Štodzionnyja kantakty ź inšymi ludźmi ŭzmacniajuć našu imunnuju sistemu. U 1989 hodzie epidemijołah Devid Strejkien upieršyniu ahučyŭ «hihijeničnuju hipotezu», zhodna ź jakoj zališniaja čyścinia vyklikaje defiekty imunnaj sistemy, što pryvodzić da takich zachvorvańniaŭ, jak alerhija abo dychavica. Nasamreč mnohija źviestki paćviardžajuć ideju, što ŭździejańnie roznych mikrobaŭ dapamahaje našaj imunnaj sistemie raźvivacca.
Adnak za apošni hod ludzi šmat siadzieli doma, minimizavali kantakty ź inšymi i značna bolš uvahi nadavali dezynfiekcyi. Jak heta paŭpłyvała na imunnuju sistemu?
Hrem Ruk, mikrabijołah z Univiersiteckaha kaledža Łondana, prapanavaŭ alternatyvu hihijeničnaj hipotezie ŭ 2003 hodzie. «Hipoteza starych siabroŭ» Ruka śćviardžaje, što pa miery evalucyi čałavieka imunnaja sistema prystasavałasia da mikrobaŭ, ź jakimi my sutykajemsia štodnia. Ale kab naša sistema raźvivałasia i dalej, nieabchodna padviarhać arhanizm uździejańniu hetych «starych siabroŭ» — mikrobaŭ, piša The Guardian.
«Naša imunnaja sistema — heta sistema navučańnia, jak i mozh», — tłumačyć Ruk. Naša pryrodžanaja imunnaja sistema ŭzmacniajecca «adaptyŭnaj» imunnaj sistemaj, što źbiraje źviestki pra mikroby, ź jakimi my sutykajemsia štodnia, i vyznačaje, jakija ź ich biaśpiečnyja, a jakija nie. Biez hetych źviestak imunnaja sistema pačynaje atakavać tyja mikraarhanizmy, jakija nie pavinna, što moža vyklikać alerhiju ci dychavicu.
Pakul čałaviek stanie darosłym, jon sutykniecca z tryljonami mikraarhanizmaŭ, jakija sfarmujuć jaho mikrabijom, što budzie dastatkova stabilnym i ŭstojlivym. Tamu hod izalacyi dla darosłych naŭrad ci niejak surjozna paŭpłyvaje na miechanizmy imunnaj sistemy. Adnak što tyčycca dziaciej, to tut navukoŭcy zaniepakojenyja nastupstvami izalacyi dla maładych arhanizmaŭ. Znachodžańnie ŭ pamiaškańni na praciahu doŭhaha času biez kantaktaŭ ź ludźmi i pryrodaj abmiažoŭvaje kolkaść mikrobaŭ, što musiać traplacca na šlachu dziaciej padčas farmavańnia ich imunnaj sistemy.
Bajram Brajdł, imunołah z Univiersiteta Hvielfa ŭ Kanadzie, z pačatku hłabalnaj izalacyj nie turbavaŭsia nakont raźvićcia imunitetu ŭ dziaciej, bo dzieci mohuć nie vychodzić z doma na praciahu niekalkich tydniaŭ, kali chvarejuć, abo padčas vakacyj. Adnak prablema ŭ tym, što izalacyja raściahnułasia na hod, tamu chutčej za ŭsio heta budzie mieć niehatyŭny ŭpłyŭ na našych dziaciej, ličyć Brajdł.
Roznyja daśledavańni vyjavili, što prablemy ŭźnikajuć čaściej, kali małyja dzieci majuć abmiežavanaje ŭździejańnie mikrobaŭ. Ekśpierty ličać, što, akramia alerhii i aŭtaimunnych zachvorvańniaŭ, drennaja imunarehulacyja moža pryvieści da dyjabietu, atłuścieńnia abo sardečna-sasudzistych zachvorvańniaŭ.
Adnak dakładna daviedacca, ci vyklikała izalacyja imunałahičnyja parušeńni ŭ dziaciej, navukoŭcy zmohuć tolki praź niekalki hadoŭ.
Jašče adno mahčymaje nastupstva izalacyi — uspyška virusnych infiekcyj. Daśledčyki miarkujuć, što naša imunnaja sistema budzie horš prystasavanaj da baraćby ź virusami paśla hoda samaizalacyi. Naprykład, z kastryčnika da listapada 2020 hoda ŭ Hankonhu znoŭ adčynilisia škoły, paśla čaho była zafiksavanaja vialikaja kolkaść uspyšak prastudy. Ekśpierty miarkujuć, što taki efiekt budzie ŭ mnohich škołach paśla zakančeńnia łakdaŭnu.
U studzieni 2021 hoda daśledčyki vyjavili, što ŭzrovień zaražeńnia hrypam źniziŭsia da minimumu, jaki apošni raz naziraŭsia 130 hod tamu. Hetamu paspryjała sacyjalnaja dystancyja i intensiŭnaja dezynfiekcyja ruk. Z adnaho boku, heta moža padacca dobraj navinoj, ale prablemy mohuć pačacca padčas nastupnaj uspyški hrypu.
Sprava ŭ tym, što virus hrypu muciruje štohod, tamu kožny hod navukoŭcy zmahajucca z pryncypova roznymi varyjantami. Heta značyć, što kožny hod źmianiajucca i pryščepki, bo daśledčyki raspracoŭvajuć vakcynu na asnovie štamu, jaki byŭ raspaŭsiudžany apošnim. Adnak paśla izalacyi navukoŭcam pryjdziecca mieć spravu z vakcynami, zasnavanymi na varyjantach, što cyrkulavali dva hady tamu, a nie letaś.
Tamu ekśpierty śćviardžajuć, što dzieciam nieabchodna bolš być na śviežym pavietry i ŭzajemadziejničać z navakolnym asiarodździem, kab uzmacniać svaju imunnuju sistemu.
