Jak u lutym padaraželi tavary i pasłuhi
Fota Nadziei Bužan
Nahadajem, u minułym miesiacy ŭ Biełarusi zafiksavali rekordnuju za apošnija 5 hadoŭ miesiačnuju inflacyju, jana była na ŭzroŭni 1,9%. Hadavaja inflacyja razahnałasia da 8,7%, a na sacyjalna značnyja tavary — da 7,2%.
Siarod praduktaŭ lidzirujuć pa roście koštaŭ śviežyja ahurki (+21,6%), banany (+20,9%), bulba (+11,7%), morkva (+10,7%), buraki (+10,6%). Charčovaja sol padaražeła na 9,4%, repčataja cybula — na 8,8%, śviežaja biełakačannaja kapusta — na 8,1%, sałodki pierac — na 7,1%.
Ceny na marharyn i kansiervavanuju harodninu rvanuli za minuły miesiac na 6,4%.
Prykmietna vyraśli ceny na mnohija krupy. Da prykładu, piarłoŭka stała daražejšaj na 5,2%, prosa i hrečka — na 3,5%, aŭsianyja šmatki — na 2,5%.
U lutym istotna padaraželi taksama mnohija prysmaki, u tym liku marmieład (+4,7%), piečyva i pierniki (+3,6%), irys (+3,5%), ziefir i karamiel (+3,1%). U cełym kandytarskija vyraby stali daražejšymi na 2,3%.
Małočnyja pradukty padaraželi za luty ŭ cełym na 1,3%. Pry hetym košty na małako vyraśli na 1,8%, na tłusty tvaroh — na 1,3%, johurt — na 1,7%.
Miasa ŭ cełym padaražeła amal na 1%. Prykmietniej za ŭsio vyraśli košty na miasny farš — na 2,5%, kurycu — na 2,3%, paŭfabrykaty ź miasa ptuški — na 2%, subpradukty z ptuški — na 1,3%. Pry hetym śvinina (akramia bieskaściovaj) patańnieła na 0,2%.
Kurynyja jajki stali daražejšymi na 0,5%. Nahadajem, ułady cikaviacca najaŭnaściu ŭ kramach jajek napiaredadni vielikodnych śviataŭ. Tym časam handlovyja sietki skardziacca ŭ viedamstva na toje, što niekatoryja ptuškafabryki vykonvajuć ich zajaŭki napałovu. Adna z mahčymych pryčyn hetaha — adpraŭka vytvorcami jajek na ekspart.
Leki stali daražejšymi za luty na 5,4%. Naprykład, antyinfiekcyjnyja srodki i srodki dla lačeńnia dychalnaj sistemy padaraželi na 6,5%, Sardečna-sasudzistyja srodki — na 5,7%. Bint padaražeŭ na 6,1%, špryc — na 5,9%. Miedycynskija pasłuhi vyraśli ŭ canie na 2,5%.
Chleb i chlebabułačnyja vyraby padaraželi na 1,1%. Naprykład, chleb z pšaničnaj muki vyšejšaha hatunku staŭ daražejšy na 1,6%, a pieršaha hatunku — na 1,5%.
Jak čynoŭniki tłumačać rost koštaŭ
U MARH tłumačać, što «pavyšany rost koštaŭ abumoŭleny zachavańniem niespryjalnaha ŭpłyvu padaražeńnia tavaraŭ, jakija impartujucca, a taksama admieny padatkovych ilhot».
«U lutym z tavaraŭ, jakija impartujucca, najbolšy rost koštaŭ u hadavym vyražeńni zachavaŭsia na rybu i rybapradukty, alej i tłuščy, krupy, a taksama sadavinu. Taksama praciahvajecca rost koštaŭ na miedykamienty (ad studzienia admienieny lhoty pa PDV) i, jak śledstva, na miedycynskija pasłuhi, — adznačajuć u MARH. — U cełym rost koštaŭ na leki adbiŭsia na hadavym roście koštaŭ na sacyjalna značnyja tavary — kala 2,1 pracentnych punkta, alej i tłuščy — 0,9 pracentnych punkta, na płodaaharodninnuju pradukcyju — 0,8 pracentnych punkta».
U MARH raspaviadajuć, što za luty impartavanaja ryba i rybapradukty padaraželi na 1,6%, alej — 5,8% (praktyčna nie vyrablajecca ŭ krainie), leki — 5,1%, płodaaharodninnaja pradukcyja — 7,1%, miedycynskija pasłuhi — 2,5%.
«Pryrost pastajanna rehulavanych cen i taryfaŭ u hadavym vyražeńni ŭ lutym skłaŭ 8,5% — adznačajuć u MARH. — U lutym (akramia pavyšeńnia koštaŭ na leki i taryfaŭ na miedycynskija pasłuhi) adznačajecca pavyšeńnie koštu pasłuh daškolnych ustanoŭ na 10,2%, a taksama koštaŭ na aŭtamabilnuju alivu na 1,1%. Płanava pavyšajucca taryfy na žyllova-kamunalnyja pasłuhi na 8,6%».
U Nacbanku ŭdakładniajuć, što bazavaja inflacyja, jakaja adlustroŭvaje dynamiku svabodnych koštaŭ biez uliku pazicyj, dzie na ceny schilnyja ŭpłyvać administracyjny i siezonny faktary, u lutym u hadavym vyražeńni (da anałahičnaha pieryjadu 2020 hoda) skłała 8,3%. Miesiacam raniej jana była na ŭzroŭni 7,5%.
Nacbank pryvodzić takija ličby: leki ŭ lutym u hadavym vyražeńni (da anałahičnaha pieryjadu 2020-ha) padaraželi na 20,9%, pasłuhi strachavańnia asabistaha transpartu — na 31%, cyharety — na 11,4%, pasłuhi techahladu aŭtamabila — na 10,4%.
