Siarod pieršych krain, jakija razdavali hrošy vakcynavanym, była Sierbija. Za pryščepki tam davali pa 25 jeŭra.
U ZŠA Džo Bajden prapanavaŭ štatam, kab ludziam vypłačvali pa 100 dalaraŭ za vakcynacyju. Ale roznyja štaty raspracoŭvali i ŭłasnyja prahramy stymulavańnia vakcynacyi.
Naprykład, u štacie Merylend siarod vakcynavanych razyhryvali łatareju z pryzam 400 000 dalaraŭ. U štacie Men ludziam razdavali biaspłatnyja licenzii na rybałku i kvitki na biejsboł.
Štat Vašynhton prapanoŭvaŭ biaspłatny kanabis vakcynavanym asobam, starejšym za 21 hoda. U Ńju-Jorku razyhryvali łatareju z maksimalnym pryzam 5 miljonaŭ dalaraŭ. Štat Ahaja pravodziŭ štotydniovuju łatareju, u ramkach jakoj adnamu ščaślivamu vakcynavanamu žycharu davali 1 miljon dalaraŭ. Siarod niepaŭnaletnich razyhryvajuć stypiendyi na navučańnie va ŭniviersitecie. U Kalifornii na vypłaty vakcynavanym patracili 116,5 młn dalaraŭ.
Łatarei razyhryvali i ŭ kanadskich rehijonach. Naprykład, u Kviebieku razyhryvali 2 miljony dalaraŭ, siarod jakich — hałoŭny pryz 1 miljon.
Padobnyja łatarei pravodziacca i ŭ Kambodžy.
U Hankonhu ŭrad paprasiŭ pryvatnyja kampanii razyhrać pryzy siarod vakcynavanych. Biaspłatnyja kvatery koštam 1,4 młn dalaraŭ, pryvatnyja viečarynki na samalocie A321neo, aŭtamabili Tesla, ajfony, bieźlimitnyja «šviedskija stały», załatyja źlitki i hetak dalej.
U Brytanii moładzi za vakcyny prapanoŭvali biaspłatnyja pajezdki na Uber i Bolt, kvitki ŭ kino i dastaŭku fast-fuda. U stalicy, Łondanie, razyhryvali kvitki na futbolny čempijanat Jeŭropy.
U Hrecyi moładzi razdavali vaŭčary na 150 jeŭra za pieršuju dozu. Kupony možna vykarystać dla padarožžaŭ, pražyvańnia ŭ hatelach abo kiempinhach, naviedvańnia kancertaŭ, kinateatraŭ i apłaty kvitkoŭ na inšyja kulturnyja mierapryjemstvy.
U Hiermanii ŭ niekatorych haradach u centrach vakcynacyi razdajuć biaspłatnyja sasiski. A ŭ Bierlinie ŭ centrach vakcynacyi adbyvajucca sapraŭdnyja rejvy z dydžejami.
U Rumynii vakcynavanym prapanoŭvali biaspłatnyja kiebaby, a knižny mahazin razdavaŭ biaspłatnyja knihi i kavu.
U Maskvie siarod vakcynavanych razyhryvali piać aŭtamabilaŭ štotydzień.
U Niderłandach ludziej paśla pryščepki častavali marynavanym sieladcom — miascovym tradycyjnym dalikatesam.
U aŭstralijskim Mielburnie kinateatry prapanoŭvali vakcynavanym biaspłatny papkorn i čypsy.
U adnym z tajłandskich sielskahaspadarčych rehijonaŭ razyhryvali 27 karoŭ — takim sposabam vakcynavali pałovu nasielnictva. U Indaniezii robiać padobnyja łatarei, ale z kuraniatami. Mnohija indaniezijcy bajalisia rabić pryščepki: u musulmanskaj krainie nie ŭsie byli ŭpeŭnienyja ŭ ichniaj chalalnaści.
U Livanie Uber prapanoŭvaŭ dźvie biaspłatnyja pajezdki u adzin z centraŭ vakcynacyi i nazad.
Niestandartnyja miery dla stymulavańnia vakcynacyi ažyćciaŭlali i ŭ Kitai. U roznych rehijonach ludziam davali kupony na pakupki i praduktovyja vaŭčary, kurynyja krylcy, survetki, muku, hrašovyja pryzy i biaspłatny ŭvachod u parki.
U Bałharyi piensijanieram 6 miesiacaŭ paśla druhoj dozy dapłačvali da asnoŭnaj piensii 43 dalary.
Na ŭskrainie stalicy Filipin Maniły siarod vakcynavanych razyhryvali 25-kiłahramovy miašok rysu. Inicyjatyva nakiravanaja na pryciahnieńnie biadniejšych žycharoŭ, jakim nieabchodny dadatkovy šturšok dla vakcynacyi.
U Indyi McDonald's prapanoŭvaŭ vakcynavanym klijentam źnižku 20%.
Juvieliry ŭ štacie Hudžarat vydavali vakcynavanym žančynam załatyja špilki dla nosa.
Uznaharoda ŭ abmien na pryščepku moža zdavacca dziŭnaj idejaj, ale niekatoryja miedycynskija daśledčyki ličać, što takija stymuły mohuć być efiektyŭnym sposabam.
U artykule, apublikavanym u miedycynskim časopisie The New England Journal of Medicine, daśledčyki śćviardžajuć, što «isnuje peŭnaja łohika ŭ pradastaŭleńni finansavych stymułaŭ, jakija mohuć być vykarystany dla kampiensacyi ŭskosnych vydatkaŭ na vakcynacyju, uklučajučy čas, vydatkavany na płanavańnie sustreč ci pajezdki; dla kampiensacyi stračanaha dachodu dla rabotnikaŭ z pahadzinnaj pracaj».
Hetyja vydatki niepraparcyjna strymlivajuć ludziej ź nizkim uzroŭniem dachodu ad vakcynacyi, i vypłaty mohuć heta vypravić.
Pavodle apytańnia Kalifarnijskaha ŭniviersiteta ŭ Łos-Andželesie, kala traciny niepryščeplenych amierykancaŭ zajavili, što hatovyja vakcynavacca ŭ abmien na 100 dalaraŭ.
Matyvujuć ludziej i łatarei. Ludziej pryciahvajuć vialikija ličby, i ludzi nie ŭmiejuć adekvatna aceńvać šancy.
Krytyki miarkujuć, što sami pa sabie takija inicyjatyvy naŭrad ci dapamohuć dasiahnuć vysokaha ŭzroŭniu vakcynacyi. Chalava i finansavyja stymuły, imavierna, spracujuć dla peŭnych hrup, jakija vahajucca i raniej ŭžo dumali pra vakcynacyju. Adnak u hrup nasielnictva, pryncypova nastrojenych suprać vakcynacyi, zaciatych skieptykaŭ, finansavyja stymuły mohuć vyklikać lišnija padazreńni i ŭzmacnić aściarohi.
Hetyja prahramy taksama nie likvidujuć pastajannyja prabieły ŭ infarmacyi i aśviecie, praź jakija niekatoryja marhinalnyja hrupy nasielnictva admaŭlajucca rabić pryščepki.
Čytajcie taksama: «Stolki nie było nikoli». U paliklinikach robicca niešta niejmaviernaje, taki napłyŭ kavidnych pacyjentaŭ
