Dla vychadu z kryzisu nieabchodna stać na inavacyjny šlach raźvićcia, zajaviŭ na pasiadžeńni respublikanskaha savieta dyrektaraŭ RHA «Biełaruskaja navukova‑pramysłovaja asacyjacyja» 4 žniŭnia člen prezidyuma BNPA, eks‑premjer‑ministr Siarhiej Linh.
«My abviaścili inavacyjny šlach raźvićcia, ale tolki prymajem sutarhavyja miery siońniašniaha dnia pa vychadzie z kryzisu. My pavinny zazirać u budučyniu», — ličyć Linh. Prykładam vychadu z kryzisu 1970‑ch hadoŭ jon nazvaŭ Finlandyju. Raniej u hetaj krainy była tolki drevaapracoŭčaja, papiarovaja pramysłovaść i rybałoŭstva. Siońnia hetaja kraina — adzin ź lideraŭ u elektronnaj pramysłovaści. «Jany zdoleli stvaryć zusim novuju halinu va ŭmovach kryzisu», — adznačyŭ Linh.
Na jaho dumku, inavacyjny šlach raźvićcia »zaležyć ad Saŭmina, Akademii navuk, bankaŭ, padatkovych orhanaŭ, halinovych ministerstvaŭ».
«Dla hetaha pavinny być finansy, pavinna być sistema, pavinna być arhanizacyja, jakaja adkazvaje za heta, a nie ŭsie pakrysie. Hetaje pytańnie pavinna stać pytańniem № 1», — padkreśliŭ były premjer.
Pry hetym jon adznačyŭ, što ŭ krainie »pahražalny pakazčyk» pa NDDKR (navukova‑daśledčyja i dośledna‑kanstruktarskija raboty) — 0,7% ad VUP. «Jakija inavacyi, jakaja sistema moža być, kali nie finansujucca hetyja raboty», — adznačyŭ Linh. Inšyja krainy, pavodle jaho słoŭ, majuć na hetyja raboty minimum 1,4% VUP.
«My stracili surjoznyja vytvorčaści, siarod jakich vytvorčaść fotaaparataŭ, vyličalnaj techniki, pryborabudavańnie, stankabudavańnie», — zajaviŭ Linh.
Jon ličyć mahčymym adradzić hetyja haliny. Akramia taho, jość «cikavyja rašeńni i ŭ vajskova‑pramysłovym kompleksie».
