U Žłobinie dziaviataha sakavika vyniesienyja prysudy Siarhieju Biekareviču i Andreju Rasułavu. Ich pryznali vinavatymi pa art. 342 Kryminalnaha kodeksu i art. 364 Kryminalnaha kodeksu i asudzili da dvuch z pałovaj i troch hadoŭ pazbaŭleńnia voli ŭ kałonii ahulnaha režymu adpaviedna, paviedamlajuć pravaabaroncy.
Spravu razhledzieŭ sudździa Mikałaj Siarhiejevič, dziaržabvinavaŭca — prakuror Fiadorčanka.
U jakaści paciarpiełaha vystupiŭ namieśnik načalnika Žłobinskaha RAUS Dźmitryj Dziadziun, jaki byŭ paciarpiełym i ŭ raniejšych pracesach u Žłobinie.
Andrej Rasułaŭ, jak pakazała śledstva, znachodziačysia ŭ niećviarozym stanie, razam ź Siarhiejem Biekarevičam i inšymi asobami, viečaram i ŭnačy z 9 na 10 žniŭnia prymaŭ aktyŭny ŭdzieł u hrupavych dziejańniach, jakija hruba parušyli hramadski paradak, pieraškadžali pracy hramadskaha transpartu, vychodzili na prajeznuju častku ŭ rajonie vulicy Pieršamajskaja, stajali ŭ sčepcy. Taksama zaklikali astatnich nie padparadkoŭvacca patrabavańniam milicyi, jakija achoŭvali hramadski paradak, vykrykvali łozunhi. Akazvali aktyŭny supraciŭ supracoŭnikam MUS, kidali ŭ ich bok kamiani i butelki, nanosili ŭdary pa ekipiroŭcy, tym samym ździajśniali hvałt.
Andrej Rasułaŭ admoviŭsia ad dačy pakazańniaŭ u sudzie, ale zajaviŭ, što svaju vinu ŭ hvałtoŭnych dziejańniach pryznaje całkam i škaduje ab ździejśnienym u tuju noč. Prynosić prabačeńni paciarpiełym. Taksama ŭ vinie pryznaŭsia i druhi abvinavačvany — Siarhiej Biekarevič.
