Fota Uładzia Hrydzina.
Aktyvist «Maładoha frontu» Arciom Dubski, jakoha 7 lipienia Asipovicki sud pakaraŭ hodam źniavoleńnia, abviaściŭ haładoŭku pratestu ŭ Babrujskim śledčym izalatary.
Pra heta paviedamiła maci Arcioma Alena Dubskaja paśla siońniašniaha spatkańnia z synam.
Maci raspaviała, što 16 lipienia Arcioma naviedała advakat i jany napisali zajavu na prysud. Užo na nastupny dzień administracyja śledčaha izalatara zapatrabavała ad Arcioma, kab jon napisaŭ zajavu z prośbaj pieravieści jaho ŭ papraŭčuju kaloniju adbyvać pakarańnie.
Pavodle zakanadaŭstva, pakul nie pastupiać adkazy ad usich ustanovaŭ, kudy skardzicca pakarany, jon moža znachodzicca ŭ śledčym izalatary.
Arciom skazaŭ maci, što zachvareŭ, adnak lekary admovilisia davać jamu leki, a administracyja kałonii stvaryła dla jaho žorstkija ŭmovy. I ŭ adkaz na heta Arciom abviaściŭ haładoŭku.
Arciom Dubski ŭžo haładaŭ niadaŭna razam ź inšymi pradstaŭnikami apazycyi na znak salidarnaści z vaŭkavyskimi pradprymalnikami Mikałajem Aŭtuchovičam,Juryjem Lavonavym, Uładzimieram Asipienkam.
Mikałaj Aŭtuchovič prymaŭ haładoŭku z 16 krasavika pa 16 lipienia.
***
Lider Asipovickaj filii Maładoha Frontu Arciom Dubski naradziŭsia 1 kastryčnika 1987 h. u Asipovičach. Vučyŭsia ŭ siaredniaj škole, paśla skončyŭ asipovicki licej. U Maładym froncie ź lutaha 2007 hoda. Nieadnarazova zatrymlivaŭsia supracoŭnikami milicyi i KDB.
Arciom Dubski byŭ pakarany dvuma hadami abmiežavańnia voli pa «spravie 14‑ci». Jaho abvinavacili ŭ arhanizacyi hrupavych dziejańniaŭ, jakija nibyta pryviali da masavych biesparadkaŭ padčas akcyj pratestu pradprymalnikaŭ. 3 sakavika była raspačataja čarhovyja kryminalnaja sprava za parušeńnie praviłaŭ adbyćcia pakarańnia, kali jon źjechaŭ biez dazvołu ŭčastkovaha inśpiektara va Ukrainu. 7 lipienia Asipovicki sud pakaraŭ chłopca hodam pazbaŭleńnia voli za parušeńnie pravił adbyćcia pakarańnia ŭ «spravie 14‑ci».