«Fiederacyja zrabiła «padarunak» na Novy hod: deaktyvavała fiskod dačce i adchiliła jaje na hod ad spabornictvaŭ, — paviedamiŭ Siarhiej. — Padstavy? Maŭlaŭ, špurlała pryzy na spabornictvach, pavodziła siabie nieadpaviednym dla spartsmiena čynam. Rašeńniem trenierskaha savieta — kažuć, adnahałosna — pryniataje rašeńnie. Našaj trenierskaj tusoŭcy — pryvitańnie! Praz 2,5 miesiaca paśla ŭznaharodžvańnia Darji. Biez tłumačeńniaŭ ad spartsmienki. Usio hienijalnaje prosta! Mima junijorskaha čempijanatu śvietu i Jeŭrapiejskaha fiestyvalu moładzi. Dzicia ŭ ślazach. Kraina dla žyćcia».
Akramia taho, zabaranili ŭdzieł u spabornictvach i jašče adnoj spartsmiency — Śviatłanie Andryjuk, i ciapier z hetaj nahody Mižnarodny alimpijski kamitet i Mižnarodny łyžny sajuz pačali svajo rasśledavańnie.
«Miarkuju, što raźbiralnictva moža zaciahnucca, bo pierapiska ź biełaruskimi spartyŭnymi funkcyjanierami — jašče taja pieśnia», — miarkuje Siarhiej Dalidovič i ŭspaminaje, z čaho pačynałasia historyja…
— Paśla taho, jak ja vystupiŭ nie na baku praŭładnych spartsmienaŭ, było zrazumieła, što ŭ adkaz taksama niešta «prylacić», — kaža surazmoŭca. — Reakcyja nie prymusiła siabie doŭha čakać. Ja treniravaŭ dočak, nas zrabili nievyjaznymi na zbory ŭ Rasiju. Uspryniaŭ heta narmalna, i ŭ minułym hodzie dva razy braŭ adpačynak, kab vyvieźci dočak na spabornictvy za svoj košt. Praŭda, nidzie heta asabliva nie afišavaŭ.
U minułym hodzie najezd byŭ, ale ŭ mieru, chacia b vystupać na spabornictvach nie zabaraniali. Tamu ŭ mianie ŭ 2020 hodzie pretenzij da fiederacyi praktyčna nie było.
A ciapier u Biełaruskim łyžnym sajuzie źmianiłasia kiraŭnictva (novym kiraŭnikom staŭ Alaksandr Darachovič, jaki akramia hetaha zajmaje pasadu namieśnika staršyni Minharvykankama. — NV), tamu, vidać, i padychody źmianilisia. Padkrucili hajki.
— Sami vy źviartalisia ŭ Biełaruski łyžny sajuz?
— Naturalna, źviartaŭsia. Išoŭ na kantakt, pisaŭ listy z prośbami i prasiŭ tłumačeńniaŭ… U adkaz — poŭnaje ihnaravańnie.
A kali Dašu dyskvalifikavali na hod za toje, što jana byccam by špurlała padčas uznaharodžvańnia pryzy, heta naohuł stała šokam! Bolš za toje, pra dyskvalifikacyju mnie paviedamili tolki ŭ vusnaj formie. Kali ž pajechaŭ asabista ŭ Biełaruski łyžny sajuz, kab atrymać aficyjnuju infarmacyju, mnie adkazali tak: «Rabicie zapyt i čakajcie adkaz». 3-ha studzienia zrabiŭ piśmovy zapyt, da hetaha času cišynia. Źviartaŭsia i ŭ NAK, ale tam dalej paroha nie puścili. Taksama skazali: «Pišycie piśmy».
Ale, paŭtarusia, čynoŭniki spasyłajucca na toje, što padčas uznaharodžvańnia maja dačka byccam by ŭčyniła skandał…
— A jak było na samaj spravie?
— Na minskim kubku pa łyžarolerach u kastryčniku minułaha hoda dačka zaniała pieršaje miesca. I voś prachodzić uznaharodžvańnie, Darji zamiest pryza za pieršaje miesca, jakoje jana realna zaniała, dajuć tolki za treciaje. Maŭlaŭ, nie chapiła pryzoŭ. Vidać, takoje drobnaje paskudstva z boku spartyŭnych funkcyjanieraŭ, kab prynizić junuju spartsmienku. Pakazać, chto ŭ domie haspadar.
Daša nie zachacieła prymać taki pryz, tamu padyšła da arhanizataraŭ i viarnuła im hety spartyŭny trafiej. Tyja ŭ ruki brać pryz nie zachacieli, tamu dačka prosta pastaviła jaho na śnieh i pajšła.
Heta bačyli ŭsie — i prysutnyja, i ja, i maja žonka. Nijakaha skandału i špurlańnia pryzoŭ tam nie było i blizka. Ale ŭ rešcie rešt situacyju paviarnuli zusim u inšy bok.
— Što dalej płanujecie rabić?
— Dačka pakul vučycca ŭ škole, viečaram, kab apietyt nahulać, robim lohkija prabiežki. Ale paśla taho, što adbyłosia, u Dašy naohuł niama nijakaha žadańnia treniravacca. Chacia jana ŭ svaim uzroście vielmi pierśpiektyŭny atlet, pra heta skaža luby śpiecyjalist.
Ale, jak bačym, čynoŭniki siońnia aceńvajuć spartsmienaŭ nie pa ich vynikach, a pa łajalnaści da «palityki partyi». Chacia spartyŭnaja fiederacyja ŭ pryncypie nie pavinna zaležać ad dziaržavy.
— U niekatorych zamiežnych ŚMI źjaviłasia infarmacyja, što «łyžnik Siarhiej Dalidovič i jaho dačka Darja źbirajucca pakinuć Biełaruś».
— Ja nasamreč u intervju finskamu vydańniu raspaviadaŭ pra situacyju, jakaja skłałasia z majoj dačkoj. Pry hetym skazaŭ tak: «Daša zakančvaje škołu, i zatym budziem šukać varyjanty dla pierajezdu ŭ inšuju krainu, kab čałaviek dalej moh treniravacca i vystupać na spabornictvach».
Nichto pakul tak i nie adkazaŭ, za što junuju spartsmienku pazbaŭlajuć prava zajmacca sportam u svajoj krainie. Z-za svaich i maich pohladaŭ? Dyk heta niapravilna. Ale ja, jak luby baćka, abaraniaŭ i budu abaraniać svaju dačku da kanca.
«Raju ŭsim: haniajcie va ŭsiu moc!» Hutarka z najlepšym biełaruskim łyžnikam časoŭ niezaležnaści Siarhiejem Dalidovičam
