Spravu razhladaŭ sudździa Alaksandr Jarmolik. Jon prysudziŭ Kaciarynie Salevič adzin hod abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaja chimija»). Salevič taksama abaviazana vypłacić «paciarpiełamu» 1000 rubloŭ maralnaj kampiensacyi, a taksama 87 rubloŭ dziaržpošliny, piša spring.96.org
Kaciarynu Salevič vinavacili ŭ tym, što 25 žniŭnia jana naŭmysna publična abraziła pradstaŭnika ŭłady ŭ telehram-kanale «Słonim dla žyćcia». Paciarpiełym pryznany milicyjant AMAP HUUS Minharvykankama staršy siaržant milicyi Siarhiej Askołkaŭ, fatahrafiju i asabistuju infarmacyju jakoha jana reposnuła. Pavodle materyjałaŭ śledstva, pad repostam dziaŭčyna raźmiaściła paviedamleńnie «z tekstam abraźlivaha źmiestu, jakija prynižaje honar i hodnaść Askołkava».
U materyjałach taksama paznačana, što ekśpiert adździeła linhvistyčnych ekśpiertyz UHSKE RB pa Hrodzienskaj vobłaści pryznaŭ adno sa słoŭ u paviedamleńni «hrubym, vulharnym, abraźlivym».
21 śniežnia paciarpieły Siarhiej Askołkaŭ nie źjaviŭsia ŭ sud praz chvarobu: razhlad spravy byŭ adkładzieny da jaho vyzdaraŭleńnia.
22 studzienia praces pradoŭžyŭsia. Siaržant Askołkaŭ chadajničaŭ, kab sud byŭ zakrytym, bo jon baicca razhałašeńnia asabistych dadzienych. Ale sud hetaje chadajnictva adchiliŭ. Raniej pamiž saboj Salevič i Askołkaŭ znajomyja nie byli. Salevič, jak administratar telehram-kanału «Słonim dla žiźni» pakinuła ŭ adnym z svaich dopisaŭ charaktarystyku pradstaŭniku OMON, z čaho i ŭźnikła sprava. Salevič nie admaŭlała, što jana zrabiła taki zapis u sacsietcy, padpisaŭšy jaho nikam «Paracetamoł». U hetaj častcy jana pryznała svaju vinu. Ale jana nie ličyć, što niejkim čynam raspaŭsiudziła asabistyja źviestki milicyjanta.
Siarhiej Askołkaŭ na pracesie zajaviŭ, što jon i jaho rodnyja pieraciarpieli značnyja maralnyja pakuty i zajaviŭ pazoŭ kampiensacyi na 3000 rubloŭ. Hetyja hrošy jon abiacaŭ pieravieści na rachunak «Doma malutki».
