Fota Uładzia Hrydzina.
7 lipienia Asipovicki rajonny sud vynies vyrak Arciomu Dubskamu — hod kałonii.
Chłopca sudzili pa artykule 415 KK «Parušeńnie adbyćcia pakarańnia ŭ vyhladzie abmiežavańnia voli». Artykuł praduhledžvaje tolki turmu, ale niadaŭni vypadak z Maksimam Dašukom abnadziejvaŭ na bolš aptymistyčny vynik pasiadžeńnia.
Arciom Dubski — adzin z udzielnikaŭ «Pracesu čatyrnaccaci», jaki byŭ asudžany da dvuch hadoŭ «chatniaj chimii». Pakarańnie jon adbyvaŭ u Asipovičach. Zrešty, minułaj vosieńniu paśla cisku z boku milicyi i śpiecsłužbaŭ Dubski byŭ vymušany prasić prytułak va Ukrainie.
U lutym Arcioma zatrymali na Homielskim čyhunačnym vakzale, kali chłopiec jechaŭ u Minsk na akcyju prymierkavanuju da Dnia śviatoha Valancina. Dva miesiacy «maładafrontaviec» pravioŭ u asipovickim i babrujskim izalatary.
Ale pierad startam prahramy «Uschodniaje partniorstva» Dubskaha niečakana vykinuli z turmy. Amal adrazu paśla vyzvaleńnia jon pryniaŭ aktyŭny ŭdzieł u haładoŭcy salidarnaści ź Mikałajem Aŭtuchovičam.
Dziaržaŭny abvinavaŭca Łazarenka zapatrabavaŭ vynieści Dubskamu pakarańnie ŭ vyhladzie paŭhodu kałonii. U suviazi z tym, što chłopiec nie adbyŭ jašče hod «chatniaj chimii», prakuror prapanavaŭ zamianić jaho jašče na šeść miesiacaŭ turmy.
Sudździa Žanna Šarabajka zadavoliła patrabavańni prakurora całkam. Arciomu kajdanki apranuli prosta ŭ sudovaj zali.
