U ofisie Kurca, u štabie jaho Aŭstryjskaj narodnaj partyi (OeVP) u Vienie, a taksama ŭ Ministerstvie finansaŭ u sieradu prajšli vobšuki. Pavodle źviestak prakuratury, rasśledavańnie viadziecca suprać samoha kanclera, a taksama suprać jašče dzieviaci čałaviek.
Pavodle zajavy prakuroraŭ, sutnaść abvinavačvańniaŭ u tym, što ŭ 2016-2018 hadach «srodki Ministerstva finansaŭ byli vykarystanyja dla finansavańnia častkova padtasavanych apytańniaŭ hramadskaj dumki, jakija słužyli vyklučna palityčnym i partyjnym intaresam». U pryvatnaści, pa viersii prakuratury, urad kuplaŭ u vydańnia rekłamu ŭ abmien na raźmiaščeńnie vyhadnych dla partyi Kurca publikacyj.
U pieryjad, ab jakim idzie havorka, Kurc uznačaliŭ «Aŭstryjskuju narodnuju partyju» i pryvioŭ jaje da ŭłady, kali jana stvaryła kaalicyjny ŭrad sumiesna z krajnie pravaj Partyjaj svabody.
U zajavie prakuratury nie nazyvajecca vydańnie, u jakim raźmiaščalisia hetyja apytańni hramadskaj dumki, ale aŭstryjskaja presa śćviardžaje, što havorka idzie pra tabłoid Osterreich. Chołdynh, da jakoha naležyć hetaja hazieta, u sieradu zajaviŭ, što nie braŭ dziaržaŭnyja srodki za rekłamu ŭ abmien na arhanizacyju vyhadnaha dla Kurca apytańnia.
Sam Kurc taksama kaža, što ni ŭ čym nie vinavaty. «Ja pierakanany, što i hetyja abvinavačvańni apynucca łžyvymi», — skazana ŭ zajavie kanclera. Kiraŭnik urada nastojvaje, što tekstavyja paviedamleńni, jakija prakurory vykarystoŭvajuć u jakaści dokazu jaho viny, byli vydranyja z kantekstu.
Pradstaŭniki Aŭstryjskaj narodnaj partyi ličać, što prakuratura stavicca da hetaj palityčnaj siły z praduziataściu. Adzin z deputataŭ OeVP zajaviŭ, što rasśledavańnie inicyjavali «levyja jačejki» ŭ ofisie prakurora.
Prezident Aŭstryi Alaksandr Van der Bielen nazvaŭ skandał «surjoznaj» padziejaj. Jon taksama zaklikaŭ palitykaŭ pavažać niezaležnaść suda i prakuratury i ŭstrymacca ad abvinavačvańniaŭ u ich palityčnaj praduziataści.
