U vypiscy z ADR paviedamlajecca, što pracedura likvidacyi kampanii była zapuščana 22 červienia. Rašeńnie ab likvidacyi było pryniata ŭłaśnikam «Rełsoft».
Zhodna z ADR, 100% doli «Rełsoft» naležać Jaŭhienii Čarniaŭskaj — dačce Juryja Zisiera i Julii Čarniaŭskaj.
Dev.by źviazaŭsia ź Jaŭhienijaj, kab udakładnić pryčyny likvidacyi «Rełsoft». Jana koratka prakamientavała heta rašeńnie.
— Kampanija adpraŭlenaja ŭ likvidacyju ŭ suviazi z faktyčnaj niemahčymaściu ažyćciaŭlać svaju haspadarčuju dziejnaść. Ale hety praces vielmi doŭha ciahniecca. Dyrektar «Rełsoft» ciapier znachodzicca pad padpiskaj ab nierazhałošvańni. Heta źviazana sa spravaj «TUT BAJ MIEDYJA». Viadoma, vielmi škada. Kampanija isnavała stolki hadoŭ.
«Rełsoft» była ŭtvorana ŭ 2007 hodzie na asnovie isnujučaha z 1992 hoda departamienta raspracoŭki prahramnaha zabieśpiačeńnia UP «Nadziejnyja prahramy». Hałoŭnym zakazčykam «Rełfost» była ńju-jorkskaja kampanija Instant Information Inc, jakaja zajmałasia raspracoŭkaj technałohij apracoŭki danych dla Wall Street. Soft «Rełsoft» u svoj čas vykarystaŭ TUT.BY. Pra heta ŭ kamientary dev.by raniej zhadvaŭ suzasnavalnik TUT.BY Kirył Vałošyn.
Da niadaŭniaha času «Rełsoft» była rezidentam PVT (ustupiła ŭ červieni 2007 hoda). Ale, miarkujučy z adsutnaści kampanii ŭ abnoŭlenym śpisie rezidentaŭ, z parku jaje ŭžo vyklučyli.
Pa słovach Jaŭhienii Čarniaŭskaj, heta adbyłosia nie pa inicyjatyvie «Rełsoft». Kampanii i asabista joj nichto nie paviedamlaŭ ab vyklučeńni z PVT, pra heta jana daviedałasia ad dev.by.
