Pieršy namieśnik kiraŭnika Śledčaha kamiteta Aleh Šandarovič zajaviŭ pra 2700 čałaviek, jakija prachodziać pa «pratesnych» kryminalnych spravach.
Heta było ŭ kancy vieraśnia. Paśla taho kryminalnyja spravy byli zaviedzienyja na prykładna 200 čałaviek za kamientary adnosna hibieli minskaha ajcišnika Andreja Zielcera i supracoŭnika KDB. Byli i novyja kryminalnyja spravy pa inšych epizodach. Akramia taho, u statystyku Šandaroviča, chutčej za ŭsio, nie ŭvachodziać spravy, jakija farmalna majuć ekanamičny charaktar, ale razhladajucca pravaabaroncami i mižnarodnaj supolnaściu jak palityčnyja: sprava Tutbaja z 15 fihurantami, sprava Viktara Babaryki i h.d.
Takim čynam, na siońnia majem prykładna 3000 fihurantaŭ kryminalnych spraŭ palityčnaha charaktaru. Miž tym aficyjny status palitviaźniaŭ na siońnia maje 801 čałaviek.
Status palitviaźnia razam vyznačajuć pradstaŭniki hrupy pravaabarončych arhanizacyj ź mižnarodnaj reputacyjaj — usie jany za apošni čas delehalizavanyja ŭ Biełarusi. Hety praces adbyvajecca pa vynikach razhladu na asnovie vyznačanych kryteraŭ.
Pa-pieršaje, nie ŭsie imiony zatrymanych pa kryminalnych spravach viadomyja pravaaabroncam. Z prykładna 3000 jany na siońnia viedajuć 1719. Mnohija zastajucca nieviadomyja hramadskaści.
Pa-druhoje, pravaabaroncy nie ličać palitviaźniami ludziej, jakija znachodziacca na chatniaj chimii ci doma pad padpiskaj pra niavyjezd.
Pa-treciaje, u śpis nie ŭvachodziać tyja, chto ŭžo adbyŭ svoj termin i vyjšaŭ na svabodu. Jak tolki čałavieka vyzvalajuć, navat pad padpisku, choć sprava i nie spynienaja, jon sa śpisu źnikaje.
Pa-čaćviortaje, jak praviła, palitviaźniami da suda nie pryznajuć abvinavačvanych pa «terarystyčnych artykułach». U suviazi z surjoznaściu zakidaŭ pravaaabaroncy čakajuć materyjałaŭ spravy i suda, navat kali hramadskaść bačyć u spravach čystuju mirnuju palityku, jak u vypadku byłoha top-śledčaha Jaŭhiena Juškieviča.
Pa-piataje, palitviaźniami nie pryznajuć źniavolenych za akty hvałtu. Było, prykładam, šmat krytyki na adras pravaabaroncaŭ za vypadak sa Stanisłavam Baranovičam. Hety były palitviazień z Płoščy-2010 paŭtorna trapiŭ pad sud, kali z kułakami kinuŭsia baranić ad AMAPa minskich studentaŭ-anarchistaŭ, jakich zatrymlivali ŭ Minsku na prypynku hramadskaha transpartu. Baranoviča palitviaźniem tady tak i nie pryznali.
Čytajcie taksama: Pamiatajecie palitviaźnia Baranoviča? Adbivaŭ anarchistaŭ ad cicharoŭ, adsiadzieŭ try hady ŭ kałonii, a ciapier bjecca ŭ kułačnych bajach na YouTube
Usie razam hetyja faktary i pryvodziać da raźbiežki ŭ statystycy.
U bližejšy čas kolkaść palitviaźniaŭ budzie raści. Vierahodna, status atrymaje rešta schoplenych za kamientary ŭ sacyjalnych sietkach. A pa miery sudoŭ — i novyja źniavolenyja pa inšych spravach.
Niejmaviernaja dla jeŭrapiejskaj krainy XXI stahodździa kolkaść palitviaźniaŭ praciahvaje raści.
