Kaja Kałas. Fota commons.wikimedia.org.
Kiraŭnica estonskaha ŭrada padzialiłasia mierkavańniem pra toje, jak zachodnija palityki pavinny vieści siabie z Uładzimiram Pucinym. Pra heta Kaja Kałas raspaviała ŭ intervju vydańniu Politico.
Kałas śćviardžaje, što kali zachodnija sajuźniki žadajuć pieramahčy Pucina, im varta navučycca «stratehičnaj ciarplivaści». Jana padtrymlivaje pošuk šlachoŭ da dyjałohu z Maskvoj, ale śćviardžaje, što vieści pieramovy z Pucinym nie varta. Što da maniery pieramoŭ rasijskaha palityka, Kałas nazyvaje jaje «staroj savieckaj taktykaj». Voś jak jana jaje apisvaje:
«Pa-pieršaje, patrabuj maksimum, patrabuj toje, što tabie nikoli nie naležała. Potym druhoje: vystaŭlaj ultymatumy. I treciaje: jany nikoli nie sastupajuć u pieramovach [navat] na calu, bo na Zachadzie zaŭsiody buduć ludzi, jakija buduć vieści pieramovy i daduć tabie niešta, čaho ŭ ciabie raniej nie było».
Voś čamu Kałas bačyć niebiaśpieku ŭ tym, što ŭ dni napružańnia vakoł Ukrainy zachodnija palityki žadajuć pahavaryć z Pucinym i navat sustrecca ź im (vienhierski premjer Orban učora byŭ u Maskvie, dabivaŭsia pavieličeńnia pastavak hazu).
Estonskaja premjer ličyć, što treba ŭvažliva stavicca da paviedamleńniaŭ, jakija zychodziać ad palitykaŭ, što razmaŭlajuć z Pucinym. Pakul što, kaža Kałas, jednaść NATA zachavałasia, i heta stała niepryjemnym siurpryzam dla Rasii.
Palityk taksama źviartaje ŭvahu na pavodziny Rasii ŭ dačynieńni da Biełarusi. Jak miarkuje Kałas, meta Maskvy — fizičnaje pašyreńnie svajoj dziaržavy.
