Najbolš płaciać u IT, na piŭzavodzie i miasakambinacie
Tradycyjna samyja vysokija zarobki ŭ IT-śfiery. Techničny dyrektar (Engineering manager) moža raźličvać na zarpłatu da siami tysiač dalaraŭ plus bonusy. Da taho ž zarobak pryviazany da kursa dalara.
Ahrapradpryjemstvu z Kobrynskaha rajona «Haradziec-Ahra» patrebny dyrektar na zarpłatu ŭ 3000-4500 rubloŭ. Niuansy pracy i patrabavańni da kandydataŭ nie paviedamlajucca.
«Alivaryja» šukaje dyrektara departamienta. Zarpłata — čatyry tysiačy rubloŭ. Treba viedać anhlijskuju, zadača — pabudova efiektyŭnaha adździeła markietynhu i kiravańnie im.
Namieśnik dyrektara pa vytvorčaści i jakaści patrebny mahiloŭskamu miasakambinatu. Zarobak dla Biełarusi vielmi vysoki — ad troch tysiač rubloŭ, dadatkova kampiensujuć arendu žylla.
Taksama ad troch tysiač rubloŭ abiacajuć dyrektaru kampanii, jakaja zajmajecca pastaŭkami budmateryjałaŭ i abstalavańnia.
Surjoznuju zarpłatu prapanujuć dyrektaru połackaha kamunalnaha palihrafičnaha pradpryjemstva «Naśledije F.Skoriny», 2500-2600 rubloŭ.
Biełaruska-indyjskaje farmpradpryjemstva «Novałok» u Skidzieli taksama šukaje dyrektara. Zarpłata ad 2300 da 2500 rubloŭ, ale jość niuansy: treba svabodna vałodać ruskaj, anhlijskaj i chindzi.
Dyrektar raźlikova-kasavaha centra adnaho z bankaŭ moža raźličvać na 1700-2500 rubloŭ zarpłaty.
Dyrektaru kramy «Jeŭraopt» u Minsku prapanujuć ad 1600 da 2200 rubloŭ. Jaho namieśniku — ad 1000 da 1200. Kali vieryć apisaniu vakansii, abodvuch čakaje «cikavaja i napružanaja praca, vysoki ŭzrovień adkaznaści».
Kampanija «Vitalur» prapanuje dyrektaru svajoj kramy zarpłatu ad 1930 rubloŭ, namieśniku — ad 1300. Dyrektaru kramy «Dabranom» abiacajuć mienš — 1600-1800 rubloŭ.
Dyrektara šukajuć na minskaje pradpryjemstva, jakoje zajmajecca vytvorčaściu telekamunikacyjnaha abstalavańnia. Patrabavańni: vopyt raboty na kirujučaj pasadzie ŭ dziaržaŭnaj arhanizacyi ad dvuch hadoŭ, svabodnaje vałodańnie anhlijskaj movaj. Zarpłatu abiacajuć ad 1500 da 2000 rubloŭ.
Namieśnik dyrektara pa žyviołahadoŭli moža zarabić ad 1000 da 2000 rubloŭ. Praca — u AAT «Turaŭščyna».
Dyrektaru ŽEU adnaho z rajonaŭ Minska abiacajuć płacić 1500 rubloŭ.
Za kitajskuju movu ad 600 da 1500
Kali čałaviek viedaje kitajskuju movu, to moža pretendavać na pasadu dyrektara ŭ adnym z handlovych pradpryjemstvaŭ. Zarobak 900-1500 rubloŭ, akramia kitajskaj movy, patrabujuć vopyt pracy ŭ hramadskim charčavańni, viedańnie asnoŭ ekanomiki Kitaja i Biełarusi. Inšaje TAA taksama šukaje dyrektara, jaki vałodaje kitajskaj, praŭda, čym zajmajecca kampanija, nie paviedamlajuć. Zarobak tam nievialiki, 600-800 rubloŭ.
A kandydat, jaki «maje vopyt pracy ŭ tajskim SPA-sałonie i ŭpeŭniena vałodaje anhlijskaj», moža raźličvać na pasadu namieśnika dyrektara ŭ minskim sałonie pryhažości. Zarpłata ad 1162 da 1395 rubloŭ.
Art-dyrektara nienazvanaj ustanovy ŭ Minsku (vyhladaje, što heta bar ci restaran), jaki budzie vieści sacsietki, arhanizoŭvać proma-akcyi i vystupy artystaŭ, šukajuć na zarobak ad 1000 rubloŭ.
Kamunalnaje žyllovaje ramontna-ekspłuatacyjnaje pradpryjemstva z Homiela šukaje sabie namieśnika dyrektara pa ideałohii. Płacić buduć 900 rubloŭ.
Dyrektar viaskovaj dziciačaj škoły mastactvaŭ moža raźličvać na zarobak ad 662 da 843 rubloŭ. Praca — u Smarhonskim rajonie.
Dyrektar viaskovaj škoły patrabujecca na Šarkaŭščynie. Zarpłata ad 694 da 765 rubloŭ.
Dyrektar filijała strachavoj kampanii ŭ Śvisłačy moža raźličvać na 725 rubloŭ zarpłaty. Namieśniku dyrektara rajonnaj biblijateki tam ža abiacajuć płacić 660 rubloŭ.
Namieśnik dyrektara pa administracyjna-haspadarčaj pracy ŭ Navapołackaj škole Alimpijskaha reziervu moža raźličvać na ścipłyja 611 rubloŭ zarpłaty.
Cikavaja vakansija majecca ŭ technaparku «Vialiki kamień». Tam na čverć staŭki šukajuć dyrektara z surjoznym śpisam navykaŭ: vopyt u śfiery telekamunikacyj na kirujučych pasadach ad 15 hadoŭ, vopyt kiraŭnictva ŭ śfiery markietynhu; prafiesijnyja viedy ŭ halinie pieradavych infarmacyjnych technałohij; svabodnaje vałodańnie anhlijskaj i kitajskaj movami. Zarpłata ž — 600 rubloŭ.
Sumna viadomy muziej šukaje novaha dyrektara
Vaŭkavyski muziej imia Bahracijona šukaje dyrektara. Zarobak — 550 rubloŭ. Nahadajem, były dyrektar hetaha muzieja Kanstancin Šyšmakoŭ byŭ členam vybarčaj kamisii ŭ žniŭni 2020 hoda, admoviŭsia padpisvać vynikovy pratakoł. A praz tydzień paśla vybaraŭ Šyšmakoŭ źnik, jaho cieła znajšli praź niekalki dzion u lesie. SK adrapartavaŭ, što śmierć dyrektara muzieja «nie nosić kryminalnaha charaktaru».
A ŭ Homieli šukajuć dyrektara TAA na zarobak u 460 rubloŭ. Čym zajmajecca pradpryjemstva, nie pišuć, ale pošuk vydaje, što śfiera dziejnaści — narychtoŭka lesu.
Na zarpłatu ŭ 450-500 rubloŭ u Minsku patrabujecca dyrektar, jaki budzie viedać «receptury kitajskaj kuchni». Abaviazkovaje i viedańnie kitajskaj movy «dla absłuhoŭvańnia naviedvalnikaŭ kafe — kitajskich hramadzian».
Kampanija, jakaja zajmajecca impartam ŭ Biełaruś hidraabstalavańnia, abiacaje dyrektaru zarpłatu ad 400 rubloŭ. Pry hetym treba mieć vopyt pracy ŭ piać hadoŭ i viedać litoŭskuju.