Sabor Rastva Baharodzicy ŭ Hłybokim, globus.tut.by
Siońnia ŭ «Gazeta Wyborcza» vyjšaŭ materyjał Andreja Pačobuta pad nazvaj «Nieznane groby NKWD».
Aŭtar piša pra pareštki ludziej, znojdzienyja na minułym tydni ŭ sutareńniach hłybockaha sabora Rastva Baharodzicy. Žurnalist vykazvaje zdahadku, što heta rasstralanyja orhanami NKUS hramadzianie polskaj dziaržavy. Jon źviazvaje trahiedyju z ustalavańniem savieckaj ułady na dałučanych u 1939 h. da BSSR terytoryjach Zachodniaj Biełarusi.
Nastajaciel carkvy Rastva Baharodzicy ajciec Sierhij Hramyka paviedamiŭ našamu vydańniu, što hilzaŭ pobač z kaściami nie było. Jaho abviarhaje miascovy aktyvist ruchu «Za svabodu» Jarasłaŭ Biernikovič. Jon kaža pra hilzy ad pistaletu nahan, choć znojdzienyja čarapy prastrelenymi i nie byli. Pry masavych zabojstvach, kaža Biernikovič, nie celili ŭ hałovy, a stralali nierazborliva.
«Na płoščy za 50 mietraŭ ad sabora balšaviki ŭ 1939 hodzie zrabili sud. Tamu, vierahodna, ludziej rasstrelvali ŭ sutareńniach carkvy. I strełaŭ nie było čuvać», — adznačaje demaktyvist.
Prakuraturaj Hłybokaha pravodzicca śledstva. Ale čałaviečyja kości ŭžo pierazachavali ŭ tych samych sutareńniach. U prakuratury pakul adznaznačna skazać nie mohuć, ad čyich ruk zahinuli ludzi. Z vyvadami tam nie śpiašajucca. Adna z najbolš vierahodnych viersij, što heta achviary nacystaŭ.
U pres‑słužbie pasolstva Polščy ŭ Biełarusi paviedamili, što jany sočać za raźvićciom padziej vakoł znojdzienych pareštkaŭ. I nie vyklučana, što polskija dypłamaty buduć nastojvać na praviadzieńni ekshumacyi.
Nahadajem, što padčas čystki sutareńniaŭ sabora ŭ Hłybokim byli znojdzienyja čałaviečyja kości. Ahulnuju kolkaść ich nie padličvali. Ale heta nie mienš za 20 čałaviek.
