Pra heta kazaŭ i kiraŭnik Kruhłaha stała demakratyčnych siłaŭ Juryj Vaskrasienski, i palityčny analityk Andrej Parotnikaŭ, i insajderski telehram-kanał «Nik i Majk». Ci mahčyma heta zrabić čysta technična?
Prezidenckija vybary pryznačajucca za try miesiacy da dnia hałasavańnia. Z refierendumam usio praściej, tamu tak, u teoryi heta mahčyma.
Faktyčna dla arhanizacyi refierendumu patrebna krychu bolš za miesiac. Pavodle zakanadaŭstva, kiraŭnik dziaržavy maje prava pryznačać respublikanski refierendum i vyznačać arhanizacyjnyja mierapryjemstvy pa zabieśpiačeńniu jaho praviadzieńnia. Heta značyć, što Alaksandr Łukašenka ŭ luby momant moža abvieścić ab dacie praviadzieńnia refierendumu, a taksama ahučyć pytańnie ci pytańni, jakija na jaho vynosiacca.
Što tyčycca farmavańnia kamisii, to terytaryjalnyja kamisii pavinny być utvoranyja nie paźniej, čym za miesiac da praviadzieńnia refierenduma. Učastki dla hałasavańnia — nie paźniej, čym za 25 dzion. A ŭčastkovyja vybarčyja kamisii, tyja samyja ludzi, jakija buduć padličvać hałasy, nie paźniej za 20 dzion. Tamu čysta technična ździejśnić heta dastatkova nieskładana.
Adnak na spravie my majem tolki adnu ź viersij Kanstytucyj, jakuju apublikavaŭ na svaim sajcie Vaskrasienski, hetyja praŭki jašče nie zaćviardžaŭ Łukašenka. Kiraŭnik vierchniaj pałaty parłamienta Natalla Kačanava kazała, što prajekt novaj Kanstytucyi Łukašenku pieradaduć u pačatku žniŭnia.
Taksama anansujecca «abmierkavańnie» novaj Kanstytucyi siarod hramadzian. Nakolki heta budzie doŭhi praces, skazać ciažka, ale naŭrad ci atrymajecca pravieści sam refierendum užo ŭ vieraśni.
Što tyčycca arhanizacyi na praciahu miesiaca, to tak było ŭ 2004 hodzie, kali na refierendumie ŭzdymałasia pytańnie ab skasavańni abmiežavańnia prezidenckich terminaŭ dvuma. Tady ab praviadzieńni refierenduma Alaksandr Łukašenka abviaściŭ u efiry ŭsich dziaržaŭnych telekanałaŭ 7 vieraśnia. Cikava, što tahačasnaja pres-sakratarka kiraŭnika krainy Natalla Piatkievič havaryła, što zvarot budzie tyčycca situacyi z zakładnikami ŭ Biesłanie. Samo hałasavańnie prachodziła 17 kastryčnika, to-bok ad momant abviaščeńnia da momantu hałasavańnia prajšło 40 dzion.
