Kali na scenie źjaŭlajecca spadar Aniščanka — heta kiepski znak. Vusnami hałoŭnaha sanitarnaha doktara Rasii abviaščałasia vajna hruzinskaj minierałcy dy małdaŭskamu vinu. Ciapier nadyšła čarha biełaruskaha małaka.
Nu što vy, kaniečnie, ničoha asabistaha — tolki sanitarnyja normy. Ale dniom raniej premjer Pucin užo razharnuŭ podbiŭku.
Jon uziaŭ na ŭzbrajeńnie mietad biełaruskaha kiraŭnika — vynosić na publiku detali kanfidencyjnych pieramoŭ. Nazvaŭšy Łukašenku «aryhinalnym čałaviekam», rasijski premjer patłumačyŭ, što ŭ pytańni pratekcyjanizmu baki nie parazumielisia. Maŭlaŭ, Minsk, jaki ŭvieś čas patrabuje roŭnych umoŭ haspadarańnia ŭ sajuznaj dziaržavie, nasamreč napampoŭvaje svaju małočnuju halinu značna bolšymi datacyjami: 24% suprać 3%. Nu chiba ž spraviadlivaja kankurencyja?
A ŭvohule pajšła surjoznaja sieča. Minsku adhukajucca raniejšyja vypady. Chacia, kaniečnie ž, sanoŭnych rasijcaŭ złuje nie stolki vierbalnaja dziorzkaść (sami ŭmiejuć «mačyć u sarciry»), kolki ŭpartaść biełaruskaha boku ŭ pytańniach prodažu aktyvaŭ i pryznańnia kaŭkazskich respublik.
Ministr-«kładaŭščyk» Kudryn, jakomu biełaruskaje načalstva paraiła padlačycca, zajaviŭ na Pieciarburhskim ekanamičnym forumie, što Maskva ličyć niemetazhodnymi pieramovy ź Biełaruśsiu pra kredyt na 100 miljardaŭ rasijskich rubloŭ. Čytaj: kali takija ŭparciny i abzyvaki, dyk uvohule z nosam zastanieciesia!
Pakazalna i toje, što prakramloŭski palitołah Viačasłaŭ Nikanaŭ naŭprost nazvaŭ zabaronu na ŭvoz biełaruskaj małočnaj pradukcyi až 500 najmieńniaŭ (uvohule nie vierycca, što stolki moža być!) nie čym inšym, jak ekanamičnymi sankcyjami.
Pavodle maskoŭskaha publicysta Leanida Radzichoŭskaha, Łukašenka, kaniečnie, zrabiŭ mocny chod, kali nasupierak dypłamatyčnamu palitesu raspavioŭ, što Maskva źviazvaje apošniuju tranšu ($500 młn.) raniej abiacanaha kredytu z pryznańniem Abchazii dy Paŭdniovaj Asiecii. Kreml apynuŭsia ŭ durnavatym stanoviščy: ciapier zaciskać tuju tranšu niajomka. Voś i Kudryn u Pieciarburhu musiŭ skazać, što rasijski ŭrad nie admaŭlajecca ad pieramoŭ ab vydzialeńni Biełarusi hetych $500 młn.
Ale ž u rasijcaŭ jość prykazka «nie myťjem, tak katańjem». Paraŭišy ichniamu vice-premjeru padlačycca, biełaruski bok, mahčyma, našturchnuŭ Maskvu na ideju. Na scenu vyjšaŭ sanitarny doktar Aniščanka.
I małočnaja vajna — heta, musić, tolki pieršyja simptomy vialikaj niezadavolenaści Kramla. Ci varta nahadvać, nakolki Biełaruś zaviazana na rasijski rynak i kolki, adpaviedna, varyjantaŭ dać nam pad dychaŭku?
Źjaŭleńnie ž u siužecie Aniščanki — jak čornaja mietka. Jaje ŭ svoj čas dasyłali małdavanam, ukraincam, hruzinam.
Łukašenka tolki papałochaŭ Maskvu «druhoj Čačnioj». A małočnaja vajna — voś jana, atrymajcie! Tanna i siardzita.
ZY. Biełaruskija čynoŭniki, niahledziačy na vychadny, kinulisia supakojvać narod. Vice-premjer Ivan Bambiza zajaviŭ, što nijakaj małočnaj vajny niama — chiba što drobnyja papiarovyja nieparazumieńni. Jon paraiŭ asobnym rasijskim palitołaham nie raździmać žarści. Tym časam kaleha Aniščanki Valancina Kačan źbirajecca ŭ Maskvu ŭłahodžvać pytańnie.
Najchutčej što kanflikt niejak pahasiać. Ale handlovyja vojny z Rasijaj kančajucca nie na našu karyść. Tak, kvoty na cukar padkasili cełuju halinu.
