Biełarusy chočuć hladzieć kantent nie pra rasijskich pop-zorak, a pra padziei ŭnutry Biełarusi. Hetym tłumačacca šalonyja pośpiechi Siarhieja Cichanoŭskaha i inšych palityčnych błohieraŭ.
Svoj kavałačak piraha na hetym pasprabavali adkusić i niekatoryja rasijskija dziejačy. Samy viadomy prykład — heta Maksim Kac, aptymistyčnyja videa jakoha ŭ kancy leta i pačatku vosieni 2020 hoda hladzieli sotni tysiač čałaviek. Hledaču, jaki daŭno ŭ temie biełaruskich padziej, u videa Kaca nie chapała hłybini, jon błytaŭsia ŭ imionach i faktach, ale byŭ zaŭsiody pazityŭna nastrojeny, što znajšło svoj vodhuk. Na siońnia Kac straciŭ intares da Biełarusi, u jahonym błohu ciapier amal całkam unutrany rasijski paradak dnia.
Druhi prykład — heta Jaŭhien Byčkoŭski. Jon až pa siońnia papularny piersanaž biełaruskaha jutuba. Pry hetym navat nie ŭsie viedajuć, što hety čałaviek — hramadzianin Rasii. Da Biełarusi jon maje vielmi addalenaje dačynieńnie.
Jaŭhien Byčkoŭski. Fota z «UKantakcie»
Chto ž heta taki? Jaŭhien Byčkoŭski — uradženiec rasijskaha Biełharada, heta horad na miažy z Ukrainaj. Tam ža jon skončyŭ historyka-fiłałahičny fakultet miascovaha ŭniviersiteta. U adnym ź intervju Byčkoŭski kazaŭ, što jahony baćka — etničny biełarus. Praŭda, inšym razam jon užo nazyvaje siabie palakam. Maŭlaŭ, praz hetyja karani ŭ jaho i ŭźnik intares da našaj krainy.
Byčkoŭski — biznesoviec. U Biełharadzie jon vałodaje internet-kramaj «Laŭša 24», jakaja śpiecyjalizujecca na handli budaŭničymi materyjałami i elektratechnikaj. Na sajcie kramy napisana, što kuplajučy niešta ŭ hetym miescy, vy dapamahajecie raźvivacca internet-prajektu Byčkoŭskaha «Revalucyja śviadomaści» — heta adzin ź jahonych jutub-kanałaŭ. U Biełarusi takoha nie sustrenieš.
Taksama Byčkoŭski źjaŭlajecca lidaram biełharodskaha adździaleńnia partyi «Jabłyk», jakaja znachodzicca ŭ łahodnaj apazicyi da Pucina. Raniej na prezidenckich vybarach błohier padtrymlivaŭ Ksieniju Sabčak.
Jaŭhien Byčkoŭski. Fota z «Adnakłaśnikaŭ»
Paśla niadaŭniaj inicyjatyvy Śviatłany Cichanoŭskaj ab elektronnym hałasavańni z metaj dabicca pieramovaŭ z uładami Byčkoŭski vielmi emacyjna adreahavaŭ: «Cichanoŭskaja źlivaje pratest».
«Śvieta, jakija nachran pieramovy? Što za tryźnieńnie?! Vidavočna, što paśla takich zajavaŭ, ja amal na 100% mahu śćviardžać, što štab Cichanoŭskaj tak ci inakš afilavany z KDB Biełarusi! Ja nie viedaju, chto tam «daradčyki», ale toje, što heta adnaznačny źliŭ revalucyi i absalutna idyjocki krok — ja ni kropielki nie sumniavajusia!» — emacyjna reahavaŭ Byčkoŭski.
Jon zaklikaje Cichanoŭskuju nieadkładna pryjści da abjadnańnia z Volhaj Karač i razam dumać, jak treba dziejničać. «Ludzi aburajucca, jany bačać, što apazicyja topčycca na miescy. Vaša kvietkavaja palemika pararasła ŭ banalny źliŭ revalucyi».
Voś takoje emacyjnaje staŭleńnie da biełaruskich padziej. Zdavałasia b, što Byčkoŭski, kali i nie žyvie ciapier u Baranavičach ci Pinsku, to dakładna byŭ udzielnikam padziej leta-2020, siadzieŭ na sutkach i byŭ vymušany źjechać z krainy. Ale ŭ realnaści ŭ Biełarusi jaho nichto nie bačyŭ. Kali pahladzieć padpiski Byčkoŭskaha «UKantakcie» i fejsbuku, to adzinaja biełaruskaja supołka, na jakuju jon padpisany, — heta staronka Volhi Karač.
Błohieram Byčkoŭski staŭ u 2019 hodzie. U svaich kanałach «Revalucyja śviadomaści» i «Błoh Jaŭhien Byčkoŭskaha» rabiŭ videa amal pra ŭsie krainy byłoha SSSR: Ukrainu, Turkmienistan, Kazachstan. Byli tam roliki i pra Biełaruś. Ale prykładna z maja — červienia 2020 hoda jahonaja tematyka stanovicca praktyčna całkam pryśviečanaja Biełarusi. Byčkoŭski aktyŭna padtrymlivaje aryštavanaha Siarhieja Cichanoŭskaha, robić intervju z błohierami kštałtu Mikałaja Masłoŭskaha i Taćciany Martynavaj.
