Fota Depositphotos.com
Amal kožny pradmiet u našych damach, ad lampački da kanapy, akon i Wi-Fi roŭtaraŭ, adpaviadaje hłabalnym standartam, jakija zabiaśpiečvajuć ich jakaść.
Pramysłovyja standarty, stvoranyja ZŠA i Zachadam na praciahu dziesiacihodździaŭ, utvarajuć niabačnuju matrycu pravił, jakija składajuć asnovu hłabalnaha rynku. Adnastajnaść maje vyklučnaje značeńnie dla mižnarodnaha handlu, bo jana harantuje, što, naprykład, bałty, USB-štekiery abo transpartnyja kantejniery, mohuć uzajemazamianiacca va ŭsim śviecie. Standarty adlustroŭvajuć pahadnieńnie pamiž mižnarodnymi hrupami ekśpiertaŭ, dzie doŭhi čas daminavali zachodnija śpiecyjalisty.
Adnak ciapier Kitaj choča zaniać lidarskuju pazicyju ŭ niekatorych pieradavych halinach. Piekin vykarystoŭvaje dziaržaŭnaje finansavańnie i palityčny ŭpłyŭ, kab vyznačać standarty dla pieradavych technałohij u telekamunikacyjach, pieradačy elektraenierhii i štučnym intelekcie, piša The Wall Street Journal.
«Daminavańnie ŭ techničnych standartach, jakija składajuć asnovu infarmacyjna-kamunikacyjnych technałohij i inšych sučasnych halin, — nieadjemnaja častka ambicyj Kitaja», — zajaviła Kamisija pa manitorynhu ekanamičnych pytańniaŭ i pytańniaŭ biaśpieki ŭ adnosinach pamiž Kitajem i ZŠA — orhan, adobrany Kanhresam ZŠA.
Takija pamknieńni Kitaja tłumačacca žadańniem pieraŭzyści Zachad, a taksama atrymać prybytak. Sprava ŭ tym, što standarty, zasnavanyja na zapatentavanych technałohijach, patrabujuć ad karystalnikaŭ vypłačvać licenzijnyja zbory. Naprykład, kampanii Nokia Corp. i Qualcomm Inc. štohod atrymlivajuć miljardy dalaraŭ ad svaich patentaŭ, jakija stali asnovaj dla mabilnych sistem, stvoranych kankurentami.
Kitaju chaciełasia b zarablać takija hrošy šlacham raspracoŭki svaich techničnych standartaŭ, jakija b adpaviadali technałohijam kitajskich kampanij.
Pytańnie raspracoŭki standartaŭ stanovicca ŭsio bolš aktualnym, pakolki źjaŭlajecca novaje pakaleńnie technałohij, zaležnaje ad sietak 5G, u tym liku bieśpiłotnyja transpartnyja srodki, «razumnyja» harady i internet rečaŭ. Usie hetyja dasiahnieńni złučajuć ličbavy śviet ź fizičnym tak, jak nikoli raniej.
Pa źviestkach kamiteta Kanhresa, novyja technałohii, u tym liku sistemy raspaznavańnia tvaraŭ, zakranajuć pryvatnaje žyćcio i hramadskuju biaśpieku, što, u svaju čarhu, pahražaje nacyjanalnaj biaśpiecy.
Kitaj prasoŭvaje standarty, jakija pavialičać ekspart kampanij, što majuć suviaź ź Piekinam, a taksama paspryjajuć umacavańniu aparata dziaržaŭnaj biaśpieki, śćviardžaje były ministr handlu Japonii Akira Amary. «Kali kitajskija pradukty mohuć źbirać asabistyja źviestki, to treba mieć na ŭvazie, što ŭ kančatkovym vyniku jany mohuć trapić da kitajskaha ŭrada», — pierakanany jon.
Kitajskija čynoŭniki śćviardžajuć, što Piekin vučycca łaviravać u hłabalnaj sistemie, dzie daminuje Zachad, i, jak kraina z adnoj z najbujniejšych ekanomik śvietu, Kitaj zajmaje svajo zakonnaje miesca ŭ mižnarodnaj supolnaści. U bližejšy čas Piekin płanuje abnarodavać «Kitajskija Standarty 2035» — ambicyjny płan lidarstva ŭ halinie sučasnych technałohij.
«Hłabalnyja techničnyja standarty ŭsio jašče znachodziacca na stadyi farmiravańnia», — kaža Daj Chonh, pradstaŭnik Nacyjanalnaha kamiteta pa kiravańni standartyzacyjaj Kitaja. «Heta daje kitajskim standartam šaniec stać daminujučymi ŭ śviecie».
Padjom Kitaja ŭ halinie standartyzacyi supadaje sa spadam upłyvu suśvietnych lidaraŭ. U Mižnarodnaj arhanizacyi pa standartyzacyi kitajskija delehaty majuć udvaja bolš miescaŭ u siekretaryjacie, čym jany mieli 10 hadoŭ tamu. Heta daje Kitaju mahčymaść upłyvać na prapanovy, debaty i pryjarytety ŭ arhanizacyi.
Kamisar ES Tjery Breton paviedamlaje, što jeŭrapiejskija kampanii aktyŭna raźvivajuć mižnarodnyja standarty na rynkach, kab zachavać svaje kankurentnyja pieravahi. Pa jaho słovach, niazdolnaść reahavać na dziejańni Kitaja paŭpłyvaje na ekanamičnuju kankurentazdolnaść i technałahičnaje lidarstva Zachadu.
Zhodna z aficyjnymi dakumientami, Kitaj štohod vyłučaje ŭsio bolš srodkaŭ kampanijam, jakija zajmajucca raspracoŭkaj mižnarodnych standartaŭ. U toj ža čas finansavańnie Zachadu skaraciłasia za apošni čas. «Tamu nie treba ździŭlacca, kali ŭrešcie my pačniom hulać pa kitajskich praviłach», — kaža Krystaf Vinterhalter, dyrektar Niamieckaha instytuta standartyzacyi.
Ambicyi Kitaja ŭ pytańni standartyzacyi prajavilisia jašče ŭ 2016 hodzie, kali adbyłasia sustreča 3GPP — hłabalnaj arhanizacyi, jakaja ŭstaloŭvaje standarty 5G. Na hetaj sustrečy kampanija Huawei Technologies Corp. zapatrabavała pryniać jaje standarty ŭ vypraŭleńni pamyłak padčas pieradačy źviestak 5G. U toj čas šyrokuju padtrymku atrymali standarty amierykanskaj kampanii Qualcomm. Napružanyja debaty skončylisia tolki apoŭnačy. U vyniku było vyrašana pryniać standarty abiedźviuch kampanij.
Na siońniašni dzień Kitaj lidziruje ŭ šmatlikich vysokatechnałahičnych halinach, što daje jamu mahčymaść lidziravać i ŭ prapanovach suśvietnych standartaŭ.
