźličvajuć vyrašyć prablemu da viečara siońniašniaha dnia.
***
Paśla abiedu pres-słužba Minharvykankama abviaściła, što paśla pramyvańnia sietak jakaść vady z pompavaj stancyi adpaviadaje ŭsim narmatyvam.
«U pracy abstalavańnia pompavaj stancyi 2-ha ŭzdymu «Zialony Łuh» 5-ha vodazaboru «Baraŭlany» adbyŭsia zboj. Z hetaj pryčyny siońnia ranicaj mahła pahoršycca jakaść vodazabieśpiačeńnia ŭ žycharoŭ Savieckaha rajona, u pryvatnaści pa vulicach Niakrasava, Biady, Uschodniaj, Bahdanoviča, Łamanosava, Korš-Sablina, Hało, Kołasa, Surhanava, a taksama na Kalinoŭskaha i ŭ kvartale Arłoŭskaj, Haja, Karastajanavaj, Azizava, Kachoŭskaj, Kujbyšava», — rastłumačyli ŭ Mienharvykankamie.
U paciarpiełyja rajony nakiravany aŭtacysterny ź pitnoj vadoj. Paśla incydentu čatyry bryhady avaryjna-adnaŭlenčych rabot apieratyŭna zanialisia pramyvańniem sietak.
«Zaraz jakaść vady z pompavaj stancyi adpaviadaje ŭsim narmatyvam, jana taksama narmalizavałasia ŭ spažyŭcoŭ pa vulicach Niakrasava, Biady, Uschodniaj, Bahdanoviča. Ciapier dadatkova pravodzicca łabaratorny kantrol jakaści vady», - paviedamili ŭ pres-słužbie.