Dziela spraviadlivaści skažam, što praktyčna ŭvieś 2020 hod Byčkoŭski trymaŭsia ŭ roli naziralnika, robiačy niejkija vysnovy, ale nie ŭmiešvajučysia va ŭnutranyja pracesy. Ale ad pačatku 2021 hoda jon zajmaje pazicyju adnaho z aktaraŭ biełaruskaha apazicyjnaha žyćcia, unosić razład u adzinstva apazicyi i nie chavaje svaich prychilnaściaŭ.
Znachodziačysia ŭ efiry ŭ Volhi Karač Byčkoŭski zajaviŭ: «Volha Karač — heta budučy prezident Biełarusi. U jaje asobie ja baču lidara volnaj demakratyčnaj Biełarusi, u jaje na siońnia samaja viernaja i addanaja aŭdytoryja. Nijakaj alternatyvy Karač, aproč telehram-kanała Ściapana Puciły, jaki padtrymlivajecca ŭsioj Polščaj, niama. Volha ž usio robić adna, u jaje 100-pracentnaja palityčnaja budučynia ŭ Biełarusi».
Volha Karač. Fota «Dojče Viele»
«Z usich šmatlikich lidaraŭ apazicyi, mienavita Volha Jaŭhienaŭna Karač vyklikaje ŭ mianie najbolšuju pavahu. Čamu? Pieršaje. Jana sapraŭdny palityk! Nie chajpažer, nie papulist, nie čałaviek z tydniovaj historyjaj, jaki źjaviŭsia ź niadkul na hrebni revalucyjnaj chvali! U jaje jość historyja, imia i kankretnyja spravy!
Druhoje. Na siońnia jana adziny čałaviek, u jakoj choć niejak atrymlivajecca abjadnać supolnaść i apazicyju! Mała taho, jana vałodaje pa-sapraŭdnamu mahutnaj miedyjnaj placoŭkaj, akazvaje realnuju dapamohu paciarpiełym ad łukašenkaŭskaha teroru i ŭ svaich dysputach zaŭsiody prytrymlivacca dakładnaj i arhumientavanaj pazicyi!
I, narešcie, treciaje. Na hety momant Volha Karač pakul źjaŭlajecca adzinym palitykam, jaki realna zdolny arhanizavać pieramoŭny praces pamiž umoŭnym Zachadam i Kramlom, u abychod Łukašenki! A biez hetaha palityčny kryzis u Biełarusi nie vyrašyć!
Vynik: Ja nie mahu adkazvać za budučyniu, ale na hety histaryčny momant mienavita Volha Jaŭhienaŭna Karač — adziny biełaruski apazicyjny palityk, jaki asabista ŭ mianie vyklikaje razumieńnie, łohiku i adekvatnaść u dziejańniach! Upeŭnieny, tak budzie i ŭ budučyni!» — piša Byčkoŭski na svajoj staroncy «UKantakcie».
Składvajecca ŭražańnie, što Byčkoŭski havoryć toje, što sama Karač nie zdolnaja havaryć praz peŭnyja ŭmoŭnaści.
«Vidavočna, što kanflikt pamiž Karač i Viačorkam vychodzić na zusim novy ŭzrovień. Źviazana heta z tym, što brend «Cichanoŭskaja» akazaŭsia całkam uzurpavany peŭnym kołam asob, dzie ŭ pryncypie nijak nie ŭličvajecca alternatyŭny punkt hledžańnia, u tym liku i Volhi Karač», — kaža Byčkoŭski.
Jahonaja rola zaklučajecca ŭ tym, kab usialak sprabavać źmienšyć aŭtarytet Cichanoŭskaj i pracavać na pavyšeńnie rejtynhu Volhi Karač. Sam Byčkoŭski havoryć, što zajmajecca Biełaruśsiu dla taho, kab budučy prezident Biełarusi Karač padtrymała jaho kandydaturu na prezidenckich vybarach u Rasii. Niakiepskija ambicyi dla pravincyjnaha błohiera.
Inšaja asoba, jakuju aktyŭna pijaryŭ Byčkoŭski, — heta Ihar Makar, najbližejšy paplečnik Karač. Błohier nazyvaje byłoha siłavika «Džokieram».
«Džokier — toj, chto moža imhnienna pamianiać situacyju. Makar — heta taja asoba, jakaja moža skancentravać palityčny pratest i abjadnać vakoł siabie siłavikoŭ. Makar idealny ŭ vykanańni roli tarana. Za im moža pajści «voŭčaja zhraja» siłavikoŭ, jon vielmi papularny ŭ hetym asiarodździ», — kaža Byčkoŭski. Pry hetym adznačaje, što palityčnaj budučyni ŭ Makara niama.
Jašče adzin srodak infarmacyi, dzie pastajanna ŭspłyvaje Byčkoŭski — heta «Radyjo 97», jakoje bazujecca ŭ Polščy.
Jon źjaŭlajecca ŭ radyjoefiry amal štotydzień, dzie zajmajecca tym samym — uznosić Karač i bje pa reputacyi Cichanoŭskaj i jaje kamandy. Takija razborki nijakaj karyści dla ruchu za pieramieny nie niasuć, tolki ŭnosiać razład i lišnija svarki. Z boku moža vyhladać, što jakraz na heta ŭsio i raźličana.
Hladzi jašče: Chto takaja Volha Karač, jakaja choča padsiadzieć Cichanoŭskuju?
