Premjer-ministr Polščy Matevuš Maraviecki aścierahajecca eskałacyi kanfliktu ź Biełaruśsiu. «U ciapierašni čas situacyja stabilnaja, ale jana stanovicca ŭsio bolš pahroźlivaj. Mihranty vykarystoŭvajucca Biełaruśsiu ŭ jakaści zbroi. I ich metami źjaŭlajucca Hiermanija, Francyja, Niderłandy», — zajaviŭ kiraŭnik polskaha ŭrada ŭ intervju haziecie Bild.
Maraviecki aścierahajecca pierarastańnia situacyi ŭ adkryty vajenny kanflikt. Na adpaviednaje pytańnie haziety jon adkazaŭ «My nie možam hetaha vyklučyć».
Pavodle jaho pierakanańnia, Alaksandr Łukašenka i Uładzimir Pucin, «vidavočna, iduć stratehii, nakiravanaj na toje, kab usialić niaŭpeŭnienaść, destabilizavać Zachad. My nie viedajem, što jašče jany płanujuć. Mahčyma taksama, što kryzis na miažy pryznačany tolki dla taho, kab adciahnuć uvahu ad novych vajskovych napadaŭ, jakija Pucin rychtuje va Ukrainie», — pierakanany Maraviecki.
Palityk zajaviŭ, što palaki poŭnyja rašučaści lubymi srodkami abaranić «svaju miažu, uschodniuju miažu Jeŭropy i NATA». «Kali my nie zmožam utrymać tysiačy mihrantaŭ siońnia, to chutka ich buduć sotni tysiač, miljony, jakija nakiroŭvajucca ŭ Jeŭropu», - upeŭnieny Maraviecki.
U suviazi z hetym kiraŭnik polskaha ŭrada padvierhnuŭ rezkaj krytycy mihracyjnuju palityku, jakaja pravodziłasia ŭ apošnija hady ŭradam kanclera Anhieły Mierkiel. «Jana pastaviła pad pahrozu suvierenitet mnohich jeŭrapiejskich dziaržaŭ i sparadziła štučny multykulturalizm. Heta była niebiaśpiečnaja palityka dla Jeŭropy i dla ŭsiaho śvietu», — ličyć Maraviecki.
