Fota z asabistaha archiva
Prysud vyniesła sudździa suda Leninskaha rajona Maryna Zapaśnik. Dziaržabvinavaŭcam na pracesie vystupaŭ prakuror Alaksandr Ramanovič. Advakat — Ivan Čyžyk.
U pačatku pracesu Volha Paŭłava zajaviła advod sudździ praz toje, što nie daviaraje joj, bo raniej Maryna Zapaśnik niezakonna pryciahnuła Volhu da adkaznaści pa administracyjnym artykule 23.34. Chadajnictva adchilili jak nieabhruntavanaje.
Zaciataje bieśpierapynnaje parušeńnie hramadskaha spakoju
Volhu Paŭłavu pryznali vinavataj pavodle častki pieršaj artykuła 342 Kryminalnaha kodeksa. A mienavita ŭ tym, što jana naŭmysna ździejśniła złačynstva, aktyŭna ŭdzielničała ŭ hrupavych dziejańniach, jakija parušajuć hramadski paradak, nie padparadkavałasia zakonnym patrabavańniam pradstaŭnikoŭ ułady, što paciahnuła za saboj parušeńnie raboty transpartu.
Siarod farmulirovak abvinavačańnia — publičnaje vyhukvańnie łozunhaŭ, ździajśnieńnie hučnych plaskańniaŭ rukami, uźniaćcie ruk uvierch, masavaje, praciahłaje, zaciataje, bieśpierapynnaje parušeńnie hramadskaha spakoju, znachodžańnie ŭ pieršych šerahach masavaha mierapryjemstva, stvareńnie pieraškod šlacham vychadu na prajeznuju častku. Usio heta paciahnuła parušeńnie raboty transpartu, praz heta Minsktransu była pryčynienaja škoda — 10 tysiač 689 rubloŭ 76 kapiejek.
Volha Paŭłava admoviłasia davać pakazańni, spasyłajučysia na 27 artykuł Kanstytucyi.
Vyjaŭlenyja dva ściahi
Prakuror Alaksandr Ramanovič padtrymaŭ abvinavačańnie, adznačyŭšy, što vina Paŭłavaj dakazanaja. Supracoŭnik Minsktrans paćvierdziŭ, što ruch hramadskaha transpartu byŭ parušany z 13:40 da 15:35, a zhodna sa źviestkami mabilnaha apieratara, Paŭłava ŭ hety čas znachodziłasia ŭ miescy, paznačanym u abvinavačańni.
Zhodna z pratakołam asabistaha vobšuku, u Paŭłavaj byli kanfiskavanyja ściahi z nadpisami «Kraina dla žyćcia Uručča» i «Kraina dla žyćcia»: na dumku prakurora, jany śviedčać pra «pratestavy kirunak dziejnaści» Paŭłavaj, jaki vyjaviŭsia ŭ niepravamiernaj prajavie svajoj pazicyi. Prakuror taksama padkreśliŭ, što vina paćviardžajecca zapisam kamiery videanazirańnia supracoŭnikaŭ orhanaŭ unutranych spraŭ, na jakoj jany patrabujuć spynić parušeńnie, a Paŭłava praciahvaje jaho i vychodzić na prajeznuju častku.
Alaksandr Ramanovič zapatrabavaŭ u jakaści pakarańnia try hady abmiežavańnia voli biez nakiravańnia ŭ papraŭčuju ŭstanovu — «chatniaj chimii».
Nie mieła fizičnaj mahčymaści ździejśnić złačynstva
Advakat Ivan Čyžyk padkreśliŭ, što krytery pryciahnieńnia da adkaznaści pa 342 artykule nie vykonvajucca. Dazvoł na praviadzieńnie masavaha mierapryjemstva pavinnyja atrymoŭvać jaho arhanizatary, samo «nieatrymańnie» nie źjaŭlajecca hrubym parušeńniem paradku. Ab hetym taksama nie mohuć śviedčyć i ŭźniaćcie ruk, plaskańnie i łozunhi.
Abaronca padkreśliŭ, što abvinavačańnie zakranaje intervał času z 13.00 da 17.15, spynieńnie transpartu adbyłosia z 13.40 da 15.35. Paŭłava ž u 13.54 jašče znachodziłasia kala HC «Dana Moł», dzie jana ździejśniła administracyjnaje pravaparušeńnie pa art. 23.4 — heta paćviardžajecca pratakołam. U 14.05 jana ździajśniaje administracyjnaje pravaparušeńnie pa art. 23.34 — heta taksama paćviardžajecca pratakołam. U 14.05 Volhu zatrymali, što dakazvajecca adnym ź videazapisaŭ, tamu jana nie mieła fizičnaj mahčymaści ździejśnić złačynstva.
Nie pierapyniać apošniaje słova
Jašče ŭ pačatku pasiadžeńnia Volha Paŭłava zaprasiła chadajnictva, kab jaje apošniaje słova zasłuchali, nie pierapyniajučy. Sudździa jaho zadavoliła. Padčas jaje pramovy prysutnyja płakali, paśla — sudovaja zała ŭstała, kab zaapładziravać.
