Fota ilustracyjnaje
Ekanamisty źviartajuć uvahu na pastanovu «Ab nienaličeńni amartyzacyi pa asnoŭnych srodkach i materyjalnych aktyvach u 2018 i nastupnych hadach».
Tam havorycca, što «z metaj stvareńnia ŭmoŭ dla efiektyŭnaj pracy» pastanoŭlena, što «arhanizacyi […] majuć prava pryniać rašeńnie ab nienaličeńni amartyzacyi pa asnoŭnych srodkach i niemateryjalnych aktyvach, jakija vykarystoŭvajucca ŭ pradprymalnickaj dziejnaści, za vyklučeńniem asnoŭnych srodkaŭ, jakija vykarystoŭvajucca pry akazańni žyllova-kamunalnych i transpartnych pasłuh nasielnictvu, jakija subsidujucca za košt biudžetnych srodkaŭ».
Jak razumieć hetuju abrakadabru?
Amartyzacyja — instrumient viartańnia ŭkładzienych srodkaŭ. Heta vydatki, jakija śpisvajucca z prybytkaŭ. Nienaličeńnie amartyzacyi viadzie da zanižeńnia sabiekoštu i fiktyŭnych prybytkaŭ.
Prosta patłumačyć sens amartyzacyi na dziaržaŭnym pradpryjemstvie možna tak: zavod N kupiŭ novy stanok, za jakim rabočy robić niejki pradukt. Pry raźliku koštu praduktu, tudy treba zakładvać nie tolki zarobak rabočaha, košt syraviny i kamunałku, ale i canu novaha stanka. Tak možna zrazumieć, ci prybytkovaje ŭvohule toje, čym ty zajmaješsia.
Kali jość dazvoł nie naličvać amartyzacyju, to heta aznačaje źnižeńnie sabiekoštu i źjaŭleńnie fiktyŭnych prybytkaŭ.
Va ŭsim śviecie heta pracuje trochu inačaj. Jość paniaćci paskoranaj amartyzacyi, amartyzacyi na prybytak i hetak dalej. Inšymi słovami, vytvorca pakazvaje vydatki na madernizacyju, kab płacić mienš padatkaŭ i chutčej vyjści na paśpiachovuju rabotu.
«Zavyšeńnie prybytkaŭ na pačatku dziejnaści paśla «madernizacyi» dziela dobrych pakazčykaŭ u spravazdačach u Saŭmin, — kaža kiraŭnik adnoj ź dziaržaŭnych arhanizacyj, jakoha my spytali pra sens novaj pastanovy. — A što budzie dalej, nikoha nie chvaluje. Tamu ŭ dziaržsiektary patrebnaja piermanientnaja madernizacyja i pastajannyja inviestprajekty — tady na papiery ŭsio budzie lepš, čym u realnaści. Heta sposab skažeńnia statystyki i łaziejka dla kradziažoŭ praz dyvidendy. Nu i pradpryjemstvy paśla madernicazyi nie vyhladajuć jak poŭnaje h**no — možna pachvalicca na BiełTA».
Ź im salidarnaja ekanamist Kaciaryna Barnukova, akademičny dyrektar BEROC.
«Dazvoł nie naličvać amartyzacyju — heta vyklučna buchhałtarskaja apieracyja. To-bok, vydatki na inviestycyju ŭžo paniesienyja (abo vypłočvajucca pracenty pa kredycie), ale ich dazvalajuć nie adlustroŭvać i nie pieranosić u sabiekošt. U vyniku, na papiery pakazvajecca bolš prybytku (abo mienš strat), ale kolkaść hrošaj na rachunku ad hetaha nie mianiajecca», — skazała nam jana.
Pa infarmacyi analityka Siarhieja Čałaha, novy cykł «madernizacyi» užo pačaŭsia za košt hrašovaj emisii. Ale, što praŭda, pakul što hetaha nie bačna u ličbach.