Za što karali biełarusaŭ ŭ lipieni? Na asnovie dadzienych vałancioraŭ «Viasny» «Naša Niva» sabrała top samych absurdnych administracyjnych spraŭ.
Biełyja arkušy na voknach
42-hadovaja Maja Šatochina i 26-hadovy Juryj Klimašeŭski atrymali pa 15 sutak za «vyražeńnie svaich palityčnych intaresaŭ šlacham raźmiaščeńnia na aknie adnaho biełaha arkuša papiery». U hetym ža «pravinilisia» jašče dvoje minčukoŭ — 34-hadovy Dzianis Kulikoŭ i 31-hadovy Andrej Muraŭjoŭ. Sudździa Maryja Jarochina, jak i Julija Čyž, taksama paličyła, što im i milicyjanieram bolš bačna, što možna vyviešvać na vokny svaich kvater, a što nie. Dzianisa pa artykule 24.23 KaAP aryštavali na 13 sutak, Andreja — na 28.
Jašče adna minčanka Anastasija Jemieljanava atrymała ad sudździ Alaksandra Vołka štraf na 1450 rubloŭ: padstavaj dla zatrymańnia ŭ jaje vypadku staŭ bieły arkuš, jaki visieŭ na 12-m paviersie doma. A 44-hadovaha Andreja Hrynčyka za taki ž bieły arkuš pakarali ŭvohule 25 sutkami. Mužčyna tłumačyŭ na sudzie, što vyviesiŭ jaho jak simvał taho, što jon vystupaje suprać hvałtu, ale ŭ traktoŭcy milicyjanieraŭ bieły arkuš papiery — heta «niezakonny biuleteń, jaki zaklikaje da pratestnych mierapryjemstvaŭ i źjaŭlajecca adzinočnym pikietam».
Za bieł-čyrvona-bieły ściah, jaki nikomu nie byŭ bačny
Ściah, što visieŭ na ŭvachodzie ŭ kładoŭku, i nie pieraškadžaŭ nikomu, akramia «nieabyjakavaha hramadzianina», staŭ pryčynaj 15-sutačnaha aryštu 51-hadovaha Dźmitryja Asiejeva. Dźmitryj na sudzie akcentavaŭ uvahu na tym, što ściah nikomu nie byŭ bačny, tamu nielha skazać, što jon pravodziŭ pikietavańnie, ale dla sudździ Centralnaha rajona Dźmitryja Karsiuka taki arhumient nie spracavaŭ.
Za patencyjna mahčymy ŭdzieł u niesankcyjanavanym masavym mierapryjemstvie
57-hadovuju Marynu Pietražyckuju zatrymali, tamu što milicyjanieram nibyta pastupiła infarmacyja pra jaje mahčymy ŭdzieł u niesankcyjanavanym mierapryjemstvie. Ale aryštavali jaje ŭ vyniku za niepadparadkavańnie, jakoje žančyna zmahła niejkim čynam akazać u kajdankach.
15-sutačnym aryštam žančynu pakaraŭ sudździa Dźmitryj Karsiuk.
Za repost z kanała, pryznananaha ekstremisckim
Da 34-hadovaha Aleha Prałata milicyjaniery pryjšli ź pieratrusam. Mužčyna prademanstravaŭ im taksama źmiest svajho mabilnaha telefona, adkul supracoŭniki daviedalisia pra reposty z kanałaŭ, što ličacca ekstremisckimi.
Jak vynik — 14 sutak pa artykule 19.11 KaAP (raspaŭsiud infarmacyjnaj pradukcyi, uklučanaj u Respublikanski śpis ekstremisckich materyjałaŭ). Takoje rašeńnie vyniesła sudździa Maryja Jarochina.
Za skinutyja sa stała piśmovyja prynaležnaści ŭ RUUS
Piensijanierku Ału Sposab zatrymali, kali jana viartałasia z kramy. Jak śviedčyli milicyjaniery, z žančynaj chacieli pravieści prafiłaktyčnuju hutarku i adpuścić, ale ŭ słužbovym kabiniecie Frunzienskaha RUUSa jana pačała pavodzić siabie ahresiŭna, rukoj skinuła prynaležnaści sa stała, nie reahavała na prośby supakoicca. Hetych faktaŭ chapiła, kab skłaści na 61-hadovuju žančynu pratakoł pa artykule 19.1 KaAP (drobnaje chulihanstva).
U traktoŭcy sudździ Maryi Jarochinaj chulihanstva paciahnuła na 11 sutak žyćcia za kratami.
Za cišotku na bałkonie «niapravilnych» koleraŭ
Zmahańnie sa spałučeńniem bieł-čyrvona-biełych koleraŭ u krainie praciahvajecca. Biełaja cišotka z čyrvonaj pałasoj pasiaredzinie, jakuju Alesia Janačkina paviesiła na bałkonie sušycca, nahadała milicyjanieram ściah. Jak śledstva — pratakoł pa artykule 24.23 KaAP za niesankcyjanavanaje pikietavańnie i štraf u pamiery 2900 rub (100 bazavych).
