Učorašniaja čarha ŭ sud. Fota «Radyjo Svaboda»
U sudzie praciahvajuć začytvać abvinavačańnie, jakoje zajmaje 340 staronak. Viktara Babaryku abvinavačvajuć u tym, što jon z 2008 pa 2020 hod kiravaŭ arhanizavanaj złačynnaj hrupaj, vyznačaŭ u joj miesca i rolu kožnaha, a taksama — uznaharodžańnie. Jon metanakiravana rabiŭ tak, kab bolšaść členaŭ praŭleńnia ŭvachodziła ŭ hetuju hrupu.
Zhadvaŭsia ŭ abvinavačvańni i jaho syn, Eduard Babaryka. U pryvatnaści, ahučana, što z 2017 hoda jamu na rachunki rehularna pieravodzili niezakonna atrymanyja hrašovyja srodki, choć jon nie źjaŭlaŭsia členam hrupy.
U abvinavačvańni zhadvajucca łatvijskija kampanii, na rachunki jakich pieravodzili hrošy.
U pierapynku advakat Babaryka Dźmitryj Łajeŭski raspavioŭ, što jon pakazaŭ svajmu padabaronnamu fota ludziej, jakija ŭčora sprabavali trapić na sud, toj vielmi kranuty.
— My ŭ pierapynku i da pasiadžeńnia parazmaŭlali ź Viktaram Dźmitryjevičam. Ja pakazaŭ jamu razdrukavanyja fatahrafii z učorašniaj abstanoŭkaj tut. Adna sprava, kali na słovach raspaviadaješ, što pryjšło šmat ludziej, inšaja — pakazać. Jon viedaje, što na marozie ludzi stajali, što ich nie puścili. Jon vielmi hłyboka kranuty, dziakuje za padtrymku, i my, abaroncy, taksama dziakujem, — skazaŭ Łajeŭski.
Jon adznačyŭ, što adčuvańni čałavieka va ŭmovach abmiežavańnia voli vielmi zaležać ad taho, jak jon nastrojeny.
— Viktar Dźmitryjevič nastroiŭsia dobra i daŭno — jašče ŭ mai 2020 hoda — i praciahvaje, raz užo meta pakul nie dasiahnutaja, — raspavioŭ abaronca.
Łajeŭski adznačaje, što niedachop prastory, prahułak, biezumoŭna, adbivajecca.
— Ale kali čałaviek valavy, a jon čałaviek valavy, pierakanany, što rabiŭ słušnuju spravu, to jon spraŭlajecca lepš, — dadaŭ advakat.
Žurnalistaŭ niedziaržaŭnych biełaruskich ŚMI i partałaŭ siońnia ŭ zału suda znoŭ nie puścili.