Pasolstva piša, što akcyi prajšli «pry maŭklivym papuščalnictvie ŭładaŭ Ukrainy» i «masavym udziele aktyvistaŭ biehłaj biełaruskaj ekstremisckaj apazicyi pad simvolikaj biełaruskich kałabaracyjanistaŭ i prysłužnikaŭ Treciaha Rejcha».
«Pasolstva vykazvaje rašučy pratest u suviazi z narastajučaj radykalizacyjaj antybiełaruskaj pazicyi Ukrainy, jakaja vyjaŭlajecca ŭ paturańni demanstratyŭnamu ŭšanavańniu kałabaracyjanistaŭ i kataŭ biełaruskaha naroda, i patrabuje spynić sproby hieraizavać złačynstvy suprać čałaviečnaści, jakija nie majuć terminu daŭniny i nie mohuć być daravanyja biełaruskim narodam», — skazana ŭ nocie.
Ściapan Bandera byŭ stvaralnikam Arhanizacyi ŭkrainskich nacyjanalistaŭ, što ŭ 1930—50-ja hady viała ŭzbrojenuju baraćbu za niezaležnaść Ukrainy. Banderu ŭdałosia zrabić niezaležnicki ruch papularnym.
Postać Bandery vyklikaje rezkaje nieprymańnie ŭ Rasii, bo jon arhanizavaŭ masavy i paśpiachovy ŭzbrojeny supraciŭ savietam.
Ukrainskija ž historyki ŭ acency Bandery padzialilisia. Nacyjanalisty i dziaržaŭniki vysoka aceńvajuć jaho postać, libierały i levyja staviacca da jaho niehatyŭna.
Z adnaho boku, jon uznačaliŭ uzbrojenuju baraćbu za niezaležnaść Ukrainy spačatku suprać palakaŭ, paśla — suprać nacystaŭ i savietaŭ. Z druhoha boku, jaho arhanizacyja vykarystoŭvała terarystyčnyja mietady. U vajnie suprać palakaŭ AUN raspaŭsiudziła teror na mirnaje nasielnictva.
U pieryjad da 1941 hoda AUN supracoŭničała ź niamieckimi nacystami. Adnak niemcy adpravili kiraŭnikoŭ arhanizacyi, u tym liku Banderu, u kancłahier, kali tyja 30 červienia 1941 hoda abviaścili Ukrainu niezaležnaj.
Raspaŭsiudžany fejk, što heta banderaŭcy palili vioski ŭ Biełarusi. Jon nie adpaviadaje histaryčnaj praŭdzie: Bandera na toj momant užo byŭ aryštavany nacystami. U źniščeńni Chatyni dy inšych zładziejstvach razam z esesaŭcami ŭdzielničali kałabaranckija padraździaleńni, składzienyja z pradstaŭnikoŭ roznych nacyjanalnaściej. U ich pieravažna ŭvachodzili byłyja savieckija vajennapałonnyja, pastaŭlenyja pierad vybaram: abo hałodnaja śmierć u łahiery, abo słužba nacystam.
Banderu ŭ 1959 zabiŭ ahient savieckaha KHB, jaki z časam raskajecca ŭ svaim učynku i pierabiažyć na Zachad.
Prezident Juščanka nadaŭ Banderu zvańnie Hieroja Ukrainy. Janukovič hety ŭkaz admianiŭ.
Ukrainskija nacyjanalisty šanujuć čyrvona-čorny ściah AUN naroŭni ź dziaržaŭnym, žoŭta-błakitnym.
Nacyjanalistyčnyja idei atrymali novaje raspaŭsiudžańnie va Ukrainie ŭ adkaz na zachop Rasijaj Kryma i častki Danbasa ŭ 2014-m.
Siońnia postać Bandery ŭšanoŭvajecca taksama va ŭkrainskich siłavych strukturach.