Spačatku Volha paprasiła milicyju adyści ad jaje na biaśpiečnuju adlehłaść, a potym skazała:
«3hodna z 53 artykułam Kanstytucyi RB, kožny čałaviek abaviazany pavažać honar, hodnaść i pravy inšaha čałavieka, tamu pierabivańnie apošniaha majho słova ličycca jak niepavaha i parušeńnie Kanstytucyi.
Epihrafam svajho apošniaha… zaklučnaha słova ja ŭziała radok z Boskaj kamiedyi Dante Alihjery: «Pakul choć listok u nadziei bjecca».
Vysoki sud, u zaklučnym słovie chočacca vykazać svaje pačućci da svajoj krainy i da ŭsiaho taho, što ŭ joj adbyvajecca. Ale lepš za ŭsio adlustroŭvaje siońniašniuju rečaisnaść i stan paryvu majoj dušy hałoŭny hieroj vialikaha ruskaha kłasika Tałstoha apovieści «Voskriesienije», napisanaj im 120 hadoŭ tamu, a ničoha pa fakcie i nie źmianiłasia. Takim čynam, cytuju:
«Sud jość tolki administracyjnaja pryłada dla padtrymańnia isnujučaha paradku rečaŭ, vyhadnaha adnamu z sasłoŭjaŭ. Usia sprava ŭ tym, što hetaje sasłoŭje pryznaje zakonam toje, što nie jość zakon, i nie pryznaje toje, što jość viečna zakon samim Boham napisana ŭ sercach ludziej. Ad taho i byvaje tak ciažka z hetymi ludźmi, i jany strašniejšyja za razbojnikaŭ: razbojnik usio ž moža paškadavać. Hetyja ž nie mohuć paškadavać, jany zastrachavanyja ad žalu. Kali b była zadadziena psichałahičnaja zadača, jak zrabić tak, kab našaha času — chryścijanie, humannyja, prosta dobryja ludzi — ździajśniali samyja žudasnyja zładziejstvy, nie adčuvajučy siabie vinavatymi, to, mahčyma, tolki adno rašeńnie: treba, kab było toje samaje, što jość: treba, kab hetyja ludzi byli hubiernatarami, nahladčykami, aficerami, palicejskimi… Heta značyć, pa-pieršaje, byli ŭpeŭnienyja, što jość takaja sprava, zvanaja «dziaržaŭnaj słužbaj», pry jakoj možna abychodzicca ź ludźmi, jak z rečami: biez čałaviečaha, braterskaha staŭleńnia da ich. A pa-druhoje, kab ludzi hetaj samaj dziaržaŭnaj słužbaj byli źviazanyja tak, kab adkaznaść za nastupstvy ŭčynkaŭ ich ź ludźmi nie padała ni na kaho asobna. Usia sprava ŭ tym, što ludzi dumajuć, što jość pałažeńni, u jakich možna abychodzicca z čałaviekam bieź lubovi, jak z rečču, a takich pałažeńniaŭ niama. Ź ludźmi nielha abychodzicca bieź lubovi, i heta nie moža być inakš, tamu što ŭzajemnaja luboŭ pamiž ludźmi jość asnoŭny zakon žyćcia čałaviečaha… Šukajcie carstva Božaha i praŭdy Jaho, a astatniaje prykładziecca vam. A vy šukajecie astatniaha i, vidavočna, nie znachodzicie jaho».
Ja chaču, kab Vy zadumalisia, što jość maral navat bajaźlivaha maładušnaha sasłoŭja, apantanaha smahaj ułady i jaje ŭtrymańnia. Jak biezzakonna siońnia vynosiacca prysudy nad ludźmi, jak kanstytucyjnyja pravy byli pataptanyja falsifikacyjami na vybarach u žniŭni 2020 hoda i jaki hvałt, hienacyd ździajśniajuć ciapier nad svaim ža narodam.
Ja była na Akreścina z 9 pa 12 žniŭnia i maju poŭnaje prava kazać pra heta hučna i ŭsłych, tamu što na svaje vočy bačyła, źbivali mužčyn. I mianie bili ŭ tym ža liku, pieražyła hazavuju kamieru. Dyk voś abyjakavaść — heta strašna! Mierkaj dabra i zła źjaŭlajecca sumleńnie.
Dyk voś, sumleńnia ŭ vas niama! U RB źjaŭlajecca Kanstytucyja vyšejšaj pravavoj siłaj, a nie supraćzakonnyja ŭkazy načalstva i vaš strach stracić pracu».
Apošniaje słova Volha skončyła vieršam Lermantava «Ty moh byť łučšim korolem» i słovami «Daj spačyn dušam pamierłych našych suhramadzian u hetaj baraćbie».
Volha Paŭłava — člen inicyjatyŭnaj hrupy Śviatłany Cichanoŭskaj, aktyvistka «Krainy dla žyćcia», palitźniavolenaja.
Da krasavika 2020 hoda pracavała hałoŭnym kaśmietołaham u firmie «Bielita». Kali pačaŭsia karanavirus, jana ź dziciem na miesiac samaizalavałasia na leciščy. U hety čas žančyna zaŭvažyła kanał Siarhieja Cichanoŭskaha «Kraina dla žyćcia», šmat hladzieła i čytała pra toje, što adbyvajecca ŭ Biełarusi, dy zachacieła dałučycca da kamandy.
