Jeŭrapiejski centr kanstytucyjnych pravoŭ i pravoŭ čałavieka (ECCHR) i Suśvietnaja arhanizacyja suprać katavańniaŭ (OMCT) padali fiederalnamu prakuroru Hiermanii zajavu ab złačynstvie ŭ suviazi ź dziejańniami biełaruskich siłavikoŭ, jakija prymali vielmi žorstkija miery suprać mirnych demanstrantaŭ paśla prezidenckich vybaraŭ u Biełarusi. U dakumiencie nazvanyja imiony i proźviščy šaści vysokapastaŭlenych supracoŭnikaŭ siłavych viedamstvaŭ, jakija, pa dadzienych pravaabaroncaŭ, ździejśnili złačynstvy suprać čałaviečnaści, paviedamiŭ ECCHR u Bierlinie ŭ paniadziełak, 1 listapada.
U hetaj ža zajavie ŭtrymlivajecca infarmacyja ab masavych zatrymańniach, katavańniach, źniknieńni ludziej, seksualnym hvałcie i pieraśledzie pa palityčnych matyvach.
«My čakajem, što fiederalny prakuror inicyjuje praceduru rasśledavańnia ŭ dačynieńni da adkaznych asob, pakolki ŭ samoj Biełarusi ŭ ahladnaj budučyni rasśledavańnia parušeńniaŭ mižnarodnaha zakanadaŭstva nie pradbačycca», — zajaviŭ dyrektar prahramy ECCHR pa prablemach mižnarodnych złačynstvaŭ i pravavoj adkaznaści Andreas Šuler (Andreas Schüller).
Pavodle jaho słoŭ, «paciarpiełyja pavinny mieć mahčymaść realizavać svaje pravy», a Hiermanii «varta syhrać pry hetym viadučuju rolu». Rasśledavańnie pavinna pravodzicca ŭ ramkach Jeŭrapiejskaj inicyjatyvy dla vyśviatleńnia vinavatych u złačynstvach suprać mirnych demanstrantaŭ u Biełarusi, ukazaŭ dalej Šuler.
Hienieralny sakratar OMCT Džerald Stabrok paviedamiŭ ab vidavočnych dokazach naŭmysnaha i sistematyčnaha charaktaru katavańniaŭ, što dazvalaje kvalifikavać ich jak złačynstvy suprać čałaviečnaści. Heta paćviardžajuć roznyja mižnarodnyja rasśledavańni, u tym liku praviedzienaje Maskoŭskim miechanizmam ABSIE, ukazaŭ Stabrok.